নগা সমস্যাৰ সমাধানৰ ক্ষেত্ৰত নিষ্ক্ৰিয় ভাৰত চৰকাৰঃ ক্ষুব্ধ এন এছ চি এন আই এম

ডিজিটেল সংবাদ,বেকাজানঃ  বিগত সাত দশক ধৰি অমীমাংসিত হৈ থকা নগা সমস্যা পুনৰ ভয়াবহ সংকটলৈ গতি কৰিবলৈ নিদিবলৈ ভাৰত চৰকাৰক সকীয়াই দিছে নগা বিদ্ৰোহী সংগঠন এন এছ চি এ আই এমে । ২০১৫ চনৰ ৩ আগষ্টত ফ্ৰেমৱৰ্ক এগ্ৰিমেণ্ট হোৱাৰ পিছত চূড়ান্ত নগা চুক্তি স্বাক্ষৰ বাবে বিগত দহ বছৰ ধৰি ধৈৰ্য্যৰে অপেক্ষা কৰি থকাৰ পিছতো নগা সমস্যাৰ সমাধানৰ ক্ষেত্ৰত ভাৰত চৰকাৰৰ দীৰ্ঘদিনীয়া নিষ্ক্ৰিয়তাই আলোচনাৰ ওপৰত প্ৰভাৱিত কৰিব বুলি স্পষ্ট কৰি দিছে সংগঠনটোৱে ।

এন এছ চি এন আই এমে আজি এক প্ৰেছ বিজ্ঞপ্তিযোগে নাগালিমৰ দীৰ্ঘদিনীয়া ভাৰত-নগা ৰাজনৈতিক আলোচনাৰ প্ৰকৃত আৰু ক্ষিপ্ৰ সমাধানৰ প্ৰয়োজনীয়তাৰ কথা উল্লেখ কৰি কাঠামো চুক্তিখনৰ যুক্তিসংগত সিদ্ধান্ত নিশ্চিত কৰিবলৈ চৰকাৰক আহ্বান জনায়। এন এছ চি এন-আই এম-এ চৰকাৰৰ প্ৰতিশ্ৰুতি পূৰণৰ ক্ষেত্ৰত আন্তৰিকতাৰ অভাৱৰ অভিযোগ উত্থাপন কৰি চৰকাৰৰ এই পলম কৰা কাৰ্যক সমালোচনা কৰে।

প্ৰেছ বিজ্ঞপ্তিটোত আঙুলিয়াই দিয়া হৈছে যে প্ৰধানমন্ত্ৰী নৰেন্দ্ৰ মোডীয়ে এসময়ত এই চুক্তিখনক লৈ নিজৰ ৰাজনৈতিক কৃতিত্ব গৌৰৱেৰে ঘোষণা কৰিছিল যদিও তেওঁৰ চৰকাৰৰ নিষ্ক্ৰিয়তাই এতিয়া আস্থা হ্ৰাস কৰি চুক্তিখনক সন্মান জনোৱাৰ বাবে ভাৰতৰ দায়বদ্ধতাক লৈ গুৰুতৰ সন্দেহৰ সৃষ্টি কৰিছে। ভাৰত চৰকাৰৰ দীৰ্ঘদিনীয়া নিষ্ক্ৰিয়তাই এতিয়া সমস্যা সমাধানৰ বাবে  অবিশ্বাস আৰু অনিশ্চয়তাৰ সৃষ্টি কৰিছে।

উল্লেখযোগ্য যে ২০১৫ চনৰ ৩ আগষ্টত স্বাক্ষৰিত ফ্ৰেমৱৰ্ক চুক্তিখনক প্ৰথম অৱস্থাত নগাসকলৰ ৰাজনৈতিক আকাংক্ষা পূৰণৰ দিশত এক বৃহৎ পদক্ষেপ হিচাপে গণ্য কৰা হৈছিল। সেই সময়ত দুয়োপক্ষই শান্তিপূৰ্ণ প্ৰস্তাৱৰ ওপৰত আস্থা প্ৰকাশ কৰি চুক্তিখনৰ ঘোষণা বহু উৎসাহেৰে কৰা হৈছিল। কিন্তু চূড়ান্ত নিষ্পত্তিৰ ক্ষেত্ৰত প্ৰায় এটা দশক পাৰ হৈ যোৱাৰ লগে লগে এন এছ চি এন-আই এমে চৰকাৰৰ প্ৰতিশ্ৰুতি পূৰণৰ ক্ষেত্ৰত অনান্তৰিকতাৰ অভিযোগ উত্থাপন কৰে।

এন এছ চি এনে বৰ্তমানৰ নেতৃত্বক বিলম্বৰ কৌশল আৰু ৰাজনৈতিক কৌশলৰ ওপৰত নিৰ্ভৰ নকৰি সেই প্ৰতিশ্ৰুতিসমূহক সন্মান কৰিবলৈ আহ্বান জনাইছে। কাঠামো চুক্তিখন কাৰ্যকৰী কৰাত পলম হোৱাৰ ফলত বছৰ বছৰ ধৰি চলি অহা আলোচনা লৈ পুনৰ ভাবুকি আহিব পাৰে আৰু অঞ্চলটোক পুনৰ অস্থিৰতালৈ ঠেলি দিব পাৰে বুলি সকীয়াই দিয়ে। এন এছ চি এনে যুক্তি দিছে যে চৰকাৰে এতিয়া  প্ৰতিশ্ৰুতি পূৰণ কৰিব নে পৰিস্থিতিক সংঘাতলৈ ঠেলি দিব।

এসময়ত এই চুক্তিক লৈ গৌৰৱ কৰা প্ৰধানমন্ত্ৰী মোডীক নিৰ্ণায়ক পদক্ষেপ ল’বলৈ আহ্বান জনাইছে। এন এছ চি এনে সকীয়াই দিয়ে যে নগা সমস্যা সমাধানৰ ক্ষেত্ৰত নিষ্ক্ৰিয়তাই বিশ্বাসযোগ্যতা ক্ষতিগ্ৰস্ত কৰাৰ লগতে নগাসকলৰ মাজত অসন্তুষ্টি অধিক গভীৰ হ’ব পাৰে। উল্লেখযোগ্য নতুন দিল্লীয়ে এন এছ চি এনৰ এই সতৰ্কবাণীক গুৰুত্ব দিব নে বিষয়টো আৰু অধিক অৱনতি ঘটাবলৈ দিব সেয়া অনাগত দিনত নিশ্চয় লক্ষ্যণীয় হ'ব।