ইজৰাইলী বাহিনীৰ গুলীত ২৩জন পেলাষ্টাইনী নাগৰিকৰ মৃত্যু...

ডিজিটেল ডেস্কঃ  গাজা ষ্ট্ৰিপত ইজৰাইলী বাহিনীৰ গুলীত খাদ্যৰ বাবে অপেক্ষাৰত অৱস্থাত কমেও ২৩ জন পেলেষ্টাইনী নাগৰিকৰ মৃত্যু হয়। স্থানীয় হাস্পতালৰ বিষয়া আৰু প্ৰত্যক্ষদর্শীৰ মতে, গাজাৰ নেটজাৰিম আৰু তেইনাৰ ওচৰত গাজা হিউমেনিটেৰিয়ান ফাউণ্ডেশ্যনৰ (জিএইচএফ) খাদ্য বিতৰণ কেন্দ্ৰৰ ওচৰত ভিৰ কৰা ক্ষুধার্ত পেলেষ্টাইনী নাগৰিকৰ ওপৰত ইজৰাইলী সৈন্যই গুলীচালনা কৰে। ইয়াৰ ফলত ২৭ জন আহত হয়।

প্রত্যক্ষদর্শী ইউছেফ আবেদে জনোৱা মতে, তেওঁ গুলীৰ  মাজত পলাই থকাৰ সময়ত তিনিজনক ৰক্তাক্ত অৱস্থাত দেখিছিল। ৰাষ্ট্ৰসংঘৰ মতে, মে' মাহৰ পৰা জিএইচএফৰ কেন্দ্ৰৰ ওচৰত ৮৫৯ জনৰ মৃত্যু হৈছে। ইজৰাইলী সৈন্যই "সন্দেহজনক” ব্যক্তিৰ ওপৰত গুলী চলোৱাৰ কথা স্বীকাৰ কৰিছে।

গাজাত ইজৰাইলৰ অৱৰোধ আৰু দুবছৰীয়া আক্ৰমণৰ ফলত খাদ্যৰ তীব্র সংকটৰ সৃষ্টি হৈছে। জিএইচএফৰ কেন্দ্ৰত খাদ্যৰ বাবে হাহাকাৰৰ মাজত এনে ঘটনাই নিৰাপত্তা আৰু মানৱ অধিকাৰ সম্পৰ্কীয় প্রশ্নৰ অৱতাৰণা কৰা পৰিলক্ষিত হৈছে।