গোবিন্দপুৰ মাদ্ৰাছাত প্ৰদেশ কংগ্ৰেছৰ নৱনিযুক্ত সভাপতি গৌৰৱ গগৈ

ডিজিটেল সংবাদ, শিলচৰঃ অসম প্ৰদেশ কংগ্ৰেছৰ নৱনিযুক্ত সভাপতি গৌৰৱ গগৈয়ে শেহতীয়া বৰাক ভ্ৰমণৰ সময়ত বৰাকৰ এখন বিশেষ মাদ্ৰাছাত উপস্থিত হয় ৷ এই সন্দৰ্ভত শিলচৰৰ ‘জুনাইদ মেহফিল টিভি’ নামৰ এটা ফেচবুক পেজে এক ভিডিঅ’ প্ৰকাশ কৰিছে ৷ বৰাক ভ্ৰমণৰ বিশেষ কাৰ্যসূচীৰ অংশ হিচাপে কংগ্ৰেছৰ সভাপতি তথা সংসদৰ উপ-দলপতি গৌৰৱ গগৈয়ে বৰাকৰ গোবিন্দপুৰত আমজামিঞা তুল ইছলামিয়া খান খায়ি মদনিপূৰ্ব মাদ্ৰাছাত উপস্থিত হোৱা বুলি ভিডিঅ’টোত উল্লেখ কৰা হৈছে ৷ 

সভাপতিগৰাকীয়ে মাদ্ৰাছাখনত উপস্থিত হৈ উত্তৰ-পূব ভাৰতৰ ইছলামিক গুৰু হজৰত মৌলনা আহমেদ চায়েদ চাহেব গোবিন্দপুৰিক সাক্ষাৎ কৰে ৷ হজৰত মৌলনা আহমেদ চায়েদ চাহেবে এই সাক্ষাৎ কেৱল ৰাজনৈতিক সৌজন্য নাছিল, বৰং এক মহৎ বাৰ্তাৰ বাহক আছিল বুলি ভিডি’টোত উল্লেখ কৰে ৷ ইপিনে, কংগ্ৰেছৰ নৱনিযুক্ত সভাপতি গৌৰৱ গগৈয়ে শেহতীয়া বৰাক ভ্ৰমণৰ সময়ৰ সকলো তথ্য বা ফটো, ভিডিঅ’ ছ’চিয়েল মিডিয়াত প্ৰকাশ কৰিছে যদিও উক্ত মাদ্ৰাছা ভ্ৰমণৰ ফটো বা ভিডিঅ’ ছ’চিয়েল মিডিয়াত প্ৰকাশ কৰা নাই ৷ কংগ্ৰেছ সভাপতিগৰাকীৰ মাদ্ৰাছা ভ্ৰমণৰ উক্ত ভিডিঅ’ সম্প্ৰতি পোহৰলৈ অহাত বিষয়টোক লৈ ৰহস্যৰ সৃষ্টি হৈছে।