দেওবাৰৰ পৰা আৰম্ভ হ'ব আন্তঃ ষষ্ঠ অনুসূচীত স্বায়ত্ব পৰিষদ ফুটবল প্ৰিমিয়াৰ লীগ -২০২২...

ডিজিটেল সংবাদ চিৰাংঃ দেওবাৰৰ পৰা ওদালগুৰিৰ ডিমাকুছিত অনুষ্ঠিত হ'ব উত্তৰ পূৰ্বাঞ্চলৰ দহটা ষষ্ঠ অনুসূচীত স্বায়ত্ব শাসিত পৰিষদৰ অংশগ্ৰহণেৰে আন্তঃ ষষ্ঠ অনুসূচীত স্বায়ত্ব পৰিষদ ফুটবল প্ৰিমিয়াৰ লীগ -২০২২। সেয়ে আজি প্ৰতিযোগিতাখনৰ আয়োজক দল বড়োলেণ্ড ফুটবল দলে দলটোৰ জাৰ্ছী আনুষ্ঠানিক ভাৱে মুকলি কৰে।

শনিবাৰে চিৰাং জিলা সদৰ কাজলগাঁওস্থিত বনবিভাগৰ দুৱাৰ্চ অতিথিশালাত এক সংবাদ মেলৰ জৰিয়তে বিটিচি প্ৰধান প্ৰমোদ বড়োৰ অ এচ ডি ড০ ছাংগ্ৰাং ব্ৰহ্ম, বড়োলেণ্ড ফুটবল দলৰ মুখ্য প্ৰশিক্ষক বিক্ৰান্ত শৰ্মা, অধিনায়ক দিদৌম হাজোৱাৰীসহ অন্যান্য বিষয়ববীয়াসকলৰ উপস্থিতিত বড়োলেণ্ড ফুটবল দলৰ হালধীয়া আৰু নীলা ৰঙৰ দুটাকৈ অফিচিয়েল জাৰ্ছী মুকলি কৰে ।

প্ৰথমবাৰৰ বাবে বি টি চি প্ৰশাসনৰ উদ্যোগত অনুষ্ঠিত হ'বলগীয়া উত্তৰ পূৰ্বাঞ্চলৰ দহটা ষষ্ঠ অনুসূচীত স্বায়ত্ব শাসিত পৰিষদৰ দলে অংশগ্ৰহণ কৰিবলগীয়া আন্তঃ ষষ্ঠ অনুসূচীত স্বায়ত্ব পৰিষদ ফুটবল প্ৰিমিয়াৰ লীগ -২০২২ ত বড়োলেণ্ড ফুটবল দলক সমৰ্থন আগবঢ়াবলৈ ক্ৰীড়াপ্ৰেমী ৰাইজক আহ্বান জনায় ব্ৰহ্মই ।