ঢকুৱাখনাত ৬৮ কীৰ্তিমানক আটাছুৰ সম্বৰ্ধনা

ডিজিটেল সংবাদ, ঢকুৱাখনাঃ ঢকুৱাখনা সমজিলাৰ মেধাৱী কীৰ্তিমান শিক্ষাৰ্থী সকলক বিদ্যায়তনিক ক্ষেত্ৰখনত কৃতিত্বৰে আগুৱাই যোৱাত উৎসাহ উদ্দীপনা যোগোৱাৰ লক্ষ্যৰে শনিবাৰে ঢকুৱাখনাত অনুষ্ঠিত কৰা হয় সম্বৰ্ধনা অনুষ্ঠান। ঢকুৱাখনা আঞ্চলিক তাই আহোম ছাত্ৰ সন্থাৰ উদ্যোগত ঢকুৱাখনা তাই সংস্কৃতি গৱেষণা আৰু বিকাশ কেন্দ্ৰত অনুষ্ঠিত হয় উক্ত সম্বৰ্ধনা সভা।  

বিকাশ কেন্দ্ৰৰ সভাপতি জীতেন গগৈ আৰু ঢকুৱাখনা আঞ্চলিক তাই আহোম ছাত্ৰ সন্থাৰ সভাপতি ডেভিড চাংমাইয়ে বন্তি প্ৰজ্বলনেৰে শুভাৰম্ভ কৰা অনুষ্ঠানৰ উদ্বোধন কৰে সমজিলা আয়ুক্ত কাৰ্ত্তিক কলিতাই। বিকাশ কেন্দ্ৰৰ সম্পাদক অৰুণ চমুৱাই আঁত ধৰা অনুষ্ঠানত মুখ্য অতিথি হিচাবে উপস্থিত থাকে সদৌ তাই আহোম ছাত্ৰ সন্থাৰ কেন্দ্ৰীয় সমিতিৰ সম্পাদক চাও অচ্যুত বৰগোঁহাই, নিৰ্দিষ্ট বক্তা হিচাবে প্ৰবীণ শিক্ষাবিদ  গৰ্কী বৰগোঁহাইৰ লগতে লখিমপুৰ জিলা সমিতিৰ সভাপতি চাও নোমল গগৈ, সম্পাদক চাও প্ৰাণজিত বৰুৱা, ঘিলামৰা আঞ্চলিক সমিতিৰ সভাপতি চাও ভবেশ  বৰুৱা, ঢকুৱাখনা আঞ্চলিক সমিতিৰ সভাপতি চাও ডেভিড চাংমাই, সম্পাদক চাও ৰঞ্জন সন্দিকৈ, প্ৰবীণ শিক্ষাবিদ প্ৰদীপ চমুৱা, পৌৰপতি ৰাজীৱ দাসৰ লগতে বহু কেইগৰাকী বিশিষ্ট ব্যক্তি, অভিভাৱক ৰাইজ আৰু সংগঠনৰ কৰ্মকর্তা সকল উপস্থিত থাকে।

জনাকীৰ্ণ সভাত ঢকুৱাখনা সমজিলাৰ পৰা উচ্চতৰ মাধ্যমিক আৰু হাইস্কুল শিক্ষান্ত পৰীক্ষাত কৃতিত্বৰে উত্তীৰ্ণ হোৱা তাই আহোম জনগোষ্ঠীৰ ৬৮ গৰাকী মেধাৱী শিক্ষাৰ্থীক গামোচা, মানপত্ৰ আৰু স্মাৰকেৰে  সম্বৰ্ধনা জনাই সফল শৈক্ষিক ভৱিষ্যতৰ বাবে সন্থাৰ তৰফৰ পৰা অভিনন্দন জনোৱা হয়।