নামতিত পিয়লি ফুকন শাখা সাহিত্য সভাৰ মাতৃভাষা দিৱস উদযাপন

ডিজিটেল সংবাদ,নামতি : শিৱসাগৰ জিলাৰ নামতি পিয়লি ফুকন শাখা সাহিত্য সভাৰ সৌজন্যত ১৫২ নং চেতিয়া কাটনি প্ৰাথমিক বিদ্যালয়ৰ সহযোগত ৰজাবাৰী চেতিয়া কাটনি প্ৰাথমিক বিদ্যালয়ত মাতৃভাষা দিৱস উদযাপন কৰা হয় ৷ বিদ্যালয়ৰ প্ৰধান শিক্ষয়িত্ৰী তৃষ্ণা ফুকনে সভাপতিত্ব কৰা সভাত বিশিষ্ট অতিথি হিচাপে উপস্থিত থাকে নামতি অঞ্চলৰ এজন বিশিষ্ট শিক্ষাবিদ, সু-লেখক অৱসৰী প্ৰৱক্তা মোহিনী মহন্ত  ৷

ভাষণ প্ৰসঙ্গত তেওঁ কয় যে, বিভিন্ন বিদেশী ভাষাই অতিথি হৈ আহি অসমীয়া ভাষাৰ অবিচ্ছেদ্য অংশ হৈ পৰিছে ৷ এইদৰে অত্যধিক বিদেশী ভাষা অসমীয়া ভাষাৰ লগত সংযুক্ত হোৱাটো বা ব্যৱহাৰ কৰাটো আমাৰ মাতৃভাষাৰ বাবে শুভ লক্ষণ নহয় ৷ আমি শুদ্ধভাৱে আমাৰ ভাষাটো ক'বলৈ আৰু লিখিবলৈ শিকা উচিত ৷

ছাত্ৰ-ছাত্ৰীসকল উপকৃত হোৱাকৈ তেখেতে অসমীয়া ভাষাৰ বিষয়ে ব্যাকৰণৰ বিষয়ে সুন্দৰ বক্তব্য আগবঢ়ায় ৷ আইৰ মুখৰ ভাষাৰ আইনাম, বিয়ানাম, নিচুকনি গীত, ভাওনাৰ বচন আদি পৰিৱেশন কৰি অনুষ্ঠানটি জীপাল কৰি তোলে তেওঁ ৷

পিয়লি ফুকন শাখা সাহিত্য সভাৰ প্ৰাক্তন প্ৰতিষ্ঠাপক সম্পাদক দেৱযানী শইকীয়া গগৈয়ে মাতৃভাষা দিৱসৰ তাৎপৰ্য আৰু দিৱসটি উদযাপনৰ সুফল সমূহৰ বিষয়ে বক্তব্য আগবঢ়ায় ৷ পিয়লি ফুকন শাখা সাহিত্য সভাৰ সহ-সম্পাদক বিজুমণি মহন্তই প্ৰতিটো বৰ্ণৰ পৰা কিদৰে সুন্দৰ কবিতা সৃষ্টি কৰিব পাৰি এই সম্পৰ্কে ছাত্ৰ-ছাত্ৰীসকলক উদ্দেশ্যি ভাষণ প্ৰদান কৰে আৰু বিভিন্ন সুৰত কবিতাসমূহ গাবলৈ শিকায় ৷

শাখাৰ সভাপতি মল্লিকা বেগমৰ মাতৃভাষাক লৈ প্ৰস্তুত কৰা এটি সুন্দৰ অভিভাষণ পাঠ কৰা হয় ৷ সমজুৱাৰ দু-আষাৰত বিদ্যালয়ৰ শিক্ষক প্ৰবোধ চেতিয়াই কয় যে আমি  এনে দিৱসসমূহ উদযাপন কৰাৰ লগতে মাতৃভাষাৰ বিদ্যালয়সমূহ জীয়াই ৰাখিবলৈ কৰ্ম আচনিও হাতত ল'ব লাগিব ৷ বহু মাতৃভাষাৰ বিদ্যালয়ৰ ইতিমধ্যে মৃত্যু হৈছে ৷ এয়া ভাষাৰ কাৰণেই অশনি সংকেত ৷

বিদ্যালয়ৰ শিক্ষক শৰৎ গগৈ,মিনু কলিতা আদি উপস্থিত থকা অনুষ্ঠানটিত ছাত্ৰ-ছাত্ৰীসকলে মাতৃভাষাক শ্ৰদ্ধা জনাই গীত,কবিতা আদিৰ সুন্দৰ অনুষ্ঠান পৰিৱেশন কৰে ৷ বিদ্যালয়ত ভৱিষ্যতেও পিয়লি ফুকন শাখা সাহিত্য সভাৰ উদ্যোগত ভাষা, সাহিত্য কেন্দ্ৰীক অনুষ্ঠান আয়োজন কৰিবলৈ প্ৰধান শিক্ষয়িত্ৰী তথা সমূহ শিক্ষক শিক্ষয়িত্ৰীয়ে আহ্বান জনায় ৷