প্ৰধানমন্ত্ৰীৰ 'মন কী বাত'ত কাজিৰঙা ৰাষ্ট্ৰীয় উদ্যানৰ প্ৰসংগ

ডিজিটেল সংবাদ, কাজিৰঙাঃ  প্ৰধানমন্ত্ৰী নৰেন্দ্ৰ মোদীয়ে আজি 'মন কী বাত' অনুষ্ঠানত বিশ্ববিখ্যাত কাজিৰঙা ৰাষ্ট্ৰীয় উদ্যানৰ বিষয়ে উল্লেখ কৰে। তেখেতে বিশেষকৈ বিপন্ন প্ৰজাতিৰ তৃণভূমি চৰাইৰ বাসস্থান আৰু তাৰ সংৰক্ষণ ক্ষেত্ৰত সদ্য সম্পন্ন হোৱা "তৃণভূমিৰ চৰাই জৰীপ"ৰ সফলতাৰ বিষয়ে আলোচনা কৰে।

প্ৰধানমন্ত্ৰীয়ে সদৰি কৰে যে, "কাজিৰঙাৰ মাজত সৰু সৰু আৰু লুকাই থকা চৰাই বিচাৰি উলিওৱা সহজ কথা নহয়। কিন্তু প্ৰযুক্তি, বিজ্ঞান আৰু উৎসৰ্গিত মনোভাৱৰ সহায়ত অসমে এনে এক গুৰুত্বপূৰ্ণ জৰীপ সফলভাৱে সম্পন্ন কৰিছে — যি সকলোৰে বাবে গৰ্বৰ বিষয়।"

উল্লেখ্য যে, শেহতীয়াকৈ কাজিৰঙা ৰাষ্ট্ৰীয় উদ্যানত প্ৰথমবাৰৰ বাবে তৃণভূমি পক্ষীৰ জৰীপ চলোৱা হৈছিল। ৰাষ্ট্ৰীয় উদ্যানখনত ৪৩ বিধ ভিন্ন প্ৰজাতিৰ তৃণভূমি পক্ষীৰ বিচৰণৰ তথ্য লাভ কৰিছিল উদ্যান কৰ্তৃপক্ষই। বিপন্ন প্ৰজাতি দুৰ্লভ প্ৰজাতিৰ পক্ষীৰ লগতে বেংগল ফ্লৰিকানৰ বিচৰণৰ তথ্য পোৱা গৈছিল জৰীপত। বিপন্ন প্ৰজাতিৰ টুকুৰা চৰাইৰ জাকো দেখিবলৈ পোৱা গৈছিল ৰাষ্ট্ৰীয় উদ্যানখনত। ৪৩ টা প্ৰজাতিৰ তৃৰ্ণভুমি চৰাইৰ উপস্থিতিৰে কাজিৰঙা দেশৰ ভিতৰতে অন্যতম বুলি প্ৰতিবেদনত প্ৰকাশ পাইছিল ৷ উত্তৰ-পূব ভাৰতৰ বন্যপ্রাণী সংৰক্ষণৰ গুৰুত্বপূর্ণ পদক্ষেপ হিচাপে কাজিৰঙা ৰাষ্ট্ৰীয় উদ্যান আৰু ব্যাঘ্র সংৰক্ষিত বনাঞ্চলে আনুষ্ঠানিকভাৱে প্রথমবাৰৰ বাবে তৃৰ্ণভুমিত বসবাস কৰা চৰাইৰ বিভাগীয় প্রতিবেদন প্রকাশ কৰিবলৈ সক্ষম হৈছে । 

ইফালে, বিভাগীয় তথ্য মতে এই প্ৰকাশিত প্ৰতিবেদনৰ বাবে তৃৰ্ণভুমি চৰাইৰ সন্দৰ্ভত চলিত বৰ্ষৰ ১৮ মাৰ্চৰ পৰা ২৫ মে'লৈকে চলোৱা এক সমীক্ষাত ব্ৰহ্মপুত্ৰ উপত্যকাৰ পূব অসম বন্যপ্ৰাণী সংমণ্ডল,বিশ্বনাথ বন সংমণ্ডল আৰু নগাঁও বন্যপ্রাণী সংমণ্ডলৰ ঘাঁহনি সমূহক সামৰা হৈছিল। এই সমীক্ষাৰ বাবে পইন্ট কাউন্ট জৰীপ আৰু একুৱাষ্টি মনিটৰিং পদ্ধতি ব্যৱহাৰ কৰিছিল গণনাকাৰী দলে ৷ উন্নত প্ৰযুক্তিৰ ব্যৱহাৰৰ প্ৰসংগও স্থান পাইছে আজিৰ মন কী বাতত ।