ঢকুৱাখনাত আবকাৰী বিভাগৰ অভিযানত নষ্ট ৮০০ লিটাৰ চুলাই

ডিজিটেল সংবাদ ঢকুৱাখনাঃ ঢকুৱাখনা সমজিলাত আবকাৰী বিভাগৰ অবৈধ সুৰা বিৰোধী অভিযান অব্যাহত আছে। ঢকুৱাখনা আবকাৰী চক্ৰৰ চক্ৰ পৰিদৰ্শক পৰাগ চেতিয়াৰ নেতৃত্বত সমজিলাখনৰ ভিন্ন প্ৰান্তত চলি থকা অবৈধ চুলাই ভাটী উৎখাট অভিযান কালত বৃহৎ পৰিমাণৰ সামগ্ৰী উদ্ধাৰ কৰিবলৈ সক্ষম হয়। 

দলটোৱে অলপতে স্থানীয় গাঁওৰক্ষী বাহিনী আৰু আৰক্ষীৰ সহযোগিতাত বাঘচুক, মাতমৰা, কংকান চাপৰি, ১ নং বানটৌ, দীঘলা চাপৰি, জামুগুৰি, টাউন তিনিআলি, দীঘলী, মাহমৰা দীঘলী, চেনাই দীঘলী,পাতৃচুক, বেবেজীয়া, ২নং বানটৌ, টাউন তিনিআলি, হুজ গাঁও আদিত অভিযান চলাই। অভিযান কালত প্ৰায় ৮০০ লিটাৰ বিষাক্ত চুলাই প্ৰস্তুত কৰা পাজ, প্ৰায় ৫০ লিটাৰ চুলাই মদ,৮টা চুলাই প্ৰস্তুত কৰা সঁজুলি উদ্ধাৰ কৰি থলিতে বিনষ্ট কৰে ।

চুলাই বেপাৰীসকলে ঘন হাবি ,জংঘল, পৰিত্যক্ত এলেকাত গোপনে মজুত ৰখা বিষাক্ত পাজ আৰু চুলাই উদ্ধাৰ কৰি সকলো বাচন বৰ্তন ভাঙি চুৰমাৰ কৰে আৰু ভৱিষ্যতে এই অবৈধ বেহা নকৰিবলৈ সকীয়াই দিয়ে । উল্লেখযোগ্য যে মিচিং জনগোষ্ঠীয় জাতীয় সংগঠনে জনগোষ্ঠীটোৰ বসতি প্ৰধান গ্ৰামাঞ্চলত এনে মাৰাত্মক নিচাযুক্ত সামগ্ৰীৰ প্ৰচলন,উৎপাদন আৰু ব্যৱহাৰ নিষিদ্ধ ঘোষণা কৰি ব্যাপক অভিযান অব্যাহত ৰাখিছে ।

শেহতীয়া ভাবে জনগোষ্ঠীয় বসতি প্ৰধান অঞ্চলৰ পৰিবৰ্তে এতিয়া ঢকুৱাখনা নগৰৰ লগতে অজনজাতীয় বাসভূমিৰ কিছুমান গাঁৱত নিষিদ্ধ ড্ৰাগছৰ মুকলি বেহা আৰম্ভ হৈছে। ঢকুৱাখনা আৰক্ষীৰ চকুৰ সন্মুখেৰে এই মাৰাত্মক ড্ৰাগছৰ লগতে ভাংৰ সৰবৰাহ চলি থকা পৰিলক্ষিত হৈছে একাংশ বিপথগামী যুৱকৰ জৰিয়তে। 

ঢকুৱাখনাৰ এক গাঞ্জা বেপাৰীয়ে গোপনে এটা ভাড়া ৰুমলৈ বৃহৎ পৰিমাণৰ নিষিদ্ধ গাঞ্জা মজুত ৰখাৰ তথ্য উপলব্ধ হৈছে। অলপতে ৰাইজৰ হাতত ধৰা পৰা এজন গাঞ্জা ব্যবহাৰকাৰীয়ে মুকলিকৈ এই স্বীকাৰুক্তি দিয়াৰ পাছত পোহৰলৈ আহিছে এই ভয়ংকৰ বেহাৰ তথ্য ।

কৌশলগত কাৰণত ৰাইজে উক্ত বিশেষ ব্যক্তিজনৰ সাক্ষ্য গ্ৰহণ কৰি এৰি দি উদ্ধাৰ হোৱা ভাংখিনি মুকলিকৈ বিনষ্ট কৰে । তাৎপৰ্যপূৰ্ণ দিশ হ'ল ঢকুৱাখনা আৰক্ষীয়ে চোৰাং বনজ সম্পদৰ গাড়ী ধৰি অৰ্থ সংগ্ৰহৰ নিকৃষ্ট দৰ দামত নিমগ্ন হৈ এনেবোৰ স্পৰ্শকাতৰ দিশৰ প্ৰতি গ্ৰহণ কৰি আহিছে ৰহস্যজনক উদাসীন ভূমিকা।