ডিজিটেল সংবাদ, কাজিৰঙা : পৰ্যটনৰ শেষৰ সময়ছোৱাত কাজিৰঙালৈ সোঁত বৈছে দেশী বিদেশী পৰ্যটকৰ ৷ জীপ ছাফাৰী, হাতী ছাফাৰীৰ সমানেই আকৰ্ষণ লাভ কৰিছে কাজিৰঙাৰ নদী পৰ্যটনে ৷ কাজিৰঙা ৰাষ্ট্ৰীয় উদ্যানৰ উত্তৰ দিশৰ মহাবাহু ব্ৰহ্মপুত্ৰৰ নৈসৰ্গিক দৃশ্যৰ মাজত ৰিভাৰ ডলফিন বা শিহুৰ বিচৰণ পৰ্যটকৰ বাবে হৈ পৰিছে আকৰ্ষণীয় ৷
পানীৰ মাজত ৰিভাৰ ডলফিনবোৰৰ লুকাভাকুৰ দৃশ্য সাধাৰণতে দেখিবলৈ পোৱা যাই ভোমোৰাগুৰি আৰু ব্ৰহ্মপুত্ৰৰ ধনশিৰি নদীৰ সংযোগস্থলত ৷ ব্ৰহ্মপুত্ৰৰ কাজিৰঙা ৰাষ্ট্ৰীয় উদ্যান সংলগ্ন এই এলেকাত তিনিটি বছৰৰ পূৰ্বে কাজিৰঙা ৰাষ্ট্ৰীয় উদ্যান কৰ্তৃপক্ষই জিলা প্ৰশাসনৰ সহযোগত আৰম্ভ কৰা নদী পৰ্যটনৰ বিশেষ সমল এই ৰিভাৰ ডলফিন ৷
কাজিৰঙা ৰাষ্ট্ৰীয় উদ্যান কৰ্তৃপক্ষৰ উদ্যোগত আৰম্ভ কৰা নদী পৰ্যটনত পৰ্যটকে স্পীড ব’টত উঠি মহাবাহুৰ নৈসৰ্গিক দৃশ্যৰ লগতে উপভোগ কৰিব পাৰে শিহুৰ লুকাভাকুৰ মনোমোহা দৃশ্য ৷ জীপ ছাফাৰী, হাতী ছাফাৰীৰ পাছত পৰ্যটকৰ আকৰ্ষণৰ কেন্দ্ৰবিন্দু হৈ পৰিছে নাও ছাফাৰী ৷
