এছ পি এছ গুৱাহাটী ৰেটিং দবা প্ৰতিযোগিতাত অগ্ৰগতি মায়ংক চক্ৰৱৰ্তীৰ....

ডিজিটেল ডেস্কঃ এছ পি এছ গুৱাহাটী ইণ্ডিয়া অ’পেন ইণ্টাৰনেশ্যনেল ৰেটিং দবা প্ৰতিযোগিতাত বিজয়ৰ ধাৰা অব্যাহত ৰাখিছে আয়োজক গুৱাহাটীৰ চাউথ পইণ্ট স্কুলৰ ছাত্ৰ মায়ংক চক্ৰৱৰ্তীয়ে । চাৰিটা ৰাউণ্ডৰ অন্তত মায়ংকে ৪/৪ ৰ ত্ৰুটিহীন স্ক’ৰ কৰিছে । লগতে ১০ ৰাউণ্ডৰ ছুইছ লীগ ইভেণ্টত আন ১১ জন খেলুৱৈৰ সৈতে অগ্ৰগতি লাভ কৰিছে মায়ংকে ।

উল্লেখ কৰাৰ প্ৰয়োজন যে, তৃতীয় ৰাউণ্ডত এক অভাৱনীয় টুইটৰ সৃষ্টি হয় যেতিয়া মণিপুৰৰ অষ্টম ছিড ৱাই ধনবীৰ সিঙে প্ৰতিদ্বন্দ্বিতামূলক মেচত যুৱক আৰাভ দাসৰ হাতত পৰাজয়ৰ সন্মুখীন হয় । উল্লেখ্যে যে তৃতীয় দিনৰ খেল উদ্ধোধন কৰে জ্যেষ্ঠ ক্ৰীড়া সাংবাদিক ইমতিয়াজ আহমেদে বিশিষ্ট দবা সংগঠক নয়ন দত্ত আৰু আৰক্ষী উপ-আয়ুক্ত তথা অসম দবা ক্লাৱৰ কাৰ্যকৰী সভাপতি অমিতাভ বসুমতাৰীৰ উপস্থিতিত ।

উল্লেখযোগ্য যে পঞ্চম ৰাইণ্ডত মায়ংকৰ মুখামুখি হ’ব অসমৰ আন এজন আশাব্যঞ্জক খেলুৱৈ গুৱাহাটীৰ তন্ময় ৰাজবংশীৰ । তেওঁৰ বিৰুদ্ধে মায়ংক কঠিন প্ৰত্যাহ্বানৰ সন্মুখীন হ’ব বুলি আশা কৰা হৈছে ।

ছয় দিনীয়া এই মেগা ইভেণ্টত দেশৰ বিভিন্ন প্ৰান্তৰ পৰা মুঠ ৩৯৬ গৰাকী খেলুৱৈয়ে অংশগ্ৰহণ কৰিছে । মুঠ ৫০ লাখ টকাৰ পুৰস্কাৰ পুঁজিৰ কথাই সকলোকে আকৰ্ষণ কৰিছে ।

অসমৰ প্ৰথমজন আন্তৰাষ্ট্ৰীয় মধ্যস্থতাকাৰী বিশ্বজিত ভৰদ্বাজ, মণিমালা সিনহা, এফ আই ডি ই মধ্যস্থতাকাৰী লক্ষ্য জ্যোতি শইকীয়া, এফ এ ৰবিকান্ত তিৱাৰী, এফ এ আচাৰ্য লীলা প্ৰসাদকে ধৰি এটা দলৰ সহযোগত প্ৰতিযোগিতাখন অনুষ্ঠিত হয় ।

প্ৰতিযগিতাখনত প্ৰতিভাৰ ৰোমাঞ্চকৰ প্ৰদৰ্শন অব্যাহত আছে । দেশৰ বিভিন্ন প্ৰান্তৰ শীৰ্ষ খেলুৱৈসকলে প্ৰতিযোগিতামূলক ক্ষেত্ৰখনত আধিপত্যৰ বাবে যুঁজ দি আহিছে ।