প্রকৃতি আৰু বন্যপ্রাণী আলোকছবি প্রদর্শনীৰ আয়োজন

ডিজিটেল সংবাদ, গুৱাহাটী : ভাৰতৰ জৈৱ বৈচিত্র্য সংৰক্ষণ আৰু পৰিৱেশ সুৰক্ষা ক্ষেত্রখনৰ এক অগ্রণী সংস্থা হৈছে আৰণ্যক। এই সংস্থাটোৰ ৩৫সংখ্যক বর্ষপূর্তি উদযাপনৰ অংশ হিচাপে চলিত বৰ্ষত অসমৰ বিভিন্ন প্রান্তত এলানি প্রকৃতি আৰু বন্যপ্রাণী সম্পর্কীয় আলোকছবিৰ প্রদর্শনী অনুষ্ঠান আৰম্ভ কৰা হৈছে। 

এই পদক্ষেপৰ দ্বিতীয়টো অনুষ্ঠান 'বন ছবি ২.০' অহা ২ আৰু ৩ আগষ্টত নগাওঁ চহৰৰ প্ৰণৱ বৰুৱা কলাক্ষেত্রত কলা-সংস্কৃতি আৰু সাহিত্য-সংগীতৰ লগত দীর্ঘকাল জড়িত হৈ থকা সাংস্কৃতিক গোষ্ঠী 'কল্লোল'ৰ লগত যুটীয়াভাৱে অনুষ্ঠিত কৰিবলৈ লোৱা হৈছে। এই প্রদর্শনীত দেশৰ ভিন্ন প্রান্তৰ ৩০ জনতকৈ অধিক প্রতিভাৱান আলোকচিত্র শিল্পীৰ উল্লেখযোগ্য আলোকছবিৰ লগতে আৰণ্যকৰ প্রকৃতি সংৰক্ষণৰ বর্ণিল যাত্রাক প্রতিনিধিত্ব কৰা কিছু সংখ্যক নির্বাচিত আলোকছবিও প্রদর্শন কৰা হ'ব। 

উল্লেখযোগ্য যে, এই অনুষ্ঠানৰ উদ্দেশ্য হৈছে প্রকৃতি আৰু বন্যপ্রাণী সংৰক্ষণৰ বাবে সজাগতা আৰু প্রেৰণা সৃষ্টিৰ ক্ষেত্রত আলোকছবিৰ ভূমিকাৰ ওপৰত আলোকপাত কৰা। ইতিমধ্যে এই অনুষ্ঠানৰ সম্পৰ্কত উদ্যোক্তাই এক বিজ্ঞপ্তি ৰাজহুৱা কৰিছে। বিজ্ঞপ্তিত উদ্যক্তাসকলে কাৰ্যসূচীসমূহ উল্লেখ কৰিছে।

কার্যসূচীসমূহ হৈছে-

ক) ২ আৰু ৩আগষ্ট, বিয়লি ২:০০ ৰ পৰা সন্ধিয়া ৮-০০ বজালৈ প্রকৃতি আৰু বন্যপ্রাণী আলোকছবি প্রদর্শনী।
খ) ২ আগষ্ট, বিয়লি ৪.০০ বজাত প্রদর্শনীৰ উদ্বোধনী অনুষ্ঠান।
গ) ২ আগষ্ট, আবেলি ৪: ৩০ ৰ পৰা ৬-৩০ বজালৈ। বক্তৃতা ১) প্রকৃতি সংৰক্ষণ আৰু সজাগতাৰ মাধ্যম হিচাপে আলোকছবি শিল্পৰ গুৰুত্ব ২) প্রকৃতি অনুধাৱনৰ বাবে আলোকছবি শিল্প আৰু প্রযুক্তিৰ ব্যৱহাৰ।
ঘ) ৩ আগষ্ট, পুৱা ৭:০০ পৰা ৬০০ বজালৈ আলোকছবিৰ লগত জড়িত প্রযুক্তি আৰু সৃষ্টিশীলতাৰ ব্যৱহাৰিক দিশ সমূহ অন্তর্ভুক্ত কৰি এক ক্ষেত্রভিত্তিক অধ্যয়ন আৰু প্রশিক্ষণ, বিশেষকৈ আলোকচিত্র শিল্পৰ প্রতি আগ্রহী যুৱক-যুৱতীসকলৰ বাবে।
ঙ) ৩আগষ্ট, আবেলি ৫:০০ৰ পৰা ৬-৩০ বজালৈ- আলোকছবিৰ জৰিয়তে প্রকৃতি আৰু বন্যজীৱন বীক্ষণ-প্রকৃতি আৰু সৃষ্টিশীলতাৰ সমন্বয় সম্পর্কীয় এক অন্তৰংগ আড্ডা। ইয়াত নগাঁৱৰ কলা-সংস্কৃতি আৰু সাহিত্য-সংগীতৰ লগত জড়িত বিশিষ্ট ব্যক্তিসকলে অংশগ্রহণ কৰিব।

চ) ৩ আগষ্ট, আবেলি ৬-৩০ বজাৰ পৰা ৭:৩০ বজালৈ- সামৰণি অনুষ্ঠান।