কেন্দ্ৰীয় শ্বহীদ দিৱসৰ প্ৰস্তুতিৰ বুজ ল'লে ভৱেশ কলিতাই...

ডিজিটেল সংবাদ,জামুগুৰিহাটঃ   ভাৰতীয় যুৱ মৰ্চাৰ উদ্যোগত জামুগুৰিহাটৰ পকামুৰা পথাৰত ১০ ডিচেম্বৰত অনুষ্ঠিত হ’ব কেন্দ্ৰীয় শ্বহীদ দিৱস ৷ ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মাকে ধৰি কেবাগৰাকীও মন্ত্ৰী-সাংসদ উপস্থিত থাকিব লগা এই কাৰ্যসূচীটোৰ বাবে ইতিমধ্যে পকামুৰা পথাৰত চলিছে ব্যাপক প্ৰস্তুতি ৷ 

ৰাজ্যিক যুৱ মৰ্চাৰ সভাপতি ৰাকেশ দাস বিগত কেইবাদিনো জামুগুৰিহাটতে বাহৰ পাতি নিজে পৰ্যবেক্ষণ কৰিছে প্ৰতিটো দিশ ৷ অবিভক্ত শোণিতপুৰ জিলাৰ ১৬০ গৰাকী শ্বহীদৰ পৰিয়ালক সম্বৰ্ধনা জনাব লগীয়া ভাৰতীয় জনতা যুৱ মৰ্চাৰ কেন্দ্ৰীয় শ্বহীদ দিৱসৰ প্ৰস্তুতিৰ বুজ ল’বলৈ আজি আহি উপস্থিত হ’লহি ভৱেশ কলিতা ৷

সভাপতি গৰাকীয়ে কেন্দ্ৰীয় শ্বহীদ দিৱস অনুষ্ঠানটিৰ সৰ্বতোপ্ৰকাৰ সাফল্যমণ্ডিত কামনা কৰাৰ লগতে যুৱ মৰ্চাৰ কৰ্মকৰ্তা সকলকো উৎসাহ দিয়া পৰিলক্ষিত হয় ৷ বিজেপিৰ ৰাজ্যিক সভাপতিগৰাকীক সংগ দিয়ে নদুৱাৰ সমষ্টিৰ বিধায়ক পদ্ম হাজৰিকাই ৷