জখলাবন্ধাৰ মাজেৰে নাযায় ফ'ৰলেনঃ অসন্তুষ্ট ৰাইজ...

জখলাবন্ধাৰ মাজেৰে  নাযায় ফ'ৰলেনঃ অসন্তুষ্ট ৰাইজ...

ডিজিটেল সংবাদ,কলিয়াবৰঃ একাংশ ক্ষমতাশালী ৰাজনৈতিক নেতাৰ স্বাৰ্থসিদ্ধি তথা কূটিল অভিসন্ধিৰ বাৱেই সম্প্ৰতি চাৰি শৰনীয়া ৰাষ্ট্ৰীয় ঘাইপথ সম্প্ৰসাৰণৰ দিশ সলনি হোৱা বিষয়টোৱে ৰাইজক ক্ষুব্ধ কৰি তুলিছে। কলিয়াবৰৰ জখলাবন্ধা চহৰৰ মাজেদি ফৰলেন নোযোৱা বুলি নিশ্চিত হোৱাত এতিয়া ক্ষুব্ধহৈ পৰিছে কুঁৱৰীটোল, হাটবৰ আৰু জখলাবন্ধা বাসী ৰাইজ।

জখলাবন্ধা চহৰ খন এলাগী হোৱাৰ লগে লগে ইয়াৰ ব্যৱসায়ী সকলো নিগমে মৰিব বুলি এতিয়া আতংকিত হৈছে সংশ্লিষ্ট ক্ষুদ্ৰ বৃহৎ ব্যৱসায়ী সকল। উল্লেখযোগ্য যে, কলিয়াবৰ তিনিআলিৰ পৰা জখলাবন্ধা হৈ নুমলিগড়লৈকে চাৰি লেন যুক্ত ৭১৫ নং ৰাষ্ট্ৰীয় ঘাইপথ নোযোৱাটো নিশ্চিত হোৱাৰ পূৰ্বে বিগত বছৰৰ ২৩ জুনত জিলা উপায়ুক্তৰ নিৰ্দেশ মৰ্মে হাটবৰত এখনি ৰাজহুৱা শুনানিৰ আয়োজন কৰিছিল।

য'ত সভাত অংশগ্ৰহন কৰা এশ শতাংশ নাগৰিকে চাৰিলেন যুক্ত পথটো জখলাবন্ধা চহৰৰ মাজেৰে হ'ব লাগে বুলি ৰাজহুৱা ভাৱে দাবী উত্থাপন কৰি সভা গৃহ উত্তাল কৰি তুলিছিল। সেই সভাত অংশগ্ৰহন কৰা স্থানীয় বিধায়ক তথা ৰাজ্য চৰকাৰৰ কেবিনেট মন্ত্ৰী কেশৱ মহন্তই ও সভাত উদাত্ত কন্ঠৰে ৰাইজৰ ৰাজহুৱা দাবীক চৰকাৰে মানি ল'ব বুলি প্ৰতিশ্ৰুতি দিয়াৰ পাছত এতিয়া চাৰিলেন যুক্ত পথটো জখলাবন্ধা চহৰৰ মাজেৰে নেযোৱাতো নিশ্চিত হোৱাত ৰাইজে তীব্ৰ ক্ষোভ প্ৰকাশ কৰা শুনা গ'ল।

স্থানীয় একাংশ ৰাইজে কয় যে, কেশৱ মহন্তৰ দৰে এজন জ্যেষ্ঠ কেবিনেট মন্ত্ৰীয়ে দিয়া প্ৰতিশ্ৰুতিক ৰাষ্ট্ৰীয় ঘাই পথ নিৰ্মাণ প্ৰাধিকৰণে কিয় অৱহেলা কৰিলে ? এগৰাকী কেবিনেট মন্ত্ৰীৰ কথাৰ মূল্য নাই নেকি বুলিও তেওঁলোকে প্ৰশ্ন কৰি কয় যে, সভাত উপস্থিত থকা নগাঁও জিলাৰ উপায়ুক্ত নৰেন্দ্ৰ শ্বাহেও ৰাজহুৱা দাবীক চৰকাৰে মানি ল'ব বুলি ঘোষণা কৰিছিল।

যদি মুখ্যমন্ত্ৰীৰ কথাতে এক ৰাতিতে চাৰিলেন যুক্ত পথটোৰ নক্সা সলনি কৰিব পাৰে তেনেহলে হাটবৰত ৰাজহুৱা শুনানিৰ নাটক কিয় কৰিব লগা হল বুলিও চৰকাৰক প্ৰশ্ন উত্থাপন কৰিছে । ইপিনে

বিগত চাৰিদিনৰ পৰা সংশ্লিষ্ট কৰ্তৃপক্ষই বাৰিষা-বৰষুনকো আওকান কৰি যুদ্ধকালীন ক্ষীপ্ৰতাৰে চাৰি লেন যুক্ত পথৰ বাবে মাটি জোখ -মাখ কৰা কাম ইতিমধ্যে আৰম্ভ কৰিছে ৷ কলিয়াবৰ তিনিআলিৰ পৰা সৌভাগ্য মাধৱ দেৱালয়ৰ কাষেৰে দাৰিগজি হৈ দলগাওঁ বৰপেটাৰ সমীপৱৰ্তী এলেকাৰ মাজৰে চিকনি শিল খোৰোং মন্দিৰৰ সন্মুখেদি আৰু লক্ষী মন্দিৰৰ পাছফালে গৈ ৰাঙলুৰ কাষেৰে চাৰিলেন যুক্ত ৭১৫ নং ৰাষ্ট্ৰীয় ঘাইপথৰ জৰীপ ইতিমধ্যে খৰতকীয়া কৰা পৰিলক্ষিত হৈছে।

স্থানীয় ৰাইজৰ অভিযোগঃ পুৰণি ৰাষ্ট্ৰীয় ঘাইপথ এটা থকাৰ পাছত ফৰলেন নিৰ্মাণৰ অচিলাৰে হাজাৰ হাজাৰ কৃষিভূমি আৰু জলাশয় ধ্বংস কৰাৰ যুক্তি ক'ত? যি সময়ত এই খন চৰকাৰেই জলাশয় আৰু কৃষিভূমি উন্নয়নৰ বাবে কোটি কোটি ধন ব্যয় কৰিব লাগিছে আকৌ এই খন চৰকাৰেই অসমীয়াৰ পথাৰ ধ্বংস কৰিবলৈ উঠি পৰি লগা কাৰ্য‌ক ৰাইজে সহজ ভাৱে ল'ব পৰা নাই। প্ৰকৃতাৰ্থত একাংশ ক্ষমতাশালী ৰাজনৈতিক নেতাই ক্ৰয় কৰা মাটিৰ সন্মুখেৰে চাৰিশৰনীয়া পথটি লৈ যোৱাৰ ৱাবে চলিছে কুজকাৱাজ ৷

এই জৰীপৰ মতেদি যদি চাৰি লেন যুক্ত পথ নিৰ্মাণ চুড়ান্ত হয় জখলাবন্ধা চহৰ এৰাবাৰীলৈ পৰ্যবসিত হোৱাটো নিশ্চিত। তাহানিৰ লিমকা বুক অফ ৱৰ্ল্ড ৰেকৰ্ডত স্থান পোৱা কলিয়াবৰৰ ব্যৱসায়িক চহৰ জখলাবন্ধাক লৈ এতিয়া চিন্তিত হৈ পৰিছে বিভিন্ন দল সংগঠন আৰু কলিয়াবৰৰ সচেতন ৰাইজ। জখলাবন্ধা বাসী ৰাইজে বিষয়টো পুনৰ বিবেচনাৰ বাবে মুখ্যমন্ত্ৰী ড০ হিমন্ত বিশ্ব শৰ্মাক আহ্বান জনাইছে। ইয়াৰ বিপৰীতে কলিয়াবৰ বাসী ৰাইজে এক গণ আন্দোলন গঢ়ি তুলিবলৈ বাধ্য হ'ব বুলি মুখ্যমন্ত্ৰীক সকয়নী দিছে।

Related Stories

No stories found.
X
Code:
logo
Asomiya Pratidin
www.asomiyapratidin.in