বিভিএফচিএলে চলিত বৰ্ষত মাত্ৰ চাৰি মাহত ১,০২,০০৩ মেট্ৰিক টন ইউৰিয়া উৎপাদন কৰি গঢ়িলে অভিলেখ

ডিজিটেল সংবাদ, নামৰূপ : সত্তৰ দশকত স্থাপন হোৱা ব্ৰহ্মপুত্ৰ ভেলী ফাৰ্টিলাইজৰ কৰ্পৰেচন লিমিটেডৰ  তৃতীয়টো উৎপাদন গোটে আওপুৰণি যন্ত্ৰাংশৰে আজিও সগৌৰৱে উৎপাদনক্ষম হৈ থকাই নহয়, চলিত বৰ্ষত মাত্ৰ চাৰি মাহত (২০২৫ চনৰ এপ্ৰিলৰ পৰা জুলাইলৈ) ১,০২,০০৩ মেট্ৰিক টন ইউৰিয়া উৎপাদন কৰি অভিলেখ গঢ়ে।  উল্লেখযোগ্য যে বিগত বৰ্ষৰ অক্টোবৰৰ শেষৰ ফালে প্ৰায় ডেৰমাহ ধৰি হোৱা তৃতীয় গোটটোৰ নিয়মীয়া চাট ডাউনৰ সময়ত তৃতীয় গোটটোৰ বিভিন্ন  মেৰামতি কৰা হৈছিল।  

তাৰ পিছত পৰাই যেন উদ্যোগটোৱে ভাল ফল দেখুৱাবলৈ সক্ষম হৈছে। লক্ষ্যণীয় যে বিগত ৫ বছৰৰ ভিতৰতে চলিত বৰ্ষৰ ৯ জানুৱাৰীত এদিনতে সৰ্বাধিক ৯১৬ মেট্ৰিক টন ইউৰিয়া উৎপাদন কৰি বিভিএফচিএলৰ পুনৰ পূৰ্বৰ খ্যাতি ঘূৰাই আনিবলৈ সক্ষম হৈছে। বিগত তিনি বছৰৰ এদিনীয়া সৰ্বাধিক উৎপাদন যদি চোৱা হয় তেন্তে দেখা যায়  ২০২৪ বৰ্ষত বছৰটোৰ সৰ্বাধিক উৎপাদন  হৈছিল  ৮৫৪ মেট্ৰিক টন (১০  ফেব্ৰুৱাৰী ২০২৪)  ২০২৩ বৰ্ষত  ৭৬৪ মে টন  (১৬ জানুৱাৰী)  ইউৰিয়া উৎপাদন হৈছিল।   

উল্লেখযোগ্য যে ষাঠিৰ দশকতে স্থাপন হোৱা নামৰূপ সাৰ কাৰখানা অৰ্থাৎ ব্ৰহ্মপুত্ৰ ভেলী ফাৰ্টিলাইজাৰ কৰ্পৰেচন লিমিটেডৰ দুটা গোট ইতিমধ্যে বন্ধ হ'ল। অভিজ্ঞতা সম্পন্ন বিষয়া আৰু নিপুণ শ্ৰমিক কৰ্মচাৰীসকলৰ নিষ্ঠা আৰু ঐকান্তিক প্ৰচেষ্টাত বি ভি এফ চি এলৰ তৃতীয়টো উৎপাদন গোটে এনে সুফল দেখুৱাবলৈ সক্ষম হোৱাত নিত্যান্তই  শ্ৰমিক কৰ্মচাৰীসকল ধন্যবাদৰ পাত্ৰ । 

ইফালে চলিত বৰ্ষৰ এপ্ৰিলত উদ্যোগটোৰ নতুন অধ্যক্ষা তথা পৰিচালন সঞ্চালক হিচাপে যোগদান কৰে মোহন ৰাজ ছেট্টিয়ে।  এক দক্ষ আৰু অভিজ্ঞতাপুষ্ট নেত্ৰী হিচাপে অধ্যক্ষাগৰাকীয়ে উদ্যোগটোৰ সূক্ষ্ম ত্ৰুটিসমূহো গুৰুত্বসহকাৰে লৈ সমাধান কৰা পৰিলক্ষিত হৈছে।  

তাৰ ফলশ্ৰুতিত সম্প্রতি আয়ুস কাল উকলি যোৱা প্ৰকল্পটোৱেও চলিত বছৰটো দেখুওৱা ভাল ফলাফলে উদ্যোগটোৰ কৰ্তৃপক্ষ, কৰ্মচাৰীসকলক সন্তোষিত কৰিছে।  উল্লেখযোগ্য যে চলিত বৰ্ষৰ জুলাইত কেৱল নামৰূপ-তৃতীয় গোটটোৱে সৰ্বনিম্ন শক্তি ব্যৱহাৰ কৰি (৯.৫৭ GCl /MT )  এতিয়ালৈকে সৰ্বাধিক ২৮০৩৩ মেট্ৰিক টন ইউৰিয়া  উৎপাদন কৰিবলৈ সক্ষম হৈছে।

মন কৰিবলগীয়া যে  ১৯৮৭ চনতে  স্থাপন হোৱা নামৰূপ-তৃতীয় উদ্যোগটোৱে  ৩৭ বছৰতকৈও অধিক সময় ধৰি অবিৰতভাৱে চলি থকাৰ পিছটো শক্তিশালীভাৱে কৰ্মক্ষমতা প্ৰদৰ্শন কৰাটো বি ভি এফ চি এলৰ ইতিহাসত বিৰল কাৰ্য্য হিচাপে চিহ্নিত হৈছে। এয়া হ’ল উদ্যোগটোৰ অগ্ৰগতি, দলীয় কামৰ নিদৰ্শন আৰু প্ৰতিদিনে উদ্যোগটোক  উন্নয়নৰ দিশলৈ লৈ যোৱা শ শ  শ্ৰমিক কৰ্মচাৰীৰ প্ৰচেষ্টা আৰু এই সকলৰ নীৰৱ প্ৰতিশ্ৰুতি।