ঘিলামৰা উন্নয়ন খণ্ডত নৈৰাজ্যঃ জবকাৰ্ডৰ ডিমাণ্ড ল'বলৈ দিব লাগে কমিচন...

ডিজিটেল সংবাদ, ঢকুৱাখনা: ঢকুৱাখনা সমজিলাৰ ঘিলামৰা উন্নয়ন খণ্ডৰ খণ্ড উন্নয়ন বিষয়া জিম্পি শইকীয়াৰ অদক্ষ পৰিচালনাৰ কুফল ভুগিছে দুৰ্ভগীয়া হিতাধিকাৰী একাংশই। গ্ৰাম্য দৰিদ্ৰ হিতাধিকাৰীক কেঁকুৰা চেঁপা দি প্ৰাপ্য পুঁজিৰ পৰা বঞ্চিত কৰা  শইকীয়া বাহিনীৰ অন্য এক দুষ্কাৰ্য পোহৰলৈ আহিছে ।

খণ্ডটোৰ বৰদৈবাম গাঁও পঞ্চায়তৰ এগৰাকী দৰিদ্ৰ ব্যক্তি প্ৰদীপ গগৈয়ে তেওঁৰ আই ডি নম্বৰ AS126331191 ৰ বিপৰীতে ২০২৪-২০২৫ বিত্তীয় বর্ষত লাভ কৰিছিল প্ৰধান মন্ত্ৰী আৱাস যোজনা
(গ্ৰামীণ )আঁচনিৰ ঘৰ । ঘিলামৰা উন্নয়ন খণ্ড বিষয়াৰ কাৰ্যালয়ৰ সমুখতে থকা হিতাধিকাৰী প্ৰদীপ গগৈৰ নিজা ভূমিত গৃহ নিৰ্মাণৰ বাবে যোৱা ২০২৫ বর্ষৰ ৮এপ্ৰিলত প্ৰথম কিস্তিৰ ৩২ হাজাৰ ৫০০ টকা আৰু ২৮ মে'ত দ্বিতীয় কিস্তিৰ ৪৮ হাজাৰ ৭৫০ টকা একাউণ্ট যোগে লাভ কৰি দৰিদ্ৰ হিতাধিকাৰীগৰাকীয়ে গৃহ নিৰ্মাণৰ কাম আগবঢ়াই  নিলে ।

 পৰৱৰ্তী সময়ত দৰিদ্ৰ হিতাধিকাৰীগৰাকীয়ে নিজৰ আই ডি AS126331191 ৰ বিপৰীতে নিজৰ আৰু কন্যাৰ নামত জবকাৰ্ডৰ ডিমাণ্ড দিয়ে বৰদৈবাম গাঁও পঞ্চায়তৰ কাৰ্যালয়ত উপস্থিত হৈ। পঞ্চায়ত কৰ্মী ৰেবত গগৈয়ে প্ৰায় বহু দিন পূৰ্বে দুয়োগৰাকী শ্ৰমিকৰ নামত কামৰ ডিমাণ্ড দিয়াৰ কাম সম্পন্ন কৰাৰ বিনিময়ত দৰিদ্ৰ হিতাধিকাৰীজনৰ পৰা নগদ ২০০টকা কমিচনো সংগ্ৰহ কৰি শীঘ্ৰে যাবতীয় কাম কৰি দিয়াৰ আশ্বাস দিছিল।

কিন্তু আজি প্ৰায় এটা পষেক উকলাৰ সময়তো দৰিদ্ৰ পিতৃ-কণ্যাৰ ,জবকাৰ্ডৰ ধন নোসোমাল একাউন্টত। ইপিনে দুটা কিস্তিৰ ধনেৰে আঁচনিৰ গৃহ নিৰ্মাণৰ যথেষ্ট অগ্ৰগতি দিয়াৰ পাছত পুঁজিৰ নাটনি হোৱাত কাম বন্ধ কৰিবলগা হয় হিতাধিকাৰী গৰাকীয়ে। পাছত জবকাৰ্ডৰ পুঁজি উলিয়াবলৈ গৈ দেখে জবকাৰ্ডৰ ফুটা কড়ী এটাও সোমোৱা নাই।

পঞ্চায়তখনৰ সমীপৰ অন্য হিতাধিকাৰী সকলৰ সকলো জবকাৰ্ডৰ পুঁজি সোমোৱাৰ পাছত দুৰ্ভগীয়া গগৈ এই পুঁজিৰ পৰা বঞ্চিত হোৱাত  বৃহস্পতি বাৰে খণ্ড উন্নয়ন বিষয়া জিম্পি শইকীয়াক সাক্ষাৎ কৰি এইসন্দৰ্ভত মৌখিক অভিযোগ দিয়ে । কিন্তু দায়িত্বহীন বিষয়া গৰাকীয়ে হিতাধিকাৰীগৰাকীক একাউনটেণ্টৰ ওচৰলৈ আৰু একাউনটেণ্টে সচিব আৰু জি আৰ এছক লগ কৰিবলৈ কৈ গা এৰা দিয়ে।

প্ৰাপ্য পুঁজি বিচাৰি যোৱা হিতাধিকাৰীগৰাকীক এনেদৰে যন্ত্ৰণা ভোগোৱাৰ পাছত হিতাধিকাৰীগৰাকী গৈ সচিবগৰাকীক সাক্ষাৎ কৰি জানিব পাৰে যে তেওঁৰ প্ৰাপ্য পুঁজিৰ বিপৰীতে ডিমাণ্ড দিয়াই নাই পঞ্চায়তৰ পৰা। ডিমাণ্ড দিয়াৰ বাবদ ২০০ টকা দিয়াটো নিয়ম বুলি কৈ দৰিদ্ৰ হিতাধিকাৰী গৰাকীৰ পৰা সংগ্ৰহৰ পাছতো এনেদৰে উপেক্ষা কৰা অবিবেচকী কাণ্ডৰ পাছত পুনৰ বিডিঅ' শইকীয়াৰ ওচৰত গৈ এনে দায়িত্বহীন আচৰণৰ বাবে কটু মন্তব্য কৰি ক্ষোভ উজাৰে ।

ইয়াৰ প্ৰত্যক্ষদৰ্শী হয় একাংশ কৰ্মচাৰী আৰু অন্য নাগৰিক। দুৰ্ভগীয়া দৰিদ্ৰ হিতাধিকাৰী গৰাকীয়ে জনোৱা মতে এসপ্তাহৰ ভিতৰত জবকাৰ্ডৰ সমূদায় পুঁজি প্ৰদান কৰাৰ আশ্বাস দিছে খণ্ড উন্নয়ন বিষয়াই। যিটো অসম্ভৱ। নিজৰ পুৰণি ঘৰ ভাঙি চৰকাৰী ঘৰ নিৰ্মাণত দিনে নিশাই পিতৃ কণ্যাই ব্ৰতী হোৱাৰ পাছতো অহেতুক ভাবে প্ৰাপ্য পুঁজি মোকোলাই দিয়াত বিভাগে কৰা লৰা ধেমালিত অতিষ্ঠ দৰিদ্ৰ গগৈ ।

বিভাগৰ বেপৰোৱা নীতি আৰু  দায়িত্বহীনতাৰ পৰিণতিত নিৰ্ধাৰিত সময়ত আৱাস গৃহটো সম্পূৰ্ণ হোৱাত প্ৰতিবন্ধকতাৰ সৃষ্টি হৈছে । সমান্তৰাল ভাৱে দৰিদ্ৰ পৰিয়ালটো অনিশ্চয়তাৰ গ্ৰাসত নিমৰ্জিত হৈছে । খণ্ড উন্নয়ন বিষয়াৰ কাৰ্য্যালয়ৰ সন্মুখত আৰু পঞ্চায়ত কাৰ্যালয়ৰ প্ৰায় ২০০মিটাৰ দূৰত নিৰ্মিত এটা চৰকাৰী গৃহ নিৰ্মাণত বিভাগীয় এনে হেতালি দেখি শুনি জানিও নিচ্ছুপ খণ্ড উন্নয়ন বিষয়া শইকীয়া ।

দুৰ্নীতিগ্ৰস্তৰ সতে মিতিৰালি কৰি গাদী সুৰক্ষাত নিমগ্ন হোৱা এনেবোৰ পক্ষৰ বাবেই এতিয়া প্ৰাপ্য পুঁজি বিচাৰি খণ্ডটোৰ নিঃস্ব হিতাধিকাৰীয়ে হাঁহাকাৰ কৰিব লগা হৈছে । অৰ্ধ নিৰ্মিত ঘৰ সন্মুখত লৈ অনিশ্চিত দিন অতিবাহিত কৰিব লগা হৈছে ।