কাৰ নেতৃত্বত বিহাৰ নিৰ্বাচনত প্ৰতিদ্বন্দ্বিতা কৰিব এন ডি এয়ে ?

ডিজিটেল ডেস্কঃ  বিহাৰত বিধানসভা নিৰ্বাচন সন্দৰ্ভত ৰাজনৈতিক কাৰ্যকলাপ তীব্ৰতৰ হৈ উঠিছে। চলিত বৰ্ষৰ ছেপ্টেম্বৰ-অক্টোবৰ মাহত ৰাজ্যত অনুষ্ঠিত হ’ব বিধানসভা নিৰ্বাচন। যাৰ বাবে প্ৰস্তুতিত ব্যস্ত সকলো ৰাজনৈতিক দল আৰু মিত্ৰজোঁট।

বৰ্তমান বিহাৰত বিজেপি, জেডিইউ, এলজেপি, জিতন ৰাম মাঞ্জীৰ হাম আৰু আৰএলএছপিৰে গঠিত এনডিএ চৰকাৰ। যাক নেতৃত্ব দি আহিছে জে ডি ইউ নেতা নীতিশ কুমাৰে। দীৰ্ঘদিন ধৰি ৰাজ্যৰ বাঘজৰী দখল কৰি আহিছে নীতিশ কুমাৰে।

কিন্তু এতিয়া প্ৰশ্ন উত্থাপন হৈছে যে, পৰৱৰ্তী নিৰ্বাচনত এন ডি এৰ নেতৃত্ব কোনে ল'ব ? এই সন্দৰ্ভত আলোচনাত মিলিত হৈছে দলীয় নেতৃত্ব সকল। 

আনহাতে ২০২০ চনৰ বিহাৰ বিধানসভা নিৰ্বাচনত নীতিশ কুমাৰে এয়া তেওঁৰ অন্তিম নিৰ্বাচন বুলি ঘোষণা কৰিছিল। ২০২০ৰ বিধানসভা নিৰ্বাচনী প্ৰচাৰৰ অন্তিম পৰ্যায়ৰ সময়ত পূৰ্ণেয়াত অনুষ্ঠিত এক সমাৱেশৰ সময়ত আৱেগিক হৈ পৰাৰ সময়তে এই ঘোষণা কৰিছিল নীতিশ কুমাৰে।

সম্প্ৰতি ৰাজ্যখনে পৰৱৰ্তী নিৰ্বাচনৰ বাবে প্ৰস্তুতি চলাইছে। প্ৰাপ্ত তথ্য অনুসৰি, নীতিশ কুমাৰৰ পক্ষৰ বহু নেতাই তেওঁক পুনৰ নিৰ্বাচন খেলিবলৈ আহ্বান জনাইছে। বিগত কিছুদিন ধৰি সক্ৰিয় হৈ থকা নীতিশৰ পুত্ৰ নিশান্তেও মুকলিকৈ এই আহ্বানৰ সমৰ্থন জনাইছে।