মা কামাখ্যা টি ইণ্ডাষ্ট্ৰীৰ উদ্যোগত সজাগতা সভা...

ডিজিটেল সংবাদ, ছয়দুৱাৰ: গহপুৰ সমজিলাৰ বৃহত্তৰ হেলেম অঞ্চলৰ টকৌবাৰী গাঁও পঞ্চায়তৰ অন্তৰ্গত ফাটিয়াবাৰীস্থিত অন্যতম বটলিফ চাহ ফেক্টৰী "মা কামাখ্যা টি ইণ্ডাষ্ট্ৰী"ত শণিবাৰে দিনযোৰা কাৰ্য্যসূচীৰে এখন সজাগতা সভা অনুষ্ঠিত হয়।"চাহ গছত কীটনাশক আৰু ৰাসায়নিক দ্ৰব্যৰ  প্ৰয়োগ আৰু ক্ষুদ্ৰ চাহ খেতিয়ক,কেঁচা চাহ পাত যোগানকাৰীৰে অন্তৰংগ আলাপ" শীৰ্ষক সজাগতা সভাখনত সভাপতিত্ব কৰে পূৱ বিহালী উচ্চতৰ মাধ্যমিক বিদ্যালয়ৰ শিক্ষক তথা প্ৰতিষ্ঠিত ক্ষুদ্ৰ চাহ খেতিয়ক গকুল মহন্তই।

অসমীয়া প্ৰতিদিনৰ বিহালীৰ সাংবাদিক দীপক শৰ্মাই আঁত ধৰা সজাগতা সভাখনত সমল ব্যক্তি হিচাপে উপস্থিত থাকে নৰ্থ বেংকৰ টি ৰিৰ্চাছ এচছিয়েছনৰ এডভাইছৰি অফিচাৰ তথা ইন চাৰ্জ কৃষ্ণ বৰা,এচিছটেণ্ট এডভাইছৰি অফিচাৰ বিশ্বজ্যোতি বৰদলৈ আৰু ভাৰতীয় চাহ ব'ৰ্ডৰ বিশ্বনাথ খণ্ডৰ চাহ উন্নয়ন বিষয়া বিশ্বজিৎ গগৈ।উক্ত সমল ব্যক্তি সকলে সভাখনত ভাষণ প্ৰদান কৰি উপস্থিত ক্ষুদ্ৰ চাহ খেতিয়ক আৰু কেঁচা চাহ পাত যোগানকাৰী সকলক কয় যে চাহ গছত নিষিদ্ধ কীটনাশক আৰু ৰাসায়নিক দ্ৰব্যৰ প্ৰয়োগে মানৱ সমাজৰ স্বাস্থ্যৰ প্ৰতি প্ৰচণ্ড ভাবুকি কঢ়িয়াই অনাটো অতি স্বাভাৱিক বিষয়।

সেয়েহে কোনো কাৰণতে চাহ গছত নিষিদ্ধ কীটনাশক আৰু ৰাসায়নিক দ্ৰব্য প্ৰয়োগ নকৰিবলৈ তেওঁলোকে তথ্য সহকাৰে ভাষণৰ জৰিয়তে ক্ষুদ্ৰ চাহ খেতিয়ক সকলৰ প্ৰতি আহ্বান জনায়।তদুপৰি-চাহ গছত অনুমোদিত কীটনাশক, ভিটামিন, ৰাসায়নিক দ্ৰব্য প্ৰয়োগ কৰাৰ পদ্ধতি, পাত তোলাৰ নিয়ম,পাত তোলাৰ ঘূৰণৰ সময়,পাতৰ গুণগত মান বৰ্তাই ৰখাৰ পদ্ধতি, পাত ছিঙাৰ নিয়মকে ধৰি বিভিন্ন দিশৰ ওপৰত তেওঁলোকে তত্বগধুৰ ভাষণ প্ৰদান কৰি ক্ষুদ্ৰ চাহ খেতিয়ক সকলৰ মাজত সজাগতা বৃদ্ধিৰ প্ৰয়াস কৰে।আজিৰ এই সভাখনৰ জৰিয়তে বিশেষকৈ চাহ গছত নিষিদ্ধ কীটনাশক আৰু ৰাসায়নিক দ্ৰব্য প্ৰয়োগ নকৰিবলৈ কঠোৰ ভাবে আহ্বান জনোৱা হয়।

সভাখনত উপস্থিত থাকি ছয়দুৱাৰ আঞ্চলিক ক্ষুদ্ৰ চাহ খেতিয়ক সন্থাৰ সাধাৰণ সম্পাদক অজিত কুমাৰ পায়েঙে চাহ খেতিৰ ক্ষেত্ৰত ল'বলগীয়া সাৱধানতাৰ বিষয়ে বাখ্যা আগবঢ়াই কয় যে সদায় প্ৰতিগৰাকী চাহ খেতিয়কে গুণগত মাণদণ্ডৰ পাত তোলাৰ ওপৰত গুৰুত্ব দিব লাগে।সভাখনত মা কামাখ্যা টি ইণ্ডাষ্ট্ৰীৰ পৰিচালন সঞ্চালক মনোজ আগৰৱালাই ভাষণ প্ৰদান কৰি সমল ব্যক্তি তিনিগৰাকীয়ে আগবঢ়োৱা পৰামৰ্শ সমূহ মানি চলি পাতৰ গুণগত মান নিৰূপনৰ ওপৰত গুৰুত্ব দিবলৈ ক্ষুদ্ৰ চাহ খেতিয়ক সকলৰ প্ৰতি অনুৰোধ জনায়।

সভাখনত মা কামাখ্যা টি ইণ্ডাষ্ট্ৰীৰ স্বস্তাধিকাৰী সুভাষ আগৰৱালা, সঞ্জু আগৰৱালা, বিশিষ্ট সমাজকৰ্মী খুকন চৰকাৰ,আমালাইগুৰি আশা টি আত্মসহায়ক গোটৰ সভাপতি বিৰ সিং মুছাহাৰী,গ্ৰীণ ভেলি আত্মসহায়ক গোটৰ সভাপতি ভৱানী শৰ্মা, এম জে গহপুৰ আত্মসহায়ক গোটৰ সম্পাদক পলাশ দাস প্ৰমুখ্যে শতাধিক ক্ষুদ্ৰ চাহ খেতিয়ক আৰু কেঁচা চাহ পাত যোগানকাৰী উপস্থিত থাকে।সভাৰ শেষত এক প্ৰীতি ভোজৰো আয়োজন কৰা হয়।