ডিজিটেল ডেস্কঃ কমনৱেলথ গেমছত ভাৰতে লাভ কৰিছে আশানুৰূপ সফলতা । এই পৰ্যন্ত ভাৰতে তিনিটা সোণৰ , দুটা ৰূপৰ আৰু এটা ব্ৰঞ্জৰ পদক লাভ কৰি পদক তালিকাৰ ষষ্ঠ স্থানত আছে । ভাৰতৰ হৈ মীৰাবাই চানু, জেৰেমি লালৰিনুঙ্গা আৰু অচিন্ত শৌলিয়ে সোণৰ পদক , বিন্দিয়াৰাণী দেৱী আৰু সংকেত সাৰ্গৰে ৰূপৰ পদক আৰু গুৰুৰাজা পুজাৰাই এটা ব্ৰঞ্জৰ পদক লাভ কৰিছে ।
কমনৱেলথ গেমছত দেশৰ হৈ প্ৰতিধিত্ব কৰি সফলতা অৰ্জন কৰা খেলুৱৈসকলক প্ৰধানমন্ত্ৰী মোডী তথা আন আন বিশিষ্ট ব্যক্তিৰ লগতে শুভেচ্ছা জ্ঞাপন কৰে লোকসভাৰ অধ্যক্ষ ওম বিৰলাই । ওম বিৰলাই কয় যে- মই নিশ্চিত যে, কমনৱেলথ গেমছৰ খেলুৱৈ সকলৰ পৰা দেশৰ যুৱ প্ৰজন্ম অনুপ্ৰাণিত হ'ব ।
উল্লেখ্য যে, আজিৰ দিনটোত বাৰ্মিংহামত বহু কেইখন নিৰ্ণায়ক খেলত ভাৰতৰ খেলুৱৈয়ে অংশগ্ৰহণ কৰিব। সেয়েহে সন্ধিয়ালৈকে পদক তালিকাত পদকৰ সংখ্যা বৃদ্ধি হোৱাৰ সম্ভাৱনা আছে। আনহাতে ভাৰতৰ মহিলা লন বল দলটোৱে নিউজিলেণ্ডৰ বিৰুদ্ধে ছেমি ফাইনেলত অংশগ্ৰহণ কৰিব। ভাৰতীয় মহিলা লন বল দলটোত আছে অসমৰ নয়নমণি শইকীয়াও।
