হাস্য-ব্যংগ বাৰ্তালোচনী “ভাকুটকুট”ৰ ৩২ সংখ্যক প্ৰতিষ্ঠা দিৱস উদযাপন

ডিজিটেল সংবাদ, ধেমাজি : বিগত বৰ্ষসমূহৰ দৰে এইবছৰো ধেমাজিৰ পৰা প্ৰকাশিত হাস্য-ব্যংগ বাৰ্তালোচনী ”ভাকুটকুট”ৰ ৩২ সংখ্যক প্ৰতিষ্ঠা দিৱসটি গাম্ভীৰ্যতাপূৰ্ণ কাৰ্য্যসূচীৰে ভাকুটকুট প্ৰকাশন গোষ্ঠীৰ উদ্যোগত এদিনীয়াকৈ দেওবাৰে ধেমাজি জিলা মহিলা সমিতিৰ ভৱনত অনুষ্ঠিত হয় ৷ কাৰ্য্যসূচী অনুসৰি পুৱা ৮.৩০ বজাত ভাকুটকুট প্ৰকাশন গোষ্ঠীৰ সহকাৰী সম্পাদক দিপক ভৰালী নেতৃত্বত সামূহিক চাফাই অভিযানেৰে প্ৰতিষ্ঠা দিৱসৰ শুভাৰম্ভণি কৰা হয় ৷ 

পুৱা ৯ বজাত পতাকা উত্তোলন কৰে বিশিষ্ট ব্যংগ সাহিত্যিক আৰু সাহিত্যিক পেঞ্চনাৰ বিমল ৰাজখোৱাই ৷ পুৱা ৯.৩০ বজাত স্মৃতি তৰ্পন সমাপন কৰে প্ৰবীন সমাজসেৱক তথা ভাকুটকুটৰ কোষাধ্যক্ষ ৰিণী তামুলীয়ে ৷ 

দুপৰীয়া ১২ বজাত “ চিৰ চেনেহী মোৰ ভাষা জননী ”গীতেৰে প্ৰতিষ্ঠা দিৱসৰ মুকলি সভা উদ্ধোধন কৰা হয় ৷ ৰাষ্ট্ৰীয় কৃতী শিক্ষয়ত্ৰী তথা ধেমাজি জিলা সাহিত্য সভাৰ প্ৰাক্তন সভাপতি বিনীতা চৌধুৰী গাৰোদিয়া সভাপতিত্বত মুকলি সভা অনুষ্ঠিত হয় ৷ 

জ্যেষ্ঠ সাংবাদিক বীৰেণ কুমাৰ কোঁৱৰ আৰু সমাজ কল্যাণ বিভাগৰ অৱসৰপ্ৰাপ্ত বিষয়া কুঞ্জ বড়াই আঁত ধৰা সভাখনৰ উদ্দেশ্যে ব্যাখ্যা কৰে অৱসৰপ্ৰাপ্ত শিক্ষয়িত্ৰী তথা ভাকুটকুট প্ৰকাশন গোষ্ঠীৰ সম্পাদক কৰবী দেউৰীয়ে ৷ সভাত অসম হাস্য -ব্যংগ সাহিত্য মঞ্চ গঠন আৰু হাস্য-ব্যংগ সাহিত্যৰ সম্পৰ্কে বক্তব্য প্ৰদান কৰে মৰিধল মহাবিদ্যালয়ৰ অসীয়া বিভাগৰ সহযোগী অধ্যাপিকা ড° কবিতা গগৈ, অনন্ত কৃষ্ণ মহন্ত, সাহিত্যিক উমেশ চেতিয়া , ভূৱন কটকী , ভূপেন দত্ত , বিপুল কুমাৰ বৰুৱা আৰু তেজপুৰৰ সুৰেখা দেউৰীকে ধৰি বহুকেইজন বিশিষ্ট ব্যক্তিয়ে ৷ 

সভাত এইবাৰ ৩২ সংখ্যক প্ৰতিষ্ঠা দিৱসৰ উপলক্ষে প্ৰকাশ কৰি উলিওৱা এই সংখ্যাৰ আৰ্কষণ “ভাকুটকুট”ৰ হাস্য-ব্যংগ বাৰ্তালোচনী উন্মোচন কৰে জ্যেষ্ঠ সাংবাদিক তথা সাহিত্যিক পেঞ্চনাৰ উমেশ চেতিয়াই ৷ সভাত এইবাৰ “ভাকুটকুট”ৰ বাৰ্তালোচনীৰ প্ৰথম প্ৰকাশক প্ৰয়াত পুষ্পলতা ৰাজখোৱা সোৱঁৰণী বঁটা বৰ্ষটোৰ শ্ৰেষ্ঠ ব্যংগ লেখক হিচাপে গুৱাহাটীৰ মিহিৰ কুমাৰ বৰুৱাক প্ৰদান হয় ৷ 

ভাকুটকুট বাৰ্তালোচনী প্ৰতিষ্ঠাক তথা ব্যংগ লেখক বিমল ৰাজখোৱা পত্নীৰ নামত উছৰ্গা কৰা এই বঁটাত নগদ দহ হেজাৰ টকাৰ লগতে ফুলাম গামোছা , স্মাৰক আৰু কিতাপৰ টোপোলা প্ৰদান কৰা হয় ৷ বৰ্ষটোৰ দ্বিতীয় শ্ৰেষ্ঠ বঁটা হিচাপে প্ৰয়াত যুৱ ব্যৱসায়ী মানস প্ৰতীম তামুলী সোঁৱৰণী বঁটা মৰানৰ ব্যংগ লেখক দূৰ্গাধৰ দিহিঙ্গীয়াক আৰু প্ৰয়াত ভূপেন সন্দিকৈ সোঁৱৰণী বঁটা তেজপুৰৰ দেৱ দাসক প্ৰদান কৰা হয় ৷ 

ধেমাজিৰ জ্যেষ্ঠ মহিলা ৰিণী তামুলী আৰু অৱসৰপ্ৰাপ্ত শিক্ষয়িত্ৰী তথা কবি নিবেদিতা বড়া সন্দিকৈয়ে আগবঢ়োৱা এই দুয়োটা বঁটাত নগদ পাঁচ হেজাৰকৈ টকা লগতে, ফুলাম গামোছা , স্মাৰক একোটাকৈ কিতাপৰ টোপোলাৰে প্ৰদান কৰা হয় ৷ সভাত বিশিষ্ট অতিথি হিচাপে উপস্থিত থাকে জীতেন চুতীয়া, পুন্যেশ্বৰ বৰগোহাঁই , বিমলা গগৈ গোহাঁই , পদ্মেশ্বৰ দিহিঙ্গীয়া, উমেশ খাণ্ডেলীয়া , প্ৰেমানন্দ তালুকদাৰ , বিনোদ গগৈ , নিলাম্বৰ দত্ত, দিলীপ কুমাৰ হাজৰিকা , ঘন কৃষ্ণ  বৰগোহাঁই , অশ্বিনী কুমাৰ দুৱৰা, বন্দনা দত্ত হাজৰিকা , ড° অচ্যুৎ গগৈ , নিৰমা বৰুৱা আৰু জীতেন ৰাজকোঁৱৰকে ধৰি বহু কেইগৰাকী বিশিষ্ট ব্যক্তি ৷