বিটিআৰত নতুনকৈ অন্তৰ্ভুক্ত ৮১খন গাঁৱৰ খচৰা সীমা নিৰ্ধাৰণ ৰাজ্যপালৰ...

ডিজিটেল ডেস্কঃ বিটিআৰত নতুনকৈ অন্তৰ্ভুক্ত হোৱা ৮১খন গাঁৱৰ খচৰা পৰিসীমা আদেশ সন্দৰ্ভত অসমৰ ৰাজ্যপালগৰাকীয়ে এক অধিসূচনা জাৰি কৰিছে। ফলস্বৰূপে অসম চৰকাৰে পূর্বৰ ৩১ ডিচেম্বৰ, ২০২২, ৬ নৱেম্বৰ ২০২৩, আৰু ২১ ছেপ্টেম্বৰ, ২০২৪ৰ অধিসূচনা বড়োলেণ্ডৰ কল্যাণ বিভাগে জাৰি কৰি এই গাঁওসমূহক আনুষ্ঠানিকভাৱে বিটিআৰত সংযোজন কৰে৷

উল্লেখ্য যে, ২০২৫ চনৰ ৩ জুনত বড়োলেণ্ড কল্যাণ বিভাগৰ অধিসূচনা অনুসৰি নতুনকৈ সংযোজিত গাঁওকে ধৰি সমষ্টি সমূহৰ ভূখণ্ডৰ সীমা নিৰ্ধাৰণৰ ক্ষমতা অসমৰ অতিৰিক্ত মুখ্য সচিব ড০ বি কল্যাণ চক্ৰৱৰ্তীক অৰ্পণ কৰা হৈছে।

বড়োলেণ্ড টেৰিটৰিয়েল কাউন্সিলৰ নিয়ম, ২০০৪ৰ ৩(২)ৰ অধীনত চৰকাৰে প্ৰকাশৰ সাত দিনৰ ভিতৰত জনসাধাৰণৰ মতামত, আপত্তি বা পৰামৰ্শ আমন্ত্ৰণ জনাই পৰিষদ এলেকাৰ ভিতৰৰ বিশিষ্ট স্থানত সীমা নিৰ্ধাৰণৰ খচৰাৰ আদেশ প্ৰকাশ কৰিব লাগিব।

পৰিশিষ্ট "A" ত বিশদভাৱে উল্লেখ কৰা খচৰা আদেশ সাধাৰণ তথ্যৰ বাবে প্ৰকাশ কৰা হৈছে। জনসাধাৰণ, ব্যক্তি, আৰু সংগঠনসমূহক ১৩ জুন, ২০২৫ৰ ভিতৰত অসম সন্দৰ্ভত নিজ নিজ মতামত দাখিল কৰিবলৈ আহ্বান জনাইছে। জিলা উপায়ুক্তসকলে দাখিল কৰা তথ্য সমূহ পৰ্যালোচনা কৰি ১৬ জুন, ২০২৫ৰ ভিতৰত তেওঁলোকৰ পৰামৰ্শ আৰু মন্তব্য অতিৰিক্ত মুখ্য সচিবলৈ প্ৰেৰণ কৰিব।

এই প্ৰক্ৰিয়াৰ লক্ষ্য হৈছে বড়োলেণ্ড টেৰিটৰিয়েল অঞ্চলৰ ভিতৰত ফলপ্ৰসূ শাসন আৰু প্ৰতিনিধিত্বৰ বাবে সমষ্টিসমূহৰ এক ন্যায্য আৰু স্বচ্ছ সীমা নিৰ্ধাৰণ নিশ্চিত কৰা।