মুছলপুৰত অৱসৰপ্ৰাপ্ত শিক্ষক-কৰ্মচাৰীৰ বিদায় সভা আৰু পেঞ্চন পত্ৰ বিতৰণ অনুষ্ঠান

ডিজিটেল সংবাদ, বাক্সা : শিক্ষা বিভাগৰ এক প্ৰশংসনীয় পদক্ষেপ স্বৰূপে বাক্সা জিলাৰ বিদ্যালয়সমূহৰ পৰিদৰ্শকৰ কাৰ্যালয়ত অলপতে এক সম্বৰ্ধনা অনুষ্ঠানৰ আয়োজন কৰা হয়। অৱসৰ গ্ৰহণৰ পিছৰ সুবিধাসমূহ সময়মতে প্ৰদান কৰাটো নিশ্চিত কৰাৰ উদ্দেশ্যে অনুষ্ঠিত এই সম্বৰ্ধনা কাৰ্যসূচীত ১২ গৰাকী অৱসৰপ্ৰাপ্ত শিক্ষক তথা কৰ্মচাৰীক সম্বৰ্ধনা জনোৱা হয়।

সম্বৰ্ধনাৰ সমান্তৰালভাৱে অৱসৰৰ বাবে অত্যাৱশ্যকীয় সুবিধা যেনে- ছুটী, নগদ ধন, অনুমোদিত বীমাৰ পৰিমাণৰ নথি-পত্ৰ, পেঞ্চন পত্ৰ ইত্যাদি প্ৰদান কৰা হয়। অনুষ্ঠানত বাক্সা জিলাৰ বিদ্যালয়সমূহৰ পৰিদৰ্শক তথা জিলা শিক্ষা বিষয়া জেহেৰুল ইছলামে এক প্ৰেৰণাদায়ক ভাষণ প্ৰদান কৰি উপস্থিতসকলক অনুপ্ৰাণিত কৰে।

তেওঁ অৱসৰপ্ৰাপ্ত কৰ্মীসকলৰ নিষ্ঠা আৰু সেৱাক স্বীকৃতি দিয়াৰ লক্ষ্যৰে এই অনুষ্ঠানৰ আয়োজন কৰা বুলিও মত পোষণ কৰে।