গুণোৎসৱ-২০২৫ : পলাশতল কাছমাৰী উচ্চ মাধ্যমিক বিদ্যালয়ত বিধায়ক ৰূপক শৰ্মা

ডিজিটেল সংবাদ, বটদ্ৰৱা : ৰাজ্যৰ শৈক্ষিক খণ্ডৰ উন্নতিৰ বাবে ৰাজ্য চৰকাৰে বিভিন্ন পদক্ষেপ গ্ৰহণ কৰি আহিছে। গুণগত শিক্ষাৰ মান নিশ্চিতকৰণ আৰু শৈক্ষিক মানদণ্ড উন্নত কৰাৰ লক্ষ্যৰে সোমবাৰৰ পৰা আৰম্ভ হৈছে "গুণোৎসৱ-২০২৫"।

"গুণোৎসৱ ২০২৫" ৰ প্ৰথম পৰ্যায় উপলক্ষে মঙলবাৰে নগাঁও জিলাৰ পশ্চিমাঞ্চলৰ বিভিন্ন বিদ্যালয়ত পুৱাৰে উখল মাখল পৰিৱেশৰ সৃষ্টি হৈছে। বিদ্যালয়সমূহত ছাত্ৰ -ছাত্ৰীয়ে পৰিবেশন কৰা বিভিন্ন অনুশীলন আৰু প্ৰাতঃ সভাই সকলোৰে দৃষ্টি আকৰ্ষণ কৰিছে। 

নগাঁও- বটদ্ৰৱা সমষ্টিৰ অন্তৰ্গত পলাশতল কাছমাৰী উচ্চ মাধ্যমিক বিদ্যালয়ত অনুষ্ঠিত গুণোসৎৱৰ কাৰ্যসূচীত আজি বিধায়ক ৰূপক শৰ্মা উপস্থিত হৈ বিদ্যালয়খনৰ ছাত্ৰ -ছাত্ৰী আৰু শিক্ষক -শিক্ষয়ত্ৰীসকলৰ সৈতে মত-বিনিময় কৰে। লগতে বিদ্যালয়খনৰ ছাত্ৰ -ছাত্ৰীসকলৰ সৈতে একেলগে বহি মধ্যাহ্ন ভোজনৰ খিচিৰি গ্ৰহণ কৰি ছাত্ৰ- ছাত্ৰীসকলক উৎসাহিত কৰে। 

ইয়াৰোপৰি বিধায়কগৰাকীয়ে কাছমাৰী পঞ্চায়তৰ অন্তৰ্গত বহুৱাভেটি প্ৰাথমিক বিদ্যালয়তো গুণোসৎৱ উপলক্ষে উপস্থিত হৈ বিদ্যালয়খনৰ ছাত্ৰ -ছাত্ৰী আৰু শিক্ষক -শিক্ষয়ত্ৰীৰ সৈতে মত-বিনিময় কৰে। জিলাখনৰ জাজৰী উচ্চতৰ মাধ্যমিক আদৰ্শ বিদ্যালয়, জামুগুৰি কে এন ছোৱালী উচ্চ মাধ্যমিক বিদ্যালয়, বৰপাম ৰুস্তুম আলী মধ্য ইংৰাজী বিদ্যালয়তো দেখা গৈছে নান্দনিক দৃশ্য। 

উল্লেখযোগ্য যে জাজৰী উচ্চতৰ মাধ্যমিক আদৰ্শ বিদ্যালয়ত নিৰীক্ষক হিচাপে উপস্থিত থাকে নগাঁও জিলা অতিৰিক্ত আয়ুক্ত শিল্পী ৰেখা পণ্ডিত। গুণোৎসৱৰ দ্বাৰা ছাত্ৰ -ছাত্ৰীৰ পাৰদৰ্শিতা, শৈক্ষিক অগ্ৰগতি আৰু বিদ্যালয়ৰ অগ্ৰগতি মূল্যায়ন কৰাত ৰাজ্য চৰকাৰৰ শিক্ষা বিভাগক সকলোৱে শলাগ লৈছে।