নগাঁও বিশ্ববিদ্যালয়ত মুখ্যমন্ত্ৰীৰ ‘নিযুত মইনা’ আঁচনিৰ প্ৰ-পত্ৰ বিতৰণ অনুষ্ঠান

ডিজিটেল সংবাদ ,নগাঁও : মুখ্যমন্ত্ৰীৰ বহু অভিলাসী নিযুত মইনা আঁচনিৰ শুভাৰম্ভণী অনুষ্ঠানৰ লগত সংগতি ৰাখি নগাঁও বিশ্ববিদ্যালয়তো প্ৰ-পত্ৰ বিতৰণ অনুষ্ঠান আড়ম্বৰপূৰ্ণভাৱে আয়োজিত হয়। গুৱাহাটী বিশ্ববিদ্যালয়ত কেন্দ্ৰীয়ভাৱে অনুষ্ঠিত এই শুভাৰম্ভণি অনুষ্ঠান নগাঁও বিশ্ববিদ্যালয়ত দৃশ্য-শ্ৰব্য মাধ্যমত পোনপটীয়া সম্প্ৰচাৰ হয়।

নগাঁও বিশ্ববিদ্যালয়ৰ দৰ্শন বিভাগৰ অধ্যাপক ড০ নৱপ্ৰসাদ নাথে আঁত ধৰা নগাঁও মুখ্যমন্ত্ৰীৰ ‘নিযুত মইনা আঁচনি’ৰ প্ৰ-পত্ৰ বিতৰণ অনুষ্ঠানত মুখ্য অতিথি হিচাপে অংশগ্ৰহণ কৰে নগাঁও-বটদ্ৰৱা সমষ্টিৰ বিধায়ক ৰূপক শৰ্মাই। মুখ্য অতিথিৰ ভাষণত ৰূপক শৰ্মাই মুখমন্ত্ৰীৰ নিযুত মইনা আঁচনিয়ে দৰিদ্ৰ পৰিয়ালৰ ছাত্ৰ-ছাত্ৰীক কেনেদৰে উপকৃত কৰিব, সমাজৰ পৰা বাল্য বিবাহ আঁতৰ কৰাত কেনেদৰে সহায় কৰিব আৰু ছাত্ৰীসকলৰ শিক্ষাৰ বাবে নিযুত মইনা আঁচনি কিদৰে সহায়ক হ’ব, সেই সম্পৰ্কে বক্তব্য প্ৰদান কৰে।

নিযুত মইনা আঁচনিৰ পৰা পাবলগীয়া ধন ছাত্ৰীসকলে যাতে সৎ কামত তথা  শিক্ষাৰ কামত ব্যৱহাৰ কৰে তাৰ বাবে বিধায়ক ৰূপক শৰ্মাই আহ্বান জনায়। গুৱাহাটী বিশ্ববিদ্যালয়ত আয়োজিত অসম চৰকাৰৰ মুখ্যমন্ত্ৰীৰ নিযুত মইনা আঁচনিৰ শুভাৰম্ভণি অনুষ্ঠানৰ পোনপটীয়া সম্প্ৰচাৰ নগাঁও বিশ্ববিদ্যালয়ত বৰ্ণাঢ্যভাৱে আয়োজন কৰি ছাত্ৰীসকলৰ মাজত ‘নিযুত মইনা’ আঁচনিৰ প্ৰ-পত্ৰ বিতৰণ কৰা হয়।

এই অনুষ্ঠানত মুখ্য অতিথি হিচাপে উপস্থিত থাকে ক্ৰমে নগাঁও জিলাৰ আয়ুক্ত দেৱাশীষ শৰ্মা ,অতিৰিক্ত আয়ুক্ত পংকজ কুমাৰ নাগবংশী, নগাঁও সদৰ  চক্ৰ বিষয়া ঋষিকেষ বৰুৱা, নগাঁও জিলাৰ বিদ্যালয়সমূহৰ পৰিদৰ্শক মৃদুল নাথ। বৰ্ণাঢ্যৰূপত আয়োজিত এই কাৰ্যসূচীত উপস্থিত থাকে নগাঁও বিশ্ববিদ্যালয়ৰ উপাচাৰ্য ড০ হিতেশ ডেকা, নগাঁও বিশ্ববিদ্যালয়ৰ পঞ্জীয়ক ধ্ৰুৱজ্যোতি বৰুৱা, অধ্যাপক-অধ্যাপিকা, অনা শিক্ষক কৰ্মচাৰী আৰু সহস্ৰাধিক ছাত্ৰী।