নগাঁও জিলা পৰিষদ গঠন

ডিজিটেল সংবাদ, নগাঁও : মঙলবাৰে নগাঁও জিলা আয়ুক্ত কাৰ্যালয়ৰ সভাকক্ষত নগাঁও জিলা পৰিষদখন গঠন কৰা হয়। জিলা আয়ুক্ত কাৰ্যালয় সভাকক্ষত অনুষ্ঠিত হোৱা নৱনিৰ্বাচিত জিলা পৰিষদৰ প্ৰথমখন সভাত অসম চৰকাৰৰ ৰাজহ আৰু দূৰ্যোগ প্ৰশমন বিভাগৰ মন্ত্ৰী কেশৱ মহন্ত উপস্থিত থাকে।

জিলা আয়ুক্ত দেৱাশীষ শৰ্মাৰ অধ্যক্ষতাত অনুষ্ঠিত সভাখনত আগন্তুক পাঁচ বছৰৰ বাবে নগাঁও জিলা পৰিষদৰ সভাপতিৰ বাবে নগাঁও -বটদ্ৰৱা সমষ্টিৰ অন্তৰ্গত উৰিয়াগাঁও জিলা পৰিষদৰ সদস্যা গীতাঞ্জলি হাজৰিকাক আৰু কলিয়াবৰ আমবাগান জিলা পৰিষদৰ সদস্যা জয়শ্ৰী মণ্ডলক উপ-সভাপতি হিচাপে নিৰ্বাচিত কৰে। নৱনিৰ্বাচিত নগাঁও জিলা পৰিষদৰ সভাপতি, উপ-সভাপতি প্ৰমুখ্যে প্ৰতিগৰাকী সদস্যকে মন্ত্ৰী কেশৱ মহন্তই আন্তৰিক শুভেচ্ছা জ্ঞাপন কৰাৰ লগতে আগন্তুক দিনত ৰাইজৰ বাবে নিস্বাৰ্থভাৱে সেৱা আগবঢ়াই যাবলৈ আহ্বান জনায়।

উক্ত সভাখনত বিধায়কসকল ক্ৰমে ৰূপক শৰ্মা, শশীকান্ত দাস, নুৰুল হুদা, শিৱামণি বৰা, জিলা পৰিষদৰ নৱনিৰ্বাচিত সদস্যসকল, জিলা প্ৰশাসনৰ বিষয়াবৰ্গ উপস্থিত থাকে। সভাৰ অন্তত জিলা আয়ুক্ত দেৱাশীষ শৰ্মাই সুধাকণ্ঠ ডঃ ভূপেন হাজৰিকাৰ "মানুহে মানুহৰ বাবে" কালজয়ী গীতটো সকলোৰে লগত পৰিৱেশন কৰে।