নগাঁৱত আৰক্ষীয়ে গ্ৰেপ্তাৰ কৰিলে সোনৰ গহনা সহ দুজন চোৰক...

ডিজিটেল সংবাদ,নগাঁওঃ বিভিন্ন লোকৰ ঘৰত ইলেক্ট্ৰেচিয়ান হিচাপে কাম কৰাৰ সুবিধা লৈ সোন-ৰূপৰ অলংকাৰ চুৰি কৰি অহা এটা চক্ৰৰ দুজনক আৰক্ষীয়ে গ্ৰেপ্তাৰ কৰে ৷ গ্ৰেপ্তাৰ কৰা চোৰ দুজনৰ নাম হৈছে সুৰেন দাস আৰু বিকাশ সৰকাৰ ৷

জানিব পৰা মতে, লাওখোৱা ৰোডৰ এজন ব্যৱসায়ীৰ ঘৰত বিদ্যুতৰ মেৰামতিৰ কাম কৰি থকাৰ সময়ত সুৰেন আৰু বিকাশে সুবিধা বুজি লকাৰৰ পৰা সোনৰ গহনা চুৰি কৰিছিল ৷ ঘটনাৰ সন্দৰ্ভত গৃহস্থই আৰক্ষীক অভিযোগ দাখিল কৰাৰ পিছত হয়বৰগাঁও আৰক্ষীয়ে তদন্ত আৰম্ভ কৰে ৷

আৰক্ষীৰ তদন্তৰ সময়তে সোনৰ গহনা চুৰিৰ ঘটনাৰে সুৰেন আৰু বিকাশ জৰিত থকাটো নিশ্চিত হয় ৷ অভিযান চলাই আৰক্ষীয়ে দুয়োৰে জিম্মাৰ পৰা প্ৰায় ৮ লাখ টকাৰ সোনৰ অলংকাৰ উদ্ধাৰ কৰে ৷