ভাৰতত বৃদ্ধি পাইছে বনাঞ্চল আৰু গছৰ আচ্ছাদনঃ লোকসভাত কেন্দ্ৰীয় ৰাজ্যমন্ত্ৰীৰ তথ্য

ডিজিটেল ডেস্কঃ কেন্দ্ৰীয় পৰিৱেশ, বন আৰু জলবায়ু পৰিৱৰ্তন ৰাজ্যিক মন্ত্ৰী কীৰ্তি বৰ্ধন সিঙে সোমবাৰে লোকসভাত এক লিখিত উত্তৰত জনায় যে ভাৰতত বনাঞ্চল আৰু গছৰ পৰিসৰ যথাক্ৰমে ১৫৬.৪১ বৰ্গ কিলোমিটাৰ আৰু ১২৮৯.৪০ বৰ্গ কিলোমিটাৰলৈ বৃদ্ধি পাইছে। তেওঁ কয় যে ডেৰাডুনৰ ফৰেষ্ট ছাৰ্ভে অৱ ইণ্ডিয়াৰ দ্বাৰা প্ৰকাশিত "India State of Forest Report-2023 (ISFR-2023) অনুসৰি, ISFR-2021 ৰ তুলনাত এই বৃদ্ধি লক্ষ্য কৰা গৈছে।

লিখিত উত্তৰত কোৱা হৈছে যে, "বন আৰু গছৰ আচ্ছাদনৰ সুৰক্ষা আৰু পৰিচালনা প্ৰাথমিকভাৱে ৰাজ্য চৰকাৰ/কেন্দ্ৰশাসিত অঞ্চল প্ৰশাসনৰ দায়িত্ব। দেশৰ বন আৰু গছৰ আচ্ছাদনৰ সুৰক্ষা আৰু পৰিচালনাৰ বাবে ভাৰতীয় বন আইন, ১৯২৭; বন (সংৰক্ষণ আৰু সংবৰ্ধন) আধিনিয়ম, ১৯৮০; বন্যপ্ৰাণী (সুৰক্ষা) আইন, ১৯২৭; ৰাজ্য বন আইন; গছ সংৰক্ষণ আইন আৰু তাৰ অধীনত প্ৰণয়ন কৰা নিয়মাৱলীৰ দৰে আইনী ব্যৱস্থা আছে।"

ইয়াত আৰু উল্লেখ কৰা হৈছে যে অবৈধ গছ কটাৰ ঘটনা চিনাক্ত হোৱাৰ লগে লগে সম্পৰ্কিত অপৰাধীৰ বিৰুদ্ধে প্ৰাসঙ্গিক আইনৰ অধীনত সক্ষম আদালত বা কৰ্তৃপক্ষৰ সন্মুখত ব্যৱস্থা গ্ৰহণ কৰা হয়। অবৈধ গছ কটাৰ বিশদ তথ্য সম্পৰ্কিত ৰাজ্য চৰকাৰ/কেন্দ্ৰশাসিত অঞ্চল প্ৰশাসনে ৰক্ষণাবেক্ষণ কৰে। স্থানীয় বন কৰ্তৃপক্ষই অবৈধভাৱে কটা গছৰ মূল্যায়ন কৰে আৰু সম্পৰ্কিত তথ্য ৰাজ্য চৰকাৰ/কেন্দ্ৰশাসিত অঞ্চল প্ৰশাসনৰ নিৰ্দেশনা অনুসৰি বন অপৰাধ ৰেজিষ্টাৰত ৰক্ষণাবেক্ষণ কৰা হয়।

মন্ত্ৰীগৰাকীয়ে অবৈধ গছ কটা কাৰ্য ৰোধৰ বাবে চৰকাৰে গ্ৰহণ কৰা গুৰুত্বপূৰ্ণ পদক্ষেপসমূহৰ বিষয়েও উল্লেখ কৰে। এই পদক্ষেপসমূহৰ ভিতৰত আছে: 
•    বনকৰ্মীৰ দ্বাৰা নিয়মীয়া পেট্ৰ'লিং কৰি অবৈধ, নিষিদ্ধ কাৰ্যকলাপ ৰোধ কৰা। 
•    সুৰক্ষিত আৰু দুৰ্বল স্থানত পেট্ৰ'লিং কেম্প, চোৰাং চিকাৰ বিৰোধী কেম্প, চেকপোষ্ট আদি স্থাপন কৰা। 
•    সতৰ্কতা আৰু ফ্লায়িং স্কোৱাডৰ নিয়োগ। 
•    দুৰ্বল অঞ্চলত নিয়মীয়া পৰিদৰ্শন। 
•    যুটীয়া বন পৰিচালনা কাৰ্যসূচী, সজাগতা অভিযান, আৰু শিক্ষামূলক কাৰ্যসূচীৰ জৰিয়তে সম্প্ৰদায়ৰ সহযোগিতাৰে বন সুৰক্ষা কাৰ্যক্ৰম।