অহা ৫ বছৰত দেশে পাব ১০০০ নতুন ৰে'ল, ২০২৭ত আৰম্ভ হ'ব বুলেট ট্ৰেইনঃ ৰে'লমন্ত্ৰী

ডিজিটেল ডেস্কঃ কেন্দ্ৰীয় ৰে’লমন্ত্ৰী অশ্বিনী বৈষ্ণৱে ভাৰতীয় ৰে’লৱেৰ নতুন পৰিকল্পনা আৰু বৃহৎ উন্নীতকৰণৰ কথা ঘোষণা কৰিছে। তেওঁ উল্লেখ কৰা মতে ভাৰতীয় ৰে’লৱেয়ে ব্যয় হ্ৰাস কৰাৰ লগতে উন্নত যাত্ৰী সেৱাৰ দৰে ব্যৱস্থা কাৰ্যকৰীকৰণৰ দিশে আগবাঢ়িছে।

ৰে’ল মন্ত্ৰীগৰাকীয়ে লগতে কয় যে আগন্তুক পাঁচ বছৰত ভাৰত চৰকাৰে ১০০০খন নতুন ৰে’ল প্ৰৱৰ্তন কৰাৰ লগতে ২০২৭ চনৰ ভিতৰত বুলেট ট্ৰেইনৰ কাম-কাজ আৰম্ভ কৰাৰ পৰিকল্পনা কৰিছে।  

বুলেট ট্ৰেইন প্ৰকল্প 

ভাৰতীয় ৰে’লৱেৰ শেহতীয়া আৰু আটাইতকৈ অভিলাষী তীব্ৰবেগী ৰে’ল প্ৰকল্প হৈছে বুলেট ট্ৰেইন। জাপানৰ সহযোগত নিৰ্মাণ কৰা হৈছে ভাৰতৰ বুলেট ট্ৰেইন। 

২০২৬ চনত বুলেট ট্ৰেইনৰ প্ৰথমটো প্ৰ’ট’টাইপ আহিব বুলি আশা কৰা হৈছে তাৰ পিছত  ২০২৭ চনত আনুষ্ঠানিকভাৱে মুকলি কৰা হ’ব। ভাৰতৰ এই বুলেট ট্ৰেইন প্ৰকল্পৰ ডিজাইন আৰু গৱেষণাৰ এক ডাঙৰ অংশৰ সৈতে আই আই টি মাদ্ৰাজ আৰু আই আই টি ৰুৰকি জড়িত হৈ আছে। 

মুম্বাই-আহমেদাবাদ বুলেট ট্ৰেইন প্ৰকল্পৰ বাবে গুজৰাটৰ ভালছাদ জিলাত অৱস্থিত দমন গংগা নদীৰ দলং নিৰ্মাণৰ কাম সম্পূৰ্ণ হৈছে। এক বিবৃতি অনুসৰি এই প্ৰকল্পৰ বাবে গুজৰাটত পৰিকল্পিত ২১খন নদী দলঙৰ ভিতৰত এইখন ১৬ সংখ্যক নদী দলং। বুলেট ট্ৰেইন প্ৰকল্পৰ বাবে ভালছাদ জিলাত অৱস্থিত পাঁচোখন নদী দলং এতিয়া সম্পূৰ্ণ হৈ উঠিছে।   

ভাৰতীয় ৰে’লৱেৰ অভিলাষী পৰিকল্পনা   

ভাৰতীয় ৰে’লৱেৰ অগ্ৰগতিৰ ওপৰত আলোকপাত কৰি ৰে’লমন্ত্ৰীগৰাকীয়ে অৱগত কৰে যে যোৱা ১১ বছৰত ৩৫ হাজাৰ কিলোমিটাৰ নতুন ৰে’লপথ নিৰ্মাণ কৰা হৈছে। তেওঁ কয় এয়া পূৰ্বৰ চৰকাৰসমূহৰ সাফল্যতকৈ বহুগুণ অধিক। 

এই প্ৰচেষ্টাসমূহে আন্তঃগাঁথনি শক্তিশালী কৰাই নহয়, অৰ্থনৈতিক আৰু সামাজিক উন্নয়নো ত্বৰান্বিত কৰে। এই অভিলাষী প্ৰকল্পৰ অধীনত ৰে’লৱেৰ লক্ষ্য হৈছে নগৰীয় সংযোগ উন্নীত কৰা, কাৰ্বন নিৰ্গমণ হ্ৰাস কৰা, আৰু ভাৰতক বহনক্ষম ৰে’ল পৰিবহণৰ ক্ষেত্ৰত বিশ্বৰ আগশাৰীৰ দেশ হিচাপে গঢ়ি তোলা, পৰিৱেশ অনুকূল আৰু সমতাপূৰ্ণ চহৰৰ দৃষ্টিভংগীক বাস্তৱত পৰিণত কৰা। 
 
শেহতীয়া কৃতিত্বৰ বিষয়ে উল্লেখ কৰিবলৈ গৈ বৈষ্ণৱে কয়, “কেৱল এবছৰত আমি ৫,৩০০ কিলোমিটাৰ নতুন ৰে’ল পথ যোগ কৰিলোঁ”। তেওঁ আৰু উল্লেখ কৰে যে উত্তৰ আমেৰিকা আৰু ইউৰোপৰ বাবে প্ৰয়োজনীয় সংযুক্ত উৎপাদন অতিক্ৰম কৰিবলৈ বছৰি ৩০ হাজাৰ ৱেগন আৰু ১৫০০ ইঞ্জিন নিৰ্মাণ কৰা হৈছে। 

তেওঁ কয়, ‘ৰে’লৱেত বিনিয়োগ ২৫ হাজাৰ কোটিৰ পৰা ২.৫২ লাখ কোটিলৈ বৃদ্ধি হৈছে,  পিপিপিৰ জৰিয়তে অতিৰিক্ত ২০ হাজাৰ কোটি টকা আহিছে।’  

মন্ত্ৰালয়ে লজিষ্টিকছৰ ওপৰতো গুৰুত্ব আৰোপ কৰিছে।বৈষ্ণৱে কয়, ‘ৰে’লৱেই ঘাইপথৰ তুলনাত প্ৰতি টন-কিলোমিটাৰত আধাতকৈও কম খৰচত মালবাহী পৰিবহণৰ ব্যৱস্থা কৰে আৰু ই ৯৫ শতাংশ অধিক পৰিৱেশ অনুকূল।