শিক্ষা বিষয়াৰ নিৰ্যাতন সহিব নোৱাৰি প্ৰধান শিক্ষয়িত্ৰীৰ চৰম পন্থা

ডিজিটেল সংবাদ, বিহালীঃ বিহালীত শিক্ষা বিষয়াৰ নিৰ্যাতন সহিব নোৱাৰি স্বগৃহত আত্মহত্যাৰ চৰম পন্থা বাচি ল'লে মায়া দেৱী উপাধ্যায় নামৰ মহিলা গৰাকীই ৷ অভিযোগ অনুসৰি, দীৰ্ঘদিনৰে পৰা বিহালী শিক্ষাখণ্ডৰ অন্তৰ্গত লোহাইৰাম মজলীয়া বিদ্যালয়ৰ প্ৰধান শিক্ষয়িত্ৰী মায়া দেৱী উপাধ্যায়ক বিহালী শিক্ষা বিষয়া মিলন দাসে বিদ্যালয়ৰ বিভিন্ন বিষয়কলৈ মানসিকভাৱে অকথ্য নিৰ্যাতন চলাই আহিছিল ৷ তদুপৰি শিক্ষা বিষয়া মিলন দাসে শিক্ষয়ত্ৰী গৰাকীৰ জুন মাহৰ দৰমহা পৰ্যন্ত বন্ধ ৰাখিছিল ৷

জানিব পৰা মতে, বিহালীৰ নাচবৰৰ নিবাসী লোহাইৰাম মজলীয়া বিদ্যালয়ৰ প্ৰধান শিক্ষয়ত্ৰী মায়া দেৱী উপাধ্যায়ে মৃত্যৰ পূৰ্বে এক চুইচাইড নোট লিখি থৈ গৈছে ৷ চুইচাইড নোটত বিহালী প্ৰাথমিক শিক্ষা খণ্ডৰ শিক্ষা বিষয়া মিলন দাস আৰু লোহাইৰাম মজলীয়া বিদ্যালয়ৰ সহকাৰী শিক্ষক ব্ৰজেন দাসে মহিলা শিক্ষয়ত্ৰী গৰাকীক মানসিকভাৱে অত্যাচাৰ চলোৱা বুলি লিখিতভাৱে উল্লেখ কৰিছে ৷ আত্মহত্যা কৰা প্ৰধান শিক্ষয়িত্ৰী গৰাকীৰ ঘৰ বিহালীৰ নাছবৰত ৷ থান বিহালী গাঁৱৰ লোহাইৰাম মজলীয়া বিদ্যালয়ৰ প্ৰধান শিক্ষয়িত্ৰী হিচাবে কৰ্মৰত হৈ আছিল মায়া দেৱী ৷