কাবুলত আফগানৰ বৈদেশিক মন্ত্ৰীৰে ভাৰতীয় কূটনীতিবিদৰ বৈঠক

ডিজিটেল ডেস্কঃ  ভাৰতৰ বৈদেশিক পৰিক্ৰমা মন্ত্ৰালয়ৰ পাকিস্তান, আফগানিস্তান আৰু ইৰাণ (পিএআই) বিভাগৰ যুটীয়া সচিব আনন্দ প্ৰকাশে কাবুলত আফগানিস্তানৰ ভাৰপ্ৰাপ্ত বৈদেশিক মন্ত্ৰী মাউলাউৱী আমিৰ খান মুত্তাকিৰ সৈতে ৰাজনৈতিক সম্পৰ্ক, বাণিজ্য, ট্ৰেনজিট আৰু আঞ্চলিক উন্নয়নকে ধৰি বিভিন্ন দ্বিপাক্ষিক বিষয়ত আলোচনা কৰে।

বৈঠকত মন্ত্ৰী মুত্তকীয়ে আফগানিস্তান আৰু ভাৰতৰ কূটনৈতিক আৰু অৰ্থনৈতিক সম্পৰ্ক সম্প্ৰসাৰণৰ ওপৰত গুৰুত্ব আৰোপ কৰে। এই সন্দৰ্ভত আফগানিস্তানৰ বৈদেশিক পৰিক্ৰমা মন্ত্ৰালয়ৰ উপ-মুখপাত্ৰ হাফিজ জিয়া আহমেদে সামাজিক মাধ্যমত কয় যে, আফগানিস্তানে বৰ্তমান বিনিয়োগৰ বাবে ইতিবাচক সুযোগ প্ৰদান কৰিছে। 

আনন্দ প্ৰকাশে আফগানিস্তানৰ সৈতে ভাৰতৰ সম্পৰ্ক বজাই ৰখা আৰু সুদৃঢ় কৰাৰ প্ৰতিশ্ৰুতি পুনৰ দৃঢ় কৰিছে। প্ৰকাশে বিভিন্ন খণ্ডত সম্পৰ্ক আৰু অধিক গভীৰ হ’ব বুলি আশা প্ৰকাশ কৰি ভাৰতৰ উন্নয়নমূলক সহযোগিতা অব্যাহত ৰখাৰ ইচ্ছা পুনৰবাৰ উল্লেখ কৰে।

প্ৰকাশে আফগানিস্তানত নতুন আন্তঃগাঁথনি প্ৰকল্পত বিনিয়োগ আৰু স্থবিৰ পদক্ষেপ পুনৰ আৰম্ভ কৰাৰ বাবে ভাৰতৰ আগ্ৰহ প্ৰকাশ কৰে। চৰকাৰী আদান-প্ৰদানৰ প্ৰসাৰ, ভ্ৰমণ পদ্ধতি সৰল কৰা আৰু বিভিন্ন ক্ষেত্ৰত দ্বিপাক্ষিক সহযোগিতা বৃদ্ধিৰ প্ৰয়োজনীয়তাৰ ওপৰত দুয়োপক্ষই একমত প্ৰকাশ কৰে।