কাছমাৰীত অবৈধভাৱে বালি তোলা যন্ত্ৰাংশ জব্দ...

ডিজিটেল সংবাদ ,বেবেজীয়াঃ নগাঁও জিলাৰ বেবেজীয়া অঞ্চলৰ কাছমাৰীত সোমবাৰে বিয়লি বন বিভাগে অভিযান চলাই অবৈধভাৱে ভূ-গৰ্ভৰ পৰা বালি তোলা যন্ত্ৰাংশ জব্দ কৰিবলৈ সক্ষম হয় । এক অসাধু চক্ৰই কাছমাৰীৰ ছিনিয়ৰ ছেকেণ্ডাৰী স্কুলৰ সমীপত এই বালি তোলা যন্ত্ৰটি স্থাপন কৰি ভূ-গৰ্ভৰ পৰা দীৰ্ঘদিন ধৰি বালি সংগ্ৰহ কৰি ইটাভাটা সমূহত বিক্ৰী কৰি আহিছিল ।

বিয়লি গোপন খবৰৰ ভিত্তিত নগাঁও বন সংমণ্ডলৰ বনাঞ্চলিক বিষয়া কল্যাণী মালাকাৰৰ নেতৃত্বত বন বিভাগৰ এটা দলে অভিযান চলাই এই নীতি বৰ্হিভূত কাৰ্যত ব্যৱহাৰ কৰি থকা যন্ত্ৰাংশ জব্দ কৰে । অৱশ্যে এই অবৈধ ব্যৱসায়ৰ সৈতে জড়িত সকলক কৰায়ত্ত কৰাত অসমৰ্থ হয় বন বিভাগ ।

উল্লেখ্য যে,বন সুৰক্ষা আইনক অংগুষ্ঠ প্ৰদৰ্শন কৰি একাংশ দুষ্ট প্ৰকৃতিৰ লোকে ধাৰাবাহিকভাৱে বন সম্পদৰ ওপৰত লুণ্ঠন অব্যাহত ৰাখি প্ৰাকৃতিক ভাৰসাম্যৰ প্ৰতি ভাবুকি নমাই আনিছে ।

আৰু পঢ়কঃ সাম্প্ৰদায়িক মন্তব্য কৰাৰ বাবে মন্ত্ৰী পীযুষ হাজৰিকাৰ বিৰুদ্ধে গোচৰ ৰুজু...