ফ্ৰান্সৰ পৰা ৰাফেল যুদ্ধ বিমানৰ ছ’ৰ্চ ক’ড বিচাৰিছে ভাৰতে...

ডিজিটেল ডেস্কঃ পাকিস্তানৰ সৈতে যুদ্ধৰ পৰিস্থিতিৰ মাজতে ভাৰতে ফ্ৰান্সৰ পৰা ৰাফেল যুদ্ধ বিমানৰ ছ’ৰ্চ ক’ড বিচাৰিছে। ভাৰতে ছ’ৰ্চ ক’ড লাভৰ বাবে প্ৰচেষ্টা তীব্ৰতৰ কৰি তুলিছে। ৰাফেল যুদ্ধ বিমানখন থলুৱা ৰাডাৰ, এভিয়নিকছ আৰু মিছাইলেৰে সশস্ত্ৰ কৰিবলৈ ছ’ৰ্চ ক’ড থকাটো গুৰুত্বপূৰ্ণ।

ইয়াৰ আঁৰৰ ধাৰণাটো হ’ল প্ৰতিৰক্ষা জগতত আত্মনিৰ্ভৰশীলতা অৰ্জন কৰা, কাৰ্য্যকৰী স্বাধীনতা বজাই ৰখা, বিদেশৰ ওপৰত নিৰ্ভৰশীলতা হ্ৰাস কৰা আৰু প্ৰতিৰক্ষা প্ৰযুক্তিৰ প্ৰসাৰ।‘চৰকাৰৰ পৰা চৰকাৰলৈ’ চুক্তিৰ অধীনত ভাৰতে ফ্ৰান্সৰ কোম্পানী ডাছ’ল্ট এভিয়েশনৰ পৰা ৩৬খন ৰাফেল যুদ্ধ বিমান ক্ৰয় কৰিছে।

ফ্ৰান্সে ৰাফেলৰ সকলো যুদ্ধ বিমান ভাৰতক গতাই দিছে। এই যুদ্ধ বিমানসমূহ এতিয়া আম্বালা আৰু হাছিমাৰাৰ ঘাটিৰ পৰা চলি আছে। অৱশ্যে ৰাফেল যুদ্ধ বিমান ইতিমধ্যে বহু ভাৰতীয় অস্ত্ৰৰে সশস্ত্ৰ হৈ আছে ৷

ভাৰতে Astra Mk1 BVRAAM (beyond-visual-range air-to-air missile) আৰু স্মাৰ্ট এণ্টি এয়াৰফিল্ড ৱেপন (SAAW)ৰ দৰে অস্ত্ৰে ৰাফেলক সশস্ত্ৰ কৰিছে যদিও এতিয়া ভাৰতক ৰাফেলত আৰু বহু থলুৱা অস্ত্ৰ অন্তৰ্ভুক্ত কৰিবলৈ ছ’ৰ্চ ক’ডৰ প্ৰয়োজন। 

উল্লেখ্য যে,  ছ’ৰ্চ ক’ডে ৰাফেল যুঁজাৰু জেটৰ উন্নত সক্ৰিয় ইলেক্ট্ৰনিকলি স্কেনড এৰে (AESA) ৰাডাৰ আৰু মডিউলাৰ মিছন কম্পিউটাৰ (MMC) নিয়ন্ত্ৰণ কৰে। এইবোৰ মিলি বিমানখনৰ ইলেক্ট্ৰনিক মেৰুদণ্ড গঠন হয়। এই ছ’ৰ্চ ক’ডসমূহ লাভ নকৰালৈকে ভাৰতীয় বায়ুসেনাই প্ৰতিটো নতুন অস্ত্ৰ সংহতি বা উন্নীতকৰণৰ বাবে ডাছল্টৰ ওপৰত নিৰ্ভৰশীল হৈ থাকিব।