বাংলাদেশত পৰেশ বৰুৱাৰ মৃত্যুদণ্ডৰ শাস্তি আজীৱন কাৰাদণ্ডলৈ হ্ৰাস..

ডিজিটেল ডেস্কঃ বাংলাদেশত বহু চৰ্চিত ১০খন ট্ৰাক অস্ত্ৰ সৰবৰাহৰ গোচৰত আলফাৰ সামৰিক অধিনায়ক পৰেশ বৰুৱাৰ শাস্তি মৃত্যুদণ্ডৰ পৰা যাৱজ্জীৱন কাৰাদণ্ডলৈ হ্ৰাস কৰিছে উচ্চ ন্যায়ালয়ে। ইয়াৰ উপৰিও বাংলাদেশৰ উচ্চতম ন্যায়ালয়ে গৃহ পৰিক্ৰমা বিভাগৰ প্ৰাক্তন ৰাজ্যিক মন্ত্ৰী লুটফুজ্জামান বাবৰকে ধৰি ৭জন অভিযুক্তক দোষমুক্ত কৰিছে।

ন্যায়াধীশ মুস্তাফা জামান ইছলাম আৰু ন্যায়াধীশ নাছৰিন আখতাৰে গঠিত উচ্চ ন্যায়ালয়ৰ বিচাৰপীঠে বুধবাৰে এই ৰায় ঘোষণা কৰে।

দোষমুক্ত হোৱা আন অভিযুক্ত কেইজন হৈছে ৰাষ্ট্ৰীয় চোৰাংচোৱা সেৱাৰ প্ৰাক্তন সঞ্চালক প্ৰধান অৱসৰপ্ৰাপ্ত মেজৰ জেনেৰেল ৰেজ্জাকুল হাইদৰ চৌধুৰী, চৰকাৰী মালিকানাধীন সাৰ কাৰখানাৰ প্ৰাক্তন পৰিচালন সঞ্চালক, চট্টগ্ৰাম ইউৰিয়া ফাৰ্টিলাইজাৰ লিমিটেড (চি ইউ এফ এল)ৰ প্ৰাক্তন জেনেৰেল মেনেজাৰ মহছিন তালুকদাৰ, প্ৰাক্তন জেনেৰেল মেনেজাৰ (এন এছ আই), চিইউএফএলএ কে এম এনামুল হক, জামাতৰ প্ৰাক্তন আমিৰ মৌলানা মতিউৰ ৰহমান নিজামী (যুদ্ধ অপৰাধৰ গোচৰত মৃত্যুদণ্ড), প্ৰাক্তন ভাৰপ্ৰাপ্ত উদ্যোগ সম্পাদক নুৰুল আমিন, এন এছ আইৰ প্ৰাক্তন সঞ্চালক প্ৰধান অৱসৰপ্ৰাপ্ত ব্ৰিগেডিয়াৰ জেনেৰেল আব্দুৰ ৰহিম। দোষমুক্ত ব্ৰিগেডিয়াৰ জেনেৰেল আব্দুৰ ৰহিমৰ মৃত্যুৰ বাবে অকাৰ্যকৰী হৈ পৰিছে গোচৰ।

১০ বছৰৰ কাৰাদণ্ড পোৱা সকল হ'ল - আকবৰ হোছেইন, লিয়াকুৱাট, চাহাবুদ্দিন, হাফিজ, মইনুদ্দিন, হাজী আব্দুছ সোভান। আদালতে এই ৰায়দান জাৰি কৰি মৃত্যুদণ্ডৰ দোষীসকলৰ মৃত্যুৰ উল্লেখ খাৰিজ কৰি তেওঁলোকৰ আৰু অন্যান্য দোষীসকলৰ আবেদনৰ অনুমতি দিয়ে।

আদালতত অভিযুক্তৰ হৈ অধিবক্তা এছ এম শ্বাহজাহান, অধিবক্তা মহম্মদ শিশিৰ মনিৰ আৰু অধিবক্তা মহম্মদ আহছান হাজিৰ হয়। চট্টগ্ৰামত ১০খন ট্ৰাক অস্ত্ৰ সৰবৰাহ কৰাৰ গোচৰত অভিযুক্তৰ মৃত্যুৰ উল্লেখ (মৃত্যুৰ শাস্তিৰ অনুমোদন) আৰু আবেদনৰ শুনানি ৬ নৱেম্বৰৰ পৰা আৰম্ভ হয়। সেইদিনা প্ৰাক্তন গৃহ পৰিক্ৰমা ৰাজ্যিক মন্ত্ৰী লুটফুজ্জামান বাবৰ আৰু আন কেইবাজনো প্ৰতিবাদীৰ হৈ শুনানিত উপস্থিত আছিল জ্যেষ্ঠ অধিবক্তা এছ এম শ্বাহজাহান।

২০০৪ চনৰ ১ এপ্ৰিলত চট্টগ্ৰামৰ চি ইউ এফ এল ঘাটৰ পৰা ১০ খন ট্ৰাক জব্দ কৰা হয়। বন্দৰ চহৰৰ কৰ্ণাফুলি আৰক্ষী থানাত অস্ত্ৰ আইন আৰু বিশেষ ক্ষমতা আইনৰ অধীনত চোৰাং ব্যৱসায়ৰ অভিযোগ উত্থাপন কৰি দুটা গোচৰ ৰুজু কৰা হৈছিল। চট্টগ্ৰাম মেট্ৰ’পলিটান চেচন জ’জ আদালত আৰু বিশেষ ন্যায়াধিকৰণ-১য়ে ২০১৪ চনৰ ৩০ জানুৱাৰীত এই গোচৰৰ ৰায়দান কৰে।

ইয়াৰ ভিতৰত অস্ত্ৰ সৰবৰাহৰ গোচৰত ১৪ জন লোকক মৃত্যুদণ্ডৰ শাস্তি প্ৰদান কৰা হৈছে, য’ত আছিল প্ৰাক্তন উদ্যোগ মন্ত্ৰী আৰু জামাত-ই-ইছলামীৰ আমিৰ মতিউৰ ৰহমান নিজামী (অন্য এটা গোচৰত মৃত্যুদণ্ড), অসম বিচ্ছিন্নতাবাদী সংগঠন আলফাৰ সামৰিক অধিনায়ক পৰেশ বৰুৱা, গৃহ পৰিক্ৰমা বিভাগৰ প্ৰাক্তন মন্ত্ৰী লুটফুজ্জামান বাবৰ আৰু দুটা চোৰাংচোৱা সংস্থাৰ জ্যেষ্ঠ বিষয়া। অস্ত্ৰ আইনৰ অধীনত দাখিল কৰা আন এটা গোচৰত একেখিনি প্ৰতিবাদকাৰীকে যাৱজ্জীৱন কাৰাদণ্ডৰ শাস্তি প্ৰদান কৰা হয়।