ঢকুৱাখনাৰ নতুন বি ডি অ' হিচাপে চালেহ হেদায়ত হুছেইনক দায়িত্ব

ডিজিটেল সংবাদ ঢকুৱাখনা: ৰাজ্য চৰকাৰৰ পঞ্চায়ত আৰু গ্ৰামোন্নয়ন বিভাগৰ এক নিৰ্দেশনা যোগে ঢকুৱাখনা উন্নয়ন খণ্ডত এগৰাকী নতুন খণ্ড উন্নয়ন বিষয়া নিযুক্তি দিয়া হৈছে। নব নিযুক্ত খণ্ড উন্নয়ন বিষয়াগৰাকী হৈছে ছালেহ হেদায়ত হুছেইন।

তিনিচুকীয়া জিলাৰ ইটাখুলি উন্নয়ন খণ্ডৰ খণ্ড উন্নয়ন বিষয়া হিচাবে কৰ্মৰত হুছেইনক পঞ্চায়ত আৰু গ্ৰামোন্নয়ন বিভাগৰ সচিব পুষ্পাঞ্জলি দাসৰ ECP No 683210/ DFA /1346939-A নম্বৰৰ নিৰ্দেশনা যোগে ঢকুৱাখনা উন্নয়ন খণ্ডত নিযুক্তি দিছে। উল্লেখযোগ্য যে ঢকুৱাখনা উন্নয়ন খণ্ডৰ ভাৰপ্ৰাপ্ত খণ্ড উন্নয়ন বিষয়া গৌৰাংগ দত্তক উক্ত দায়িত্বৰ পৰা অব্যাহতি দি ঢকুৱাখনা সমজিলা প্ৰশাসনৰ সহকাৰী আয়ুক্ত হিচাবে কাৰ্যপালনৰ নিৰ্দেশ দিয়া হৈছে। 

দত্তৰ কাৰ্যকালত বিগত সময়ত গ্ৰামোন্নয়ন পুঁজিৰ ব্যাপক অপব্যৱহাৰ হোৱাৰ অভিযোগ উত্থাপিত হৈছিল। উন্নয়ন খণ্ডটোৰ বিভিন্ন পঞ্চায়তত প্ৰধান মন্ত্ৰী আৱাস যোজনা (গ্ৰামীণ)ৰ ৰূপায়ণৰ বেলিকা ব্যাপক অমিয়ম হোৱা, জবকাৰ্ডৰ গৰাকী প্ৰাপ্যৰ পৰা বঞ্চিত হোৱাৰ অভিযোগ ভুক্তভোগীয়ে উত্থাপন কৰি আহিছিল। 

শেহতীয়া ভাবে এইগৰাকী বিষয়াক অব্যাহতি দিয়াৰ পাছত উন্নয়ন খণ্ডটোৰ দুৰ্নীতি ৰোধৰ ক্ষেত্ৰত নৱনিযুক্ত বিষয়াগৰাকীয়ে কেনে কঠোৰ ভূমিকা পালন কৰে সেয়া লক্ষণীয় হব।