ভাৰতীয় প্ৰতিৰক্ষা ৰপ্তানিৰ বাবে এক উল্লেখযোগ্য পদক্ষেপ

ডিজিটেল ডেস্ক: ভাৰতীয় প্ৰতিৰক্ষা ৰপ্তানিৰ বাবে এক উল্লেখযোগ্য পদক্ষেপ হিচাপে ব্ৰহ্মছ ছুপাৰছনিক ক্ৰুজ মিছাইল ব্যৱস্থাৰ দ্বিতীয়টো বেটাৰী ফিলিপাইনছলৈ প্ৰেৰণ কৰা হৈছে। এজন প্ৰতিৰক্ষা বিষয়াই উল্লেখ কৰে যে, “এইবাৰ দ্বিতীয়টো বেটাৰী সাগৰীয় পথৰ জৰিয়তে প্ৰেৰণ কৰা হৈছে।” উল্লেখযোগ্য যে, ২০২৪ চনৰ এপ্ৰিল মাহত ভাৰতীয় বায়ুসেনাৰ বিমান ব্যৱহাৰ কৰি অসামৰিক বিমান পৰিবহণ সংস্থাৰ সহায়ত প্ৰথমটো বেটাৰী ডেলিভাৰী কৰা হৈছিল। সেই ডেলিভাৰীত ছয় ঘণ্টাৰ দীৰ্ঘ দূৰত্বৰ বিমানখন বন্ধ নোহোৱাকৈ চলিছিল, য’ত গধুৰ পেলোডটো ফিলিপাইনছৰ পশ্চিম অঞ্চললৈ লৈ যোৱা হৈছিল।

২০২২ চনৰ জানুৱাৰী মাহত ঘোষণা কৰা ফিলিপাইনছৰ সৈতে ব্ৰহ্ম’ছৰ চুক্তি ভাৰতৰ প্ৰথমটো বৃহৎ প্ৰতিৰক্ষা ৰপ্তানি অৰ্ডাৰ হিচাপে পৰিগণিত হৈছিল। ৩৭৪.৯৬ মিলিয়ন ডলাৰ (প্ৰায় ২,৭০০ কোটি ₹) মূল্যৰ এই চুক্তিখন ব্ৰাহমছ এৰ’স্পেচ প্ৰাইভেট লিমিটেডৰ সৈতে তীৰভিত্তিক জাহাজ বিৰোধী ক্ষেপণাস্ত্ৰ ব্যৱস্থা (এছ বি এ এছ এম এছ) যোগানৰ বাবে স্বাক্ষৰিত হৈছিল। এই চুক্তিৰ অধীনত ফিলিপাইনছে তিনিটা ক্ষেপণাস্ত্ৰ বেটাৰী লাভ কৰিব, প্ৰত্যেকেই ২৯০ কিলোমিটাৰ দূৰত্বৰ লক্ষ্যত মেক ২.৮ বেগত আঘাত কৰিব পাৰিব— যি শব্দৰ গতিৰ প্ৰায় তিনিগুণ। চুক্তিখনত অপাৰেটৰ প্ৰশিক্ষণ আৰু সংহত লজিষ্টিক সহায়ক পেকেজও অন্তৰ্ভুক্ত কৰা হৈছে।

ভাৰতৰ ব্ৰহ্মছ ৰপ্তানি কাৰ্যসূচীয়ে গতি লাভ কৰিছে। দক্ষিণ-পূব এছিয়াৰ আন কেইবাখনো ৰাষ্ট্ৰই এতিয়া আগ্ৰহ প্ৰকাশ কৰিছে। প্ৰথমবাৰৰ বাবে ইণ্ডোনেছিয়াৰ প্ৰতিৰক্ষা মন্ত্ৰালয়ে চলিত বৰ্ষৰ আৰম্ভণিতে জাকাৰ্টাত থকা ভাৰতীয় দূতাবাসক ৪৫ কোটি ডলাৰৰ ব্ৰাহমোছ চুক্তিৰ বাবে থকা আগ্ৰহৰ কথা আনুষ্ঠানিকভাৱে জনাইছিল। থাইলেণ্ড আৰু অন্যান্য আঞ্চলিক দেশৰ সৈতেও আলোচনা অব্যাহত আছে।