কিয় এনে কৰিলে চৰকাৰে? লাখ টকাৰ পেন্সন পোৱা অৱসৰী অধ্যাপকে লাভ কৰিব লাখ টকীয়া চাকৰি...

ডিজিটেল ডেস্কঃ ৰাজ্যৰ আদৰ্শ মহাবিদ্যালয়সমূহত অৱসৰী শিক্ষকক নিযুক্তি দিয়াক কেন্দ্ৰ কৰি ৰাজ্যজুৰি বিতৰ্ক অব্যাহত আছে। তাৰ মাজতে আজি এই বিষয়টোৰ সন্দৰ্ভত মুখ খুলিছে ৰাজ্যৰ শিক্ষামন্ত্ৰী ডাঃ ৰণোজ পেগুৱে।

আজি কাৰিকৰী শিক্ষা বিভাগৰ অধীনত অভিযান্ত্ৰিক মহাবিদ্যালয়সমূহৰ অধ্যক্ষসহ ৫৯ গৰাকী সহকাৰী অধ্যাপকক নিযুক্তি পত্ৰ প্ৰদানৰ এক অনুষ্ঠানত অংশগ্ৰহণ কৰাৰ অন্তত ডাঃ ৰণোজ পেগুৱে বিষয়টোৰ সন্দৰ্ভত প্ৰতিক্ৰিয়া প্ৰকাশ কৰি কয়, যে, আদৰ্শ মহাবিদ্যালয়সমূহৰ বিফলতা বিশ্লেষণৰ অন্ততহে এই সিদ্ধান্ত লোৱা হৈছে। 

গৱেষণাৰ অন্ততহে আমি এই সিদ্ধান্ত লৈছোঃ ডাঃ ৰণোজ পেগু

শিক্ষামন্ত্ৰী ডাঃ ৰণোজ পেগুৱে বিষয়টোৰ সন্দৰ্ভত আজি তেওঁৰ প্ৰতিক্ৰিয়াত কয়, আমি বহু কেইখন নতুন মহাবিদ্যালয় আৰম্ভ কৰিছো। এই মহাবিদ্যালয়সমূহত কি কি সমস্যাৰ সৃষ্টি হৈছে সেয়া আমি গৱেষণাও কৰিছো। নতুন মহাবিদ্যালয়সমূহৰ সৰহসংখ্যকেই যিদৰে গতি কৰিব লাগিছিল সেইদৰে কৰিব পৰা নাই। 

তাৰ কাৰণ বিশ্লেষণ কৰোঁতে দেখা গৈছে যে, তাত আমি ইউনিভাৰ্ছিটিৰ পৰা পাছ কৰি অহাসকলক মহাবিদ্যালয়খন পৰিচালনা কৰা দায়িত্ব দিছো। সেয়ে তাত তেওঁলোকে সফলতা প্ৰদৰ্শন কৰিব পৰা নাই। এয়া অনভিজ্ঞতাৰ কাৰণেহে, অন্য কোনো কাৰণ নাই। 

তেওঁ আৰু কয়, অৱসৰপ্ৰাপ্ত অধ্যাপক নিযুক্তিৰ ক্ষেত্ৰতো থাকিব বয়সৰ সীমা। ৬৫ বছৰলৈকে তেওঁলোকে কৰ্তব্যত নিয়োজিত হৈ থাকিব। ডাঃ পেগুৱে কয়, এজন ব্যক্তিয়ে ৬০ বছৰত অৱসৰ গ্ৰহণ কৰে। তাৰ এবছৰ দুবছৰ পিছত যদি মহাবিদ্যালয় এখনত তেওঁলোকে যোগদান কৰে তেন্তে ৩ বছৰৰ পৰা চাৰি বছৰ চাকৰি কৰিব। 

৫০ শতাংশ নতুন ৫০ শতাংশ অৱসৰপ্ৰাপ্ত অধ্যাপকক নিযুক্তি

মন্ত্ৰী ৰণোজ পেগুৱে কয়, অৱসৰপ্ৰাপ্ত অধ্যাপকসকলক ৩/৪ বছৰৰ বাবেহে নিযুক্তি প্ৰদান কৰা হ'ব। সেই ৩/৪ বছৰৰ সময়খিনি অতি জটিল। কাৰণ সেই সময়খিনি এখন মহাবিদ্যালয়ৰ বাবে আৰম্ভণিৰ পৰ্যায়।

আৰম্ভণিত তেখেতৰ ২৫ বছৰীয়া শিক্ষকতাৰ অভিজ্ঞতাৰে মহাবিদ্যালয়খন পৰিচালনাত নেতৃত্ব দিব। তেওঁ এনে যুক্তিৰেই আদৰ্শ মহাবিদ্যালয়সমূহত শিক্ষকক নিযুক্তিৰ ক্ষেত্ৰত ৫০ শতাংশ নতুন আৰু ৫০ শতাংশ অৱসৰপ্ৰাপ্ত অধ্যাপকক নিযুক্তি দিয়াৰ সিদ্ধান্তৰ কথা উল্লেখ কৰিছে। 

লাহৰীঘাট চৰকাৰী আদৰ্শ মহাবিদ্যালয়ৰ বিজ্ঞাপনৰ পাছতে ৰাজ্যজুৰি ধুমুহা

শেহতীয়াকৈ উচ্চ শিক্ষা সঞ্চালকালয়ৰ এক নিৰ্দেশনা অনুসৰি মৰিগাওঁ জিলাৰ লাহৰীঘাটৰ চৰকাৰী আদৰ্শ ডিগ্ৰী মহাবিদ্যালয়ৰ ১০ টাকৈ অধ্যাপকৰ পদৰ বাবে বিজ্ঞাপন প্ৰকাশ কৰিছিল। এই বিজ্ঞাপন অনুসৰি নিৰ্ধাৰিত পদ কেইটাত মাহে ১ লাখ টকা দৰমহাৰে অৱসৰপ্ৰাপ্ত শিক্ষকক নিযুক্তি দিয়াৰ বাবে প্ৰস্তুতি চলোৱা হৈছে। 

ৰাজ্য চৰকাৰৰ শিক্ষা বিভাগৰ এই সিদ্ধান্তই ৰাজ্যৰ হাজাৰ হাজাৰ উচ্চ শিক্ষিত নিবনুৱাৰ মূৰত একপ্ৰকাৰে মাধমাৰ সোধাইছে। বিশেষকৈ যিসকলে উচ্চ শিক্ষিতই অধ্যাপক হিচাপে নিযুক্তি লাভৰ বাবেই প্ৰস্তুতি চলাই প্ৰয়োজনীয় নেট-শ্লেট, পি এইছ ডি ডিগ্ৰীৰে নিজকে সাজু কৰিছে তেওঁলোকে ৰাজ্য চৰকাৰৰ এই সিদ্ধান্তক মুকলিকৈ বিৰোধিতা কৰিছে। 

কেৱল তেওঁলোকেই যে বিৰোধিতা কৰিছে তেনে নহয়, ৰাজ্যৰ শৈক্ষিক মহলেও নিবনুৱাৰে ভাৰাক্ৰান্ত ৰাজ্যত চৰকাৰৰ এনে সিদ্ধান্তক সহজে লোৱা নাই। ইতিমধ্যে বিষয়টোক লৈ প্ৰতিক্ৰিয়া তীব্ৰতৰ হৈ উঠিছে। 

নিবনুৱাবিৰোধী চৰকাৰৰ এই সিদ্ধান্ত ইতিমধ্যে চূড়ান্ত কাণ্ডজ্ঞানহীনতা-দায়িত্বজ্ঞানহীনতাৰ পৰিচয় হিচাপে চিহ্নীত হৈছে বুলিও দাবী কৰিছে ভিন্ন জনে। চৰকাৰৰ এনে সিদ্ধান্তই যে, শিক্ষিত যুৱক-যুৱতীক চৰম হতাশাৰ গৰাহলৈ ঠেলি দিব সেয়া নিশ্চিত। 

মন কৰিবলগীয়া যে, লাখ লাখ টকা দৰমহা লাভৰ অন্তত অৱসৰ গ্ৰহণ কৰা শিক্ষকসকলক অভিজ্ঞতাৰ দোহাই দি পুনৰ লাখটকীয়া চাকৰি প্ৰদান কৰি নতুন চামক বঞ্চনাৰ যি অদ্ভুত নীতি, তাক যিকোনো প্ৰকাৰে প্রতিহত কৰাৰ হুংকাৰ দিছে চাকৰি প্ৰাৰ্থীসকলে।

সকলো আশ্বাস অসাৰ কৰি উচ্চ শিক্ষিত নিবনুৱাক চৰকাৰৰ মাধমাৰ! 

এগৰাকী কলেজ শিক্ষকে অৱসৰ গ্ৰহণৰ পিচত এক লাখৰো ওপৰত পেন্সন লাভ কৰে। তেনেস্থলত পুনৰ ৫ বছৰৰ বাবে মাহে ১ লাখ টকাৰ দৰমহাৰে তেওঁলোকক নিযুক্তি প্ৰদানৰ এই নীতিয়ে উচ্চশিক্ষিত নিবনুৱা এজনক যে প্রায় চিৰদিনৰ বাবেই বঞ্চিত কৰিব সেয়াও নিশ্চিত। 

উল্লেখ্য যে, ৰাজ্যৰ আদর্শ মহাবিদ্যালয়সমূহত অৱসৰপ্ৰাপ্ত অধ্যাপকক নিযুক্তিৰ বাবে চৰকাৰে সিদ্ধান্ত গ্রহণ কৰি কাৰ্যালয় স্মাৰক প্ৰকাশ কৰাৰ পিছতে ৰাজ্যজুৰি তীব্র প্রতিক্রিয়াব সৃষ্টি হৈছিল। এই সিদ্ধান্তৰ প্ৰতিবাদ কৰিছিল বিভিন্ন দল-সংগঠনৰ লগতে গৱেষক তথা উচ্চ শিক্ষিত ছাত্র-ছাত্রীসকলে।

ৰাজ্যজুৰি সৃষ্টি হোৱা তেনে প্ৰতিক্ৰিয়াৰ পিছতে স্বয়ং মুখ্যমন্ত্রী আৰু শিক্ষা মন্ত্ৰীয়ে চৰকাৰৰ এই সিদ্ধান্ত পৰিহাৰ কৰা হ'ব বুলি আশ্বাস দিছিল। কিন্তু সকলো আশ্বাস-প্রতিশ্রুতিক নস্যাৎ কৰি যোৱা ১৮ জুলাইত উচ্চ শিক্ষা সঞ্চালকালয়ৰ যুটীয়া সঞ্চালকে মঙলদৈ, চিৰাং, লাহৰীঘাট আৰু বৰছলাৰ আদৰ্শ ডিগ্রী মহাবিদ্যালয়ৰ প্রতিটো বিভাগত দুজনকৈ অৱসৰী শিক্ষকক নিযুক্তিৰ ব্যৱস্থা কৰিবলৈ নিৰ্দেশ জাৰি কৰে। 

উচ্চ শিক্ষাৰ যুটীয়া সঞ্চালক প্রসন্ন বৰাই জাৰি কৰা এই নিৰ্দেশনাত কোৱা হৈছিল সাক্ষাৎকাৰৰ জৰিয়তে অৱসৰী শিক্ষকক নিযুক্তি প্রদান কৰি অহা ১ আগষ্টৰ পৰা যাতে পাঠদান কৰিব পৰা যায়, তাৰ ব্যৱস্থা কৰিব লাগে। সেই নিৰ্দেশৰ ভিত্তিতে ২০ জুলাইত লাহৰীঘাট চৰকাৰী আদর্শ ডিগ্রী মহাবিদ্যালয়ে ৫ টা বিভাগত দুজনকৈ মুঠ ১০ গৰাকী অৱসৰপ্ৰাপ্ত শিক্ষকক নিযুক্তিৰ বাবে বিজ্ঞাপন প্ৰকাশে কৰে। 

৬৫ বছৰ বয়সৰ তলৰ অৱসৰী শিক্ষকে মাহে ১ লাখ টকা দৰমহাৰে এই পদত চাকৰি কৰিব পাৰিব বুলি উক্ত বিজ্ঞাপনত উল্লেখ কৰা হয়।

নতুনকৈ নিযুক্তিপ্ৰাপ্তৰ ভৱিষ্যতক লৈয়ো প্ৰশ্ন

ইফালে এই মহাবিদ্যালয়সমূহত যিসকল শিক্ষকক নিযুক্তি প্ৰদান কৰা হ’ব তেওঁলোকৰ নিযুক্তিৰ পিছতো চাকৰিৰ স্থায়িত্বক লৈয়ো প্ৰশ্ন উত্থাপন হৈছে। 

কিয়নো উচ্চ শিক্ষা বিভাগে প্রকাশ কৰা কাৰ্যালয় স্মাৰক অনুসৰিয়েই আদর্শ মহাবিদ্যালয়সমূহত ৫০ শতাংশ অৱসৰী আৰু ৫০ শতাংশ নতুন নিযুক্ত শিক্ষকক মকৰল কৰা হ'ব। মহাবিদ্যালয়খনৰ কোনো এটা বিভাগত ৩ টা পদ থাকে তেন্তে তাৰে দুটা পদত অৱসৰী শিক্ষকক নিযুক্তি দিয়া হ'ব। 

নতুনকৈ নিযুক্তি লাভ কৰা শিক্ষকে তিনি বছৰৰ বাবে মাহে দৰমহা হিচাপে ৫০ হেজাৰ টকা লাভ কৰিব। তিনি বছৰ পাছত মহাবিদ্যালয় পৰিচালনা সমিতিয়ে নতুন শিক্ষকজনৰ চাকৰি নিয়মীয়া কৰিব নে নাই,  সেই সন্দৰ্ভত সিদ্ধান্ত গ্রহণ কৰিব। 

এই ব্যৱস্থাই যে এজন উচ্চ শিক্ষিতৰ ভবিষ্যতক যে অন্ধকাৰৰ মাজলৈ ঠেলি দিব বুলি প্রতিক্রিয়াৰ সৃষ্টি হৈ আহিছে। ইতিমধ্যে অৱসৰপ্ৰাপ্ত অধ্যাপকৰ নিযুক্তিৰ বিজ্ঞাপন প্ৰকাশ হৈছে যদিও অবশ্যে নতুনকৈ মাহে ৫০ হেজাৰ টকা দৰমহাত নিযুক্তি লাভ কৰিবলগীয়া প্রার্থীসকলৰ বিজ্ঞাপন এতিয়াও প্রকাশ হোৱা নাই।

মুখ্যমন্ত্ৰীয়ে দিলে তৰল প্ৰতিক্ৰিয়া

ইফালে এই বিষয়টোৰ সন্দৰ্ভত প্ৰতিক্ৰিয়া প্ৰকাশ কৰি ৰাজ্যৰ মুখ্যমন্ত্ৰী ড০ হিমন্ত বিশ্ব শৰ্মাই অতি তৰল যুক্তিৰে তেওঁৰ প্ৰতিক্ৰিয়া প্ৰকাশ কৰিছে। তেওঁ সাংবাদিকৰ আগত কয় যে, এখন মহাবিদ্যালয়ত যদি অভিজ্ঞ শিক্ষক নাথাকে, তেতিয়া কলেজখনলৈ শিক্ষার্থী নাহে। আমি যিকেইখন আদর্শ মহাবিদ্যালয় স্থাপন কৰিছো, এতিয়া প্রায়কেইখন বন্ধ কৰাৰ পৰিবেশলৈ আহিছে। কাৰণ ছাত্র-ছাত্রী নাই।

কিয় ছাত্র-ছাত্রী নাই বুলি সুধিলে কোৱা হয় যে অভিজ্ঞ শিক্ষক নাই। সেয়ে অভিজ্ঞ আৰু নতুন শিক্ষক আধা-আধা কৰি দিছো। অভিজ্ঞও থাকিব, নতুনো থাকিব। অকল নতুন প্রজন্মক চাকৰি দিলে পিছৰ প্রজন্মটো কলেজলৈ পঢ়িবলৈ নাহে। অভিজ্ঞতাৰ মূল্য সমাজত সদায়েই আছে। নতুন আৰু পুৰণিৰ সংমিশ্রণতহে সমাজ গঢ়ি উঠে।' 

মুখ্যমন্ত্ৰীৰ এই তৰল মন্তব্যৰ পিছতে এতিয়া আন এক বিষয়ো চৰ্চাৰ মাজলৈ আহিছে। সেই অনুসৰি প্ৰশ্ন উত্থাপন হৈছে যে, নতুনকৈ স্থাপন কৰা আদর্শ মহাবিদ্যালয়সমূহৰ প্রতিটো বিভাগত কিয় এজনকৈ সহযোগী অধ্যাপক নিযুক্তিৰ ব্যৱস্থা কৰা নহ'ল? এজন সহযোগী অধ্যাপক আৰু দুজন সহকাৰী অধ্যাপকেৰে কিয় প্রতি বিভাগ সজোৱা নহ'ল? 

ইফালে ৰাজ্যৰ মহাবিদ্যালয়সমূহত চৰকাৰে প্রায় ১,৭০০ সহকাৰী অধ্যাপকক সহযোগী অধ্যাপকলৈ পদোন্নতি নিদিয়াকৈ তেওঁলোকক বঞ্চিত কৰি ৰাখিছে। সেইসকলকেই যদি পদোন্নতিৰে আদর্শ মহাবিদ্যালয়লৈ বদলি কৰিলে হয় তেন্তে একে দৰমহাতে সকলো সমস্যা সমাধান হোৱাৰ সম্ভাবনা থাকিলহেঁতেন।