বটদ্ৰৱা শ্ৰীশ্ৰী শংকৰদেৱ মহাবিদ্যালয়ত ছাত্ৰ-ছাত্ৰীৰ মাজত অভিনন্দন কাৰ্যক্ৰম আৰম্ভ

ডিজিটেল সংবাদ, বটদ্ৰৱাঃ নতুন ছাত্ৰ-ছাত্ৰীসকলক কলেজীয়া জীৱন আৰু কলেজ প্ৰতিষ্ঠানৰ পৰিৱেশৰ সৈতে খাপ খুৱাই লোৱাত সহায় কৰিবলৈ অনুষ্ঠিত কৰা গুৰুত্বপূৰ্ণ অনুষ্ঠান হৈছে অভিনন্দন কাৰ্যক্ৰম।এই অভিনন্দন কাৰ্যক্ৰমে মহাবিদ্যালয়ৰ নীতি নিয়ম, সংস্কৃতি, সম্পদ, আৰু শৈক্ষিক আশাৰ পৰিচয় হিচাপে কাম কৰে। 

নগাঁও জিলাৰ পশ্চিমাঞ্চলৰ অগ্ৰনী উচ্চ শিক্ষাৰ অনুষ্ঠান বটদ্ৰৱা শ্ৰীশ্ৰী শংকৰদেৱ মহাবিদ্যালয়ত আজিৰে পৰা স্নাতক পৰ্যায়ৰ প্ৰথম ষান্মাসিকত ছাত্ৰ-ছাত্ৰীসকলৰ মাজত অভিনন্দন কাৰ্যক্ৰম আৰম্ভ কৰা হয়। তদুপলক্ষে মহাবিদ্যালয়খনৰ প্ৰেক্ষাগৃহত অনুষ্ঠিত সভাত সভাপতিত্ব কৰে নৱনিযুক্ত অধ্যক্ষা ড০ নমিতা কলিতাই। 

মহাবিদ্যালয়ৰ আভ্যন্তৰীণ মান নিশ্চিত কোষৰ উদ্যোগত অনুষ্ঠিত অনুষ্ঠানটিৰ আঁত ধৰে ইংৰাজী বিভাগৰ সহযোগী অধ্যাপক শ্বৰিফুল ইছলামে।সভাত উপাধ্যক্ষ দেৱজিৎ মহন্তই মহাবিদ্যালয়ৰ নীতি-নিয়ম, পৰীক্ষা আৰু পাঠ্যক্ৰমৰ লগতে ৰাষ্ট্ৰীয় শিক্ষা নীতি(এন ই পি) ২০২০ৰ বিশ্লেষণ কৰি প্ৰৱেশ, সমতা, গুণগত মান, ব্যয়সাধ্যতা, আৰু জবাবদিহিতাৰ ওপৰত গুৰুত্ব আৰোপ কৰি ভাৰতৰ শিক্ষা ব্যৱস্থাত এক বৈপ্লৱিক পৰিৱৰ্তন অনাৰ লক্ষ্যৰ বিশ্লেষণ কৰে। 

সভাত শিক্ষক আৰু ছাত্ৰৰ মাজত চিনাকি পৰ্বৰ পাছত অধ্যক্ষা ড০ নমিতা কলিতাই ছাত্ৰ-ছাত্ৰীসকলে শাৰীৰিক, মানসিক, শৈক্ষিক ভাবে নিজকে প্ৰতিষ্ঠা কৰি বটদ্ৰৱা শ্ৰী শ্ৰী শংকৰদেৱ মহাবিদ্যালয়খনি এখন অগ্ৰণী মহাবিদ্যালয় হিচাপে প্ৰতিষ্ঠা কৰাৰ ওপৰত গুৰুত্ব আৰোপ কৰে। মহাবিদ্যালয়ৰ অধ্যাপক, অধ্যাপিকাসকলে অংশ গ্ৰহণ কৰা সভাত এডন পাঠ্যক্ৰম, চাৰ্টিফিকেট কোৰ্চ, এন এছ এছ, এন চি চি, ৰেড ৰিবৰ্ণ ক্লাব, প্ৰেৰণাদায়ক বক্তৃতা, বিভিন্ন কৌশল সম্পৰ্কীয় পাঠ্যক্ৰম, স্বয়ম(swayam) পৰ্টেল, পুথিভঁৰাল আদিৰ বিষয়েও আলোচনা কৰা হয়। 

সভাৰ শেষত আভ্যন্তৰীণ মান নিশ্চিত কোষৰ সমন্বয়ক ড০ আশ্বিক ইলাহীয়ে অভিনন্দন কাৰ্যক্ৰমৰ আগন্তুক দুটা দিনত মহাবিদ্যালয়ৰ বিভাগীয় অধ্যাপক, অধ্যাপিকাসকলে ছাত্ৰ-ছাত্ৰীসকলৰ লগত মত বিনিময় কৰি বটদ্ৰৱা শ্ৰীশ্ৰী শংকৰদেৱ মহাবিদ্যালয়ৰ নিয়ম নীতি, আগন্তুক দিনৰ কাৰ্যসূচীসমূহৰ বিষয়ে আলোচনা কৰিব বুলি প্ৰকাশ কৰে।