দীৰ্ঘ দিনীয়া সমস্যাৰ অন্ত পেলাবলৈ নগাঁৱত ৮১ জন গাঁও প্ৰধানক নিৰ্বাচিত...

ডিজিটেল সংবাদ,নগাঁওঃ দীৰ্ঘ দিনে খালী হৈ থকা নগাঁও জিলাৰ ৮১ খন ৰাজহ গাঁৱৰ গাঁও প্ৰধান পদত মকৰল বাবে সাক্ষাতকাৰ সম্পন্ন কৰা হৈছে ৷ জিলাখনত বিগত সময়ত দীৰ্ঘকাল গাঁও প্ৰধান অবিহনে ৰাজহ গাঁও সমূহ পৰিচালিত হৈ আছিল ৷ ফলত গাঁও প্ৰধানৰ অনুপস্থিতিত বিভিন্ন সমস্যাৰ সৃষ্টি হৈছিল ৷

ৰাজ্য চৰকাৰৰ নিৰ্দেশ ক্ৰমে শেহতীয়াকৈ উপায়ুক্ত নৰেন্দ্ৰ কুমাৰ স্বাহে বিশেষ তৎপৰতা অৱলম্বন কৰি ৮৫ খন ৰাজহ গাঁৱৰ গাঁও প্ৰধান নিয়ুক্তিৰ ক্ষেত্ৰত পদক্ষেপ হাতত লয় ৷ প্ৰশাসনে জাৰি কৰা বিজ্ঞাপনৰ বিপৰীতে ৩৪৯ জন লোকে খালী পদৰ বিপৰীতে আবেদন কৰে ৷

আবেদন সমূহ পৰীক্ষা কৰি ২৯ খন আবেদন নাকচ কৰা হয় ৷ বিশেষকৈ গাঁও প্ৰধান পদৰ বাবে নিদ্ধাৰিত কৰা যোগ্যতা আৰু বয়সৰ বাবে ২৯ জনকৈ আবেদনকাৰীৰ আবেদন নাকচ হয় ৷

সৰ্বমুঠ ৩১০ খন আবেদন গ্ৰাহ্য কৰি উক্ত পদৰ বাবে সাক্ষাতকাৰ অনুষ্ঠিত কৰা হয় ৷ ইয়াৰে ২৯৬ জন আবেদনকাৰীয়ে সাক্ষাতকাৰত অৱৰ্তীৰ্ণ হয় ৷ সাক্ষাতকাৰৰ বাবে ৭খনকৈ পৰীক্ষা সমিতি গঠন কৰা হৈছিল ৷

ৰহা , কামপুৰ, ধিঙ, নগাঁও সদৰ, ৰূপহীহাট, চামগুৰি আৰু কলিয়াবৰ ৰাজহ চক্ৰ বিষয়া কাৰ্যালয়ৰ অধীনত গঠন কৰা পৰীক্ষা সমিতি সমূহৰ দ্বাৰা সাক্ষাতকাৰ অনুষ্ঠিত কৰা হৈছিল ।

ৰহা ৰাজহ চক্ৰৰ অধীনত ১০ জন, কামপুৰত ৩, ধিঙত ৭, নগাঁও সদৰত ২২, ৰূপহীহাটত ১, চামগুৰিত ২০ আৰু কলিয়াবৰত ১৮ জন গাঁও প্ৰধানক যোগ্যতাৰ ভিত্তিত নিৰ্বাচিত কৰা হয় ৷ পৰবৰ্তী পুলিচ ভেৰিফিকেশ্যনৰ পিছতে মনোনীত প্ৰাৰ্থী সকলক নিয়ুক্তি প্ৰদান কৰা হব ৷ গাঁও প্ৰধানৰ নিয়ুক্তিৰ ক্ষেত্ৰত নিকা আৰু স্বচ্চ ভাবে সাক্ষাতকাৰ অনুষ্ঠিত কৰি চৰকাৰী ভাবে লোৱা এই তৎপৰতাৰ বাবে গাঁও সমূহৰ দীৰ্ঘ দিনীয়া এক সমস্যা সমাধান হোৱাৰ দিশত ৷ অৱশ্যে আন চাৰিখন ৰাজহ গাঁৱৰ গাঁও প্ৰধান পদৰ বাবে প্ৰাৰ্থী নথকাত পদকেইটা খালী হৈ থাকে ৷