দেশৰ সেনাক সুৰক্ষা প্ৰদানৰ উদ্দেশ্যে ১৩টা চুক্তিত মোহৰ মাৰিলে প্ৰতিৰক্ষা মন্ত্ৰালয়ে...

ডিজিটেল ডেস্কঃ  সীমা অতিক্ৰম কৰি সন্ত্ৰাসবাদ প্ৰতিহত কৰাৰ ক্ষেত্ৰত ভাৰতীয় সেনাৰ কাৰ্যকৰী প্ৰস্তুতি বৃদ্ধিৰ বাবে জৰুৰীকালীন ক্ৰয় ব্যৱস্থাৰ অধীনত প্ৰতিৰক্ষা মন্ত্ৰালয়ে ১৯৮০ কোটি টকাৰ ১৩টা চুক্তি সম্পাদন কৰিছে। 

অধিগ্ৰহণ কাৰ্যসূচীৰ অধীনত সেনাৰ সংহত ড্ৰ’ন ধৰা পেলোৱা আৰু নিষেধাজ্ঞা ব্যৱস্থা যথেষ্ট বৃদ্ধি কৰা হৈছে বুলি বিষয়াসকলে জনায়। জম্মু-কাশ্মীৰত পাকিস্তান সমৰ্থিত সন্ত্ৰাসবাদক শক্তিশালীভাৱে প্ৰতিহত কৰিবলৈ ভাৰতীয় সেনাৰ সন্ত্ৰাসবাদ বিৰোধী গ্ৰীড বৃদ্ধি কৰি আহিছে ভাৰতে।

পহলগাম সন্ত্ৰাসবাদী আক্ৰমণৰ প্ৰতি সঁহাৰি জনাই নতুন দিল্লীয়ে যোৱা ৭ মে’ত পাকিস্তানৰ ভূখণ্ডৰ ৯টা সন্ত্ৰাসবাদী আন্তঃগাঁথনিত নিখুঁত আক্ৰমণ চলাইছিল। প্ৰতিৰক্ষা মন্ত্ৰালয়ে কয় যে, তেওঁলোকে নিম্ন স্তৰৰ লঘু ৰাডাৰ, অতি কম দূৰত্বৰ বায়ু প্ৰতিৰক্ষা মিছাইল আৰু লঞ্চাৰ, দূৰৈৰ পৰা চলাচল কৰা বিমানৰ লগতে বিভিন্ন শ্ৰেণীৰ ড্ৰ’ন, বুলেট প্ৰুফ জেকেট আৰু বেলিষ্টিক হেলমেটও ক্ৰয় কৰিছে।

এই ক্ষেত্ৰত মন্ত্ৰালয়ে কয় যে, ভাৰতীয় সেনাবাহিনীৰ বাবে সামগ্ৰিকভাৱে অনুমোদিত ২০০০ কোটি টকা ব্যয়ৰ বিপৰীতে ১৯৮১.৯০ কোটি টকাৰ এই চুক্তিসমূহ চূড়ান্ত কৰা হৈছে। জৰুৰীকালীন ক্ৰয়ৰ আদেশৰ অধীনত দ্ৰুত পদ্ধতিৰ জৰিয়তে কাৰ্যকৰী কৰা এই অধিগ্ৰহণৰ লক্ষ্য হৈছে সন্ত্ৰাসবাদ বিৰোধী পৰিৱেশত নিয়োজিত সৈন্যৰ বাবে পৰিস্থিতি সজাগতা, মাৰাত্মকতা, গতিশীলতা আৰু সুৰক্ষা বৃদ্ধি কৰা।