বকোত সমবায় সমিতিৰ সম্পাদকক ঘেৰাও...

ডিজিটেল সংবাদ,বকোঃ কামৰূপ জিলাৰ বকোত শনিবাৰে একাংশ মহিলাই সুলভ মূল্যৰ দোকানৰ পৰা বিনামূলীয়া চাউল নোপোৱাৰ অভিযোগ তুলি সমবায় সমিতিৰ সম্পাদকক ঘেৰাও কৰা ঘটনাই অঞ্চলটোত চাঞ্চল্যৰ সৃষ্টি কৰিছে ।

ঘটনাৰ বিৱৰণী মতে ৪৮নং বকো বিধান সভাসমষ্টিৰ অন্তৰ্গত বন্দাপাৰাস্থিত সুলভ মূল্য আৰু খুচুৰা সা-সামগ্ৰী বিক্ৰীৰ কেন্দ্ৰ বেকেলী গাঁও পঞ্চায়ত সমবায় সমিতি লিমিটেডৰ অধীনৰ এজেন্টৰ পৰা পৰিয়ালবোৰে কেইবামাহো ধৰি বিনামূলীয়া চাউল পোৱা নাই ।

চাউল পোৱাৰ বাবে পৰিয়ালবোৰে এজেন্টক ১০০ টকাকৈ জমা দিয়ে । কিন্ত ইয়াৰ পিচতো পৰিয়ালবোৰে চাউল নোপোৱাত ক্ষোভিত হৈ আজি একাংশ মহিলাই বেকেলী গাঁও পঞ্চায়ত সমবায় সমিতি লিমিটেডৰ কাৰ্যালয়লৈ যায় ।

মহিলা সকলে কাৰ্যালয়ত প্ৰথমে সমবায় সমিতিখনৰ সভাপতিগৰাকীক বিচাৰে । কিন্ত সেই সময়ত সমবায় সমিতিখনৰ সভাপতিগৰাকী কাৰ্যালয়ত নথকাত ক্ষোভিত মহিলা সকলে সম্পাদক নৰেন্দ্ৰ ৰাভাক ঘেৰাও কৰে ।

মহিলা সকলে সম্পাদকগৰাকীক বিনামূলীয়া চাউল নোপোৱাৰ ক্ষোভত বিভিন্ন প্ৰশ্ন অৱতাৰণা কৰে । বেকেলী গাঁও পঞ্চায়ত সমবায় সমিতিৰ সম্পাদকগৰাকীয়ে চৰকাৰে যোগানধৰা প্ৰধানমন্ত্ৰী অন্ন সুৰক্ষা যোজনাৰ অধীনত বিনামূলীয়া চাউল গুৱাহাটীৰ পৰা অনাৰ নামত যাতায়ত খৰছ নিদিয়ে বাবে ৬ বাৰকৈ চাউল আৰু গৰীৱ কল্যাণ নিধি অন্ন সুৰক্ষাৰ বিনামূলীয়া চাউল গুৱাহাটীৰ পৰা কঢ়িয়াই আনিবলৈ প্ৰতি কুইণ্টলত ১০০ টকাকৈ চৰকাৰে দিয়ে আৰু ১০০ টকাৰে চাউলখিনি আনিব নোৱাৰি বুলি জনায় ।

যাৰবাবে সমবায় সমিতিখনে মুঠ ৬ বাৰ বিনামূলীয়া চাউল ৰাইজক যোগান ধৰিব পৰা নাই বুলি জানিবলৈ দিয়ে । ক্ষুদ্ধ মহিলাসকলে সম্পাদকগৰাকীৰ কথাত ক্ষান্ত নহৈ এই ক্ষেত্ৰত কামৰূপ জিলাৰ উপায়ুক্তৰ কাষ চপাৰ সংকল্প গ্ৰহণ কৰে ।