দিল্লীৰ খবৰঃ আপৰ মুখ্যমন্ত্ৰীৰ পদত্যাগ, ১৪ফেব্ৰুৱাৰীৰ পাছতহে বিজেপিৰ নতুন মুখ্যমন্ত্ৰী...

ডিজিটেল ডেস্কঃ  দিল্লীত শোচনীয় পৰাজয়ৰ পাছত উপ ৰাজ্যপাল (লেফৰ্টনেল জেনেৰেল)ৰ ওচৰত পদত্যাগ পত্ৰ প্ৰদান কৰে আপৰ মুখ্যমন্ত্ৰী আতিশী মাৰ্লেনাই। পদত্যাগ পত্ৰ প্ৰদান কৰাৰ পাছতে আপৰ অধ্যক্ষ অৰবিন্দ কেজৰিৱালৰ বাসগৃহত আপৰ নৱনিৰ্বাচিত বিধায়ক বৈঠকত মিলিত হৈছে।

আনফালে দিল্লীত পৰৱৰ্তী মুখ্যমন্ত্ৰী কোন হ'ব, তাক লৈ বিজেপিৰ ভিতৰ চৰাত আৰম্ভ হৈছে কুছকাৱাজ। দেওবাৰে পুৱাৰ ভাগতে অমিত শ্বাহক সাক্ষাত কৰে বিজেপিৰ নৱনিৰ্বাচিত বিধায়ক প্ৰৱেশ বাৰ্মা, কৈলাশ গেহলট, অৰবিন্দৰ সিং আৰু ৰাজকুমাৰ চৌহানে। প্ৰাপ্ত খবৰ অনুসৰি, এই ৪গৰাকী বিধায়কৰ মাজৰ পৰাই কোনোবা এজন হব পাৰে দিল্লীৰ পৰৱৰ্তী মুখ্যমন্ত্ৰী। অৱশ্যে মুখ্যমন্ত্ৰীত্বৰ দৌৰত আগবাঢ়ি আছে প্ৰৱেশ বাৰ্মা।

দিল্লীৰ মুখ্যমন্ত্ৰীত্বক লৈ অমিত শ্বাহৰ সৈতে ইখন পাছত সিখন বৈঠকত দিল্লীৰ বিধায়কসকল বহিছে যদিও প্ৰধানমন্ত্ৰী নৰেন্দ্ৰ মোডীৰ বিদেশ ভ্ৰমণৰ পাছতহে মুখ্যমন্ত্ৰীৰ নাম চূড়ান্ত কৰা হ'ব বুলি চৰ্চা হৈছে। উল্লেখ কৰা প্ৰয়োজন যে, প্ৰধানমন্ত্ৰী নৰেন্দ্ৰ মোডী ১২ আৰু ১৩ফেব্ৰুৱাৰীত আমেৰিকা ভ্ৰমণলৈ যাব। তাৰ পাছতহে ১৪ফেব্ৰুৱাৰীত দেশলৈ উভতিব প্ৰধানমন্ত্ৰীগৰাকী।

প্ৰধানমন্ত্ৰী গৰাকী পুনৰ দেশলৈ উভতাৰ পাছতহে দিল্লীৰ মুখ্যমন্ত্ৰীৰ নাম ঘোষণা হ'ব বুলি চৰ্চা হৈছে। এনে হলে দিল্লীৰ মুখ্যমন্ত্ৰীৰ নাম চূড়ান্ত হ'ব ১৪ফেব্ৰুৱাৰীৰ পাছতহে। অৱশ্যে এই কথাক লৈ বিজেপিয়ে কোনো আনুষ্ঠানিক ঘোষণা কৰা নাই।