হাটশিঙিমাৰীৰ খাৰুৱাবান্ধা জনতা উচ্চতৰ মাধ্যমিক বিদ্যালয়ত চুৰিকাণ্ড

ডিজিটেল সংবাদ, দক্ষিণ শালমাৰা : দক্ষিণ শালমাৰা-মানকাচৰ জিলাৰ সদৰ হাটশিঙিমাৰীৰ খাৰুৱাবান্ধা জনতা উচ্চতৰ মাধ্যমিক বিদ্যালয়ত নিশা চোৰে কেইবালক্ষাধিক টকাৰ কম্পিউটাৰ, লেপটপ চুৰ কৰি নিয়ে। বিগত এটা সপ্তাহ ধৰি বিদ্যালয়খনত চিচি কেমেৰা বিকল হৈ থকাৰ সুযোগ লৈ চোৰে কম্পিউটাৰ ৰূমৰ দৰ্জাৰ ভাঙি ভিতৰত প্ৰৱেশ কৰি ২ টা লেপটপ, ২ চিপিইউ, ৪ টা মনিটৰ আৰু এটা ইউপিএছ চুৰি কৰে। 

ঘটনাক লৈ বিদ্যালয় কৰ্তৃপক্ষই খাৰুৱাবান্ধা আৰক্ষী চকীত এজাহাৰ দাখিল কৰাত আৰক্ষীৰ দল ঘটনাস্থলীত উপস্থিত হৈ ঘটনাৰ তদন্ত আৰম্ভ কৰিছে। লক্ষ্যণীয় যে, বিগত কিছুদিন ধৰি জিলাৰ সদৰৰ বিভিন্ন এলেকাত চুৰিকাণ্ড বৃদ্ধি পাইছে। বিদ্যালয়খনৰ বিভিন্ন ডাটা জমা হৈ থকা লেপটপ চুৰি হোৱাত অধ্যক্ষ ওৱালিউল ইছলাম চিন্তিত হৈ পৰিছে।