প্ৰশাসনিক সংস্কাৰৰ নামত ভেঁকো-ভাওনাঃ বিষয়া অবিহনেই চলিছে গহপুৰ সমজিলাৰ একাধিক কাৰ্যালয়

ডিজিটেল সংবাদ, ছয়দুৱাৰ: মুখ্যমন্ত্ৰী ড০ হিমন্ত বিশ্ব শৰ্মাই ৰাজ্যৰ  প্ৰশাসন যন্ত্ৰক জনমুখী,গতিশীল আৰু সংস্কাৰ সাধন কৰিবলৈ লোৱা পদক্ষেপ চূড়ান্ত ভেঁকো-ভাওনাত পৰিণত হৈছে গহপুৰ সমজিলাত।মহকুমাক সমজিলালৈ উন্নিত কৰি প্ৰশাসনিক ব্যৱস্থাক থাওকতে পোৱাৰ বাবে হিমন্ত বিশ্ব শৰ্মাই গ্ৰহণ কৰা পদক্ষেপ খোলাকটিৰ তালত পৰিণত হৈছে।

কাৰণ-এতিয়া মুৰব্বী বিষয়া অবিহনেই চলিছে গহপুৰ সমজিলাৰ একাধিক বিভাগ। উল্লেখযোগ্য যে-বিগত প্ৰায় ডেৰ বছৰ ধৰি স্থায়ী শিক্ষা বিষয়া অবিহনে চলিছে ছয়দুৱাৰ প্ৰাথমিক শিক্ষা বিষয়াৰ কাৰ্য্যলয়। যি গৰাকী বিষয়াই ভাৰপ্ৰাপ্ত শিক্ষা বিষয়া হিচাপে কাৰ্যনিৰ্বাহ কৰি আছে তেওঁৰ কান্ধতো ন্যস্ত হৈ আছে তিনিটা বিভাগৰ দায়িত্ব।

ছয়দুৱাৰ প্ৰাথমিক শিক্ষা খণ্ডত বিষয়া নথকাৰ বাবে যিগৰাকী বিষয়াক ভাৰপ্ৰাপ্ত শিক্ষা বিষয়া হিচাপে দায়িত্ব দিয়া হৈছে তেওঁ প্ৰকৃততে বিশ্বনাথৰ বিদ্যালয়সমূহৰ পৰিদৰ্শকহে। ইয়াৰ উপৰিও তেওঁৰ ওপৰত ন্যস্ত কৰা হৈছে বিশ্বনাথ জিলাৰ ভাৰপ্ৰাপ্ত জিলা শিক্ষা বিষয়া আৰু ছয়দুৱাৰ প্ৰাথমিক শিক্ষা খণ্ডৰ ভাৰপ্ৰাপ্ত খণ্ড শিক্ষা বিষয়াৰ দায়িত্ব।

'থ্ৰী ইন ওৱান' পদ্ধতিৰে চলা এই ব্যৱস্থাৰ দ্বাৰা শিক্ষা বিভাগটোৱে গহপুৰ কিম্বা বিশ্বনাথত কিমান গতিশীলতাৰে কাম কৰিব পাৰিব সেয়া সহজেই অনুমেয়। একেদৰে ছয়দুৱাৰ প্ৰাথমিক শিক্ষা বিষয়াৰ কাৰ্যালয়ৰ চাৰিটা চাৰ্কোলৰ ভিতৰত এটাতো নাই বিদ্যালয় পৰিদৰ্শক।

তদুপৰি এগৰাকী উচ্চ বৰ্গৰ সহায়ক আৰু এগৰাকী পৰিসংখ্যা সহায়কৰ পদও বছৰ বছৰ ধৰি খালী হৈ আছে উক্ত কাৰ্যালয়ত। বিষয়া আৰু পৰিদৰ্শক অবিহনে চলি অহা এই শিক্ষা বিভাগৰ কাৰ্যালয়টোৰ এনে দুৰাৱস্থাই গহপুৰ সমজিলাৰ শৈক্ষিক ব্যৱস্থাৰ এখন পয়ালগা ছবি উন্মোচিত কৰি তুলিছে।

কৃষক ৰাইজৰ অভাৱ-অভিযোগ আৰু কৃষি ক্ষেত্ৰৰ উন্নয়নৰ লগত জড়িত গহপুৰ মহকুমা কৃষি বিভাগৰ কাৰ্যালয়ত বিগত প্ৰায় ডেৰ-দুবছৰ ধৰি নাই মহকুমা কৃষি বিষয়া। গহপুৰৰ পৰা ৬৫  কিলোমিটাৰ দূৰত অৱস্থিত বিশ্বনাথ চাৰিআলিৰ পৰা নিয়ন্ত্ৰণ হৈ আছে গহপুৰৰ কৃষি বিভাগ।

অৰ্থাৎ বিশ্বনাথ জিলা কৃষি বিষয়াগৰাকীয়ে জোৰা-টাপলি মাৰি গহপুৰ মহকুমাৰ ভাৰপ্ৰাপ্ত মহকুমা কৃষি বিষয়া হিচাপে পৰিচালিত কৰি আহিছে কাম-কাজ। লক্ষণীয় কথা এনে যে-গহপুৰ মহকুমা কৃষি বিষয়াৰ কাৰ্যালয়ত কৃষি ক্ষেত্ৰ সহায়ক(গ্ৰাম সেৱক)ৰ পদৰ সংখ্যা মুঠ ২৪ জন।

কিন্তু বৰ্তমান এজন মাত্ৰ কৃষি ক্ষেত্ৰ সহায়কহে আছে উক্ত কৃষি বিষয়াৰ কাৰ্যালয়ত। বিষয়াবিহীন এই কাৰ্যালয়টোৰ দুৰাৱস্থাৰ বাবে গহপুৰ সমজিলাৰ কৃষি নিৰ্ভৰশীল কৃষক ৰাইজে বাৰুকৈয়ে দুৰ্ভোগ ভূগি আহিবলগীয়া হৈছে।

ছয়দুৱাৰ সংহত শিশু উন্নয়ন প্ৰকল্পৰ প্ৰকল্প বিষয়াগৰাকী বদলি হৈ যোৱাৰ পিছত যোৱা কেইবামাহৰ পৰা উক্ত পদটো ভাৰপ্ৰাপ্ত ব্যৱস্থাৰে চলি আছে বুলি জানিব পৰা গৈছে। উল্লেখযোগ্য যে খাদ্য আৰু যোগান পৰিক্ৰমা বিভাগটোত পূৰ্বৰ তুলনাত যথেষ্ট কামৰ বোজা বাঢ়িছে।

কিন্তু আচৰিত কথা এয়ে যে-গহপুৰ সমজিলাৰ খাদ্য আৰু যোগান পৰিক্ৰমা বিভাগত বিগত প্ৰায় এবছৰ ধৰি নাই অধীক্ষক। এই অধীক্ষকৰ দায়িত্ব ভাৰপ্ৰাপ্ত ব্যৱস্থাৰে চলাই আছে এগৰাকী পৰিদৰ্শকে। ইপিনে গহপুৰ সমজিলাৰ আবকাৰী বিভাগত যোৱা প্ৰায় এবছৰ ধৰি নাই উপ-অধীক্ষক।

তদুপৰি খালী হৈ আছে আবকাৰী পৰিদৰ্শকৰ পদটোও। এজন মাত্ৰ আবকাৰী উপ পৰিদৰ্শকৰ নেতৃত্বত চলি অহা গহপুৰ আবকাৰী বিভাগত দীৰ্ঘ দিন ধৰি আবকাৰী কনিষ্টবলৰ দুটা পদ খালী হৈ আছে। গহপুৰ সমজিলাৰ আবকাৰী বিভাগৰ উপ অধীক্ষকৰ পদটো বৰ্তমান এগৰাকী সহকাৰী আয়ুক্তই চম্ভালি আছে বুলি জানিব পৰা গৈছে।

লক্ষণীয়ভাবে এইগৰাকী সহকাৰী আয়ুক্ত অধিষ্ঠিত হৈ আছে গহপুৰ মহকুমাৰ ভাৰপ্ৰাপ্ত জনকল্যাণ বিষয়া হিচাপেও। উল্লেখযোগ্য যে-গহপুৰ মহকুমা জনকল্যাণ বিভাগৰ কাৰ্যালয়টোৰ আৰম্ভণিৰে পৰা আজিলৈকে চলি আহিছে ভাৰপ্ৰাপ্ত ব্যৱস্থাৰে।

প্ৰথমে মহকুমা আৰু তাৰ পিছত সমজিলালৈ উন্নিত হোৱা গহপুৰত আজিলৈকে নিযুক্ত নহ'ল তথ্য আৰু জনসংযোগ বিষয়া। এক কথাত থ্ৰী ইন ওৱান পদ্ধতি আৰু ভাৰপ্ৰাপ্ত ব্যৱস্থাৰে চলি অহা এনেধৰণৰ কাৰ্য প্ৰণালীৰ দ্বাৰা বৃহত্তৰ ৰাইজে প্ৰশাসনিক কাম কাজৰ ক্ষেত্ৰত কিমান খৰতকীয়া সমাধান লাভ কৰি আহিছে সেয়া সহজেই অনুমেয়।

জোৰা-তাপলিৰে চলি অহা এনেধৰণৰ প্ৰশাসনিক ব্যৱস্থাই এটা কথা প্ৰমাণ কৰি তুলিছে যে মুখ্যমন্ত্ৰীয়ে সভাই সমিতিয়ে কৈ অহা প্ৰশাসন ব্যৱস্থাৰ গতিশীলতা আৰু প্ৰশাসনিক সংস্কাৰ আদিবোৰ মুখ্যমন্ত্ৰীৰ কথাৰ ফুলজাৰিৰ বাহিৰে আন একো নহয়।