ননৈত অভিনেতা - নাট্যকাৰ প্ৰশান্ত কুমাৰ নাথৰ স্মৃতিচাৰণ অনুষ্ঠান

ডিজিটেল সংবাদ, বঢ়মপুৰ : নগাঁও জিলাৰ ননৈ উচ্চতৰ মাধ্যমিক বিদ্যালয়ত দেওবাৰে বৃহত্তৰ ননৈ অঞ্চলৰ সদ্যপ্ৰয়াত অতি প্ৰতিভাৱান অভিনেতা, নাট পৰিচালক ,সংগঠক আৰু শিক্ষক প্ৰশান্ত কুমাৰ নাথৰ স্মৃতিচাৰণ সভা অনুষ্ঠিত কৰা হয় । বৃহত্তৰ ননৈ অঞ্চলৰ নাট্যকৰ্মী আৰু তেওঁৰ শুভাকাংক্ষীসকলৰ দ্বাৰা অনুষ্ঠিত আজিৰ সভাৰ প্ৰাকক্ষণত প্ৰয়াত নাথৰ প্রতিচ্ছবিৰ সন্মুখত বন্তি প্ৰজ্বলন, মাল্যপৰ্ণ আৰু পুস্পাঞ্জলি প্ৰদান কৰি নাট্যকৰ্মীজনলৈ শ্ৰদ্ধাঞ্জলি জ্ঞাপন কৰা হয় ।

অঞ্চলটোৰ বিশিষ্ট নাট্যকৰ্মী তথা শিক্ষক পুলক গোস্বামীয়ে আঁত ধৰা আজিৰ স্মৃতিচাৰণ সভাখনিৰ আৰম্ভণিতে বৃহত্তৰ ননৈ অঞ্চলৰ বিশিষ্ট সমাজকৰ্মী, নাট্যকাৰ তথা অৱসৰপ্ৰাপ্ত শিক্ষক সুশীল কুমাৰ বৰুৱা, ননৈ উচ্চতৰ মাধ্যমিক বিদ্যালয়ৰ প্ৰাক্তন অধ্যক্ষা দময়ন্তী দাস আৰু  বৃহত্তৰ ননৈ অঞ্চলৰ বিশিষ্ট শিল্পী, নাট্যকাৰ তথা অৱসৰপ্ৰাপ্ত শিক্ষক প্ৰফুল্ল বৰাই অতি আবেগিক হৈ  প্ৰয়াত নাথৰ বিভিন্ন নাটকত কৰা বলিষ্ঠ অভিনয়ৰ বিষয়ে ৰোমন্থন কৰে  ।

আজিৰ সভাত গুৱাহাটীকে ধৰি নগাঁও জিলাৰ বিভিন্ন প্ৰান্তৰ পৰা অহা নাট্যকৰ্মীসকল ক্ৰমে প্ৰদীপ বৰা , অজিত বৰা, পুলক বৰা, প্ৰাঞ্জল শইকীয়া , ৰাজু ভূঞা, দিগন্ত বৰুৱা, বিদ্যুৎ নাথ , পুলিন ভট্টাচাৰ্য্য, মহেশ বৰা , অজিত বৰা আদিকে প্ৰমুখ্যে কৰি নাট্য জগতৰ লগত জড়িত বহু গন্য-মান্য ব্যক্তিয়ে প্ৰশান্ত কুমাৰ নাথৰ অভিনয় জগতত তেওঁৰ অৱদান আৰু সংলাপবোৰ সুঁৱৰি আবেগিক হৈ পৰে। লগতে বিশেষকৈ কংসবধ নাটকৰ "মদাহী" চৰিত্ৰ , আকৌ তেজৰ জুই নাটকৰ " ৰমানন্দ" চৰিত্ৰ আৰু শকুনিৰ প্ৰতিশোধ নাটকত ৰূপায়ন কৰা "কৰ্ণ" চৰিত্ৰৰ কথা ৰোমন্থন কৰি প্ৰশান্ত কুমাৰ নাথ আমাৰ মাজৰ পৰা হেৰাই গ'লেও তেওঁৰ স্মৃতি আমি জীয়াই ৰাখিব লাগিব বুলি কয়।

সভাৰ আৰম্ভণিতে আজি নাথৰ আত্মাৰ সদগতিৰ কামনাৰ্থে উপস্থিত সকলোৱে এক মিনিট মৌন প্ৰাৰ্থনা জনায় । সভাৰ শেষত শ্রদ্ধার্ঘ্য পত্ৰ পাঠ কৰে নগাঁৱৰ বিশিষ্ট নাট্যকাৰ - পৰিচালক জ্যোতি প্ৰসাদ ভূঞাই ।