মুছলপুৰত ইউ পি পি এলৰ বিশাল যোগদান সভা

ডিজিটেল সংবাদ,বাক্সা : বাক্সা জিলাৰ মুছলপুৰত শুকুৰবাৰে ইউ পি পি এল দলত আনুষ্ঠানিকভাৱে যোগদান কৰে চাপাগুৰী বিধানসভা সমষ্টিৰ প্ৰাক্তন বিধায়ক হিতেশ বসুমতাৰীয়ে । বিশাল সমদল লৈ যোগদান কাৰ্যসূচীত উপস্থিত হয় বাক্সাৰ প্ৰভাৱশালী নেতা হিতেশ বসুমতাৰী ।

উল্লেখ্য যে এইগৰাকী নেতাই কেইদিনমান পূৰ্বে বিপিএফ ত্যাগ কৰিছিল । আজি বিটিআৰৰ মুখ্য কাৰ্যবাহী সদস্য প্ৰমোদ বড়োৰ উপস্থিতিত মুছলপুৰ দুৰ্গা মন্দিৰ প্ৰাংগনৰ অনুষ্ঠিত ইউপিপিএল দলৰ এক বিশাল যোগদান সভাত যোগদান কৰে হিতেশ বসুমতাৰীয়ে । উপস্থিত থাকে খাম্পা বৰগয়াৰী, চন্দন ব্ৰহ্ম আদি ।

সাংবাদিকৰ সৈতে হোৱা আছুতীয়া সাক্ষাৎকাৰত বিটিআৰৰ মুখ্য কাৰ্যবাহী সদস্য প্ৰমোদ বড়োৱে বিটিআৰত আমি সৰ্বস্তৰৰ উন্নয়নৰ বাবে কাম কৰি আছো বুলি মন্তব্য কৰি আঁচনিৰ অন্ত নাই বুলি উল্লেখ কৰে । তেওঁ লগতে ইউপিপিএল দলে একত্ৰিকৰণৰ যাত্ৰা আৰম্ভ হোৱা বুলিও মন্তব্য কৰে ।

ইফালে হিতেশ বসুমতাৰীয়ে হাগ্ৰামা মহিলাৰীয়ে প্ৰায়ে সন্দেহজনক ভূমিকা পালন কৰে বুলি উল্লেখ কৰে। লগতে তেওঁ হাগ্ৰামা মহিলাৰী সন্দৰ্ভত সৰৱ হৈ পৰে । তেওঁক হাগ্ৰামা মহিলাৰীয়ে কামাণ্ডাৰ আখ্যা দিয়াই সুখীহে হৈছে বুলি জানিবলৈ দি কামাণ্ডাৰে যুদ্ধৰ নেতৃত্ব দিয়ে বুলি মন্তব্য কৰে ।