অনুদান লাভৰ পিছতো অনাদৃত শ্ৰীমন্ত শঙ্কৰদেৱ আৰু ৰজা নৰনাৰায়ণৰ মিলনস্থলী ঘিলাঝাৰী সত্ৰ

ডিজিটেল সংবাদ, হাউলী : মহাপুৰুষ শ্ৰীমন্ত শঙ্কৰদেৱ আৰু কোঁচ ৰজা নৰনাৰায়ণৰ প্ৰথম মিলনস্থলী হাউলীৰ গৌৰৱময় ইতিহাসৰ স্বাক্ষৰ বহনকাৰী ঐতিহাসিক ঘিলাঝাৰী সত্ৰৰ পুনৰ নিৰ্মাণ কাৰ্য্য আজিলৈ সম্পূৰ্ণ নোহোৱাত অঞ্চলটোৰ সচেতন মহলৰ মাজত তীব্ৰ প্ৰতিক্ৰিয়াৰ সৃষ্টি হৈছে। উল্লেখযোগ্য যে, অসম চৰকাৰে প্ৰযোজ্য কৰা "অসম দৰ্শন" আঁচনিৰ অধীনত সত্ৰখনৰ নামঘৰ নিৰ্মাণৰ বাবে পূৰ্বৰ সৰ্বানন্দ সোণোৱালৰ চৰকাৰৰ দিনতেই অসমৰ বিভিন্ন ধৰ্মীয় অনুষ্ঠানৰ লগতে ঘিলাঝাৰী সত্ৰ লৈও ১০ লাখ টকাৰ অনুদান আগবঢ়োৱা হৈছিল। 

অতি আচাৰ্যজনক আৰু পৰিতাপৰ বিষয় যে, ২০২০তে অনুদান লাভ কৰাৰ পিছতো সত্ৰখনৰ নামঘৰৰ নিৰ্মাণকাৰ্য্যৰ বাবে আগবঢ়োৱা ধন মুকলি হোৱাৰ পিছতো নিৰ্মাণ আজিলৈ নিৰ্মাণ কাৰ্য্য সম্পূৰ্ণ হৈ নুঠিল। এইক্ষেত্ৰত বৰপেটা জিলা আয়ুক্তগৰাকীৰ চৰম অনীহা আৰু অৱহেলাৰ বাবে আজিপৰ্যন্ত চৰকাৰে আগবঢ়োৱা ধনৰাশিৰ সদ্ব্যৱহাৰ নহ'ল। 

বদলি সংক্ৰান্তীয় সাধাৰণ বিষয় এটাক লৈ এগৰাকী সম পৰ্য্যায়ৰ থলুৱা বিষয়াৰ ওপৰত বীৰত্ব দেখুওৱা আয়ুক্তগৰাকীৰ চূড়ান্ত উদাসীনতাৰ বাবে সত্ৰ-নামঘৰসমূহৰ সৰ্বাংগীন উন্নয়নৰ বাবে গ্ৰহণ কৰা এখন অভিলাসী আঁচনি আজি ব্যৰ্থ হোৱাৰ পথত ! অসম সত্ৰ মহাসভাৰ বৰপেটা জিলা সমিতিৰ সভাপতি গোবিন্দ তালুকদাৰ আৰু প্ৰচাৰ সম্পাদক তথা সত্ৰ মহাসভাৰ উত্তৰ-পশ্চিম মণ্ডলৰ সাংস্কৃতিক সম্পাদক যুগান্ত বায়নে চৰকাৰৰ অনুদান লাভ কৰাৰ আজি ৪ বছৰ অতিক্ৰম কৰাৰ পিছতো সত্ৰখনৰ নামঘৰৰ নিৰ্মাণ কাৰ্য্য সম্পূৰ্ণ নোহোৱাত গভীৰ উদ্বেগ প্ৰকাশ কৰিছে। 

সত্ৰ মহাসভাত বৰপেটা জিলা সমিতিয়ে এই ক্ষেত্ৰত বৰপেটা জিলা আয়ুক্তগৰাকীয়ে দেখুওৱা অনীহা আৰু অৱহেলা কাৰ্য্যক তীব্ৰ ভাষাৰে গৰিহণা দিয়ে। লগতে আয়ুক্তগৰাকীয়ে সত্ৰ সংস্কৃতিৰ উত্তৰণৰ ক্ষেত্ৰত নেতিবাচক ভূমিকা গ্ৰহণ কৰিছে বুলি গুৰুতৰ অভিযোগ উত্থাপন কৰে। এই সম্পৰ্কত সমিতিয়ে মুখ্যমন্ত্ৰী ড০ হিমন্ত বিশ্ব শৰ্মাক সত্ৰখনৰ নিৰ্মাণকাৰ্য্য লেহেমীয়া হোৱা সন্দৰ্ভত এক তদন্তৰ ব্যৱস্থা গ্ৰহণ কৰিবলৈ আহ্বান জনাইছে।