ভাৰতত আইফোনৰ উৎপাদন বৃদ্ধিঃ ১০ বিলিয়ন ডলাৰৰ সীমা অতিক্ৰম...

ডিজিটেল ডেস্কঃ  ভাৰতত এপলে বৃহৎ মাইলৰ খুঁটি স্থাপন কৰিবলৈ সক্ষম হৈছে। শেহতীয়াকৈ প্ৰকাশিত এক প্ৰতিবেদন অনুসৰি, ২০২৪ চনৰ এপ্ৰিলৰ পৰা অক্টোবৰৰ ভিতৰত আইফোন উৎপাদনে ১০ বিলিয়ন ডলাৰৰ ফ্ৰেইট-অন-বৰ্ড (এফ অ’ বি) ৰ সংখ্যা স্পৰ্শ কৰিছে। বিগত বছৰৰ একে সময়ছোৱাৰ তুলনাত এই বৃদ্ধিৰ পৰিমাণ ৩৭%।

কেন্দ্ৰীয় মন্ত্ৰী অশ্বিনী বৈষ্ণৱে ছ’চিয়েল মিডিয়াত এই সাফল্যৰ কথা ঘোষণা কৰি মুঠ উৎপাদনৰ পৰা ৭ বিলিয়ন ডলাৰৰ আইফোন ৰপ্তানি কৰা হৈছে বুলিও উল্লেখ কৰিছে। ২০২৪ চনৰ অক্টোবৰ মাহটো ভাৰতত এপলৰ বাবে এক ঐতিহাসিক মাহ আছিল।

প্ৰথমবাৰৰ বাবে এটা মাহতে আইফোন উৎপাদনে ২ বিলিয়ন ডলাৰ অতিক্ৰম কৰিছিল। এয়া কোম্পানী আৰু দেশৰ বাবে ই এক অভিলেখ ভংগকাৰী কৃতিত্ব।আনহাতে ঘৰুৱা বজাৰত ৩ বিলিয়ন ডলাৰৰ আইফোন বিক্ৰী কৰা হৈছে।

২০২৪ চনৰ মাৰ্চ মাহৰ পৰা ছেপ্টেম্বৰ মাহৰ ভিতৰত এপলে ভাৰতত নিৰ্মিত প্ৰায় ৬ বিলিয়ন ডলাৰৰ আইফোন অন্য দেশলৈ ৰপ্তানি কৰিছে। পূৰ্বৰ বছৰৰ তুলনাত এই ৰপ্তানিৰ হাৰ প্ৰায় ৩০% বৃদ্ধি পোৱা বুলি এক প্ৰতিবেদনত উল্লেখ কৰিছে।

এপলৰ সফলতাৰ বাবে টাইৱানৰ তিনি বিক্ৰেতা ক্ৰমে- ফক্সকন, পেগাট্ৰন আৰু টাটা ইলেক্ট্ৰনিক্স (পূৰ্বতে উইষ্ট্ৰন) য়ে গুৰুত্বপূৰ্ণ ভূমিকা পালন কৰিছে। দ্বিতীয় ত্ৰৈমাসিকত এপলে ভাৰতত সৰ্বকালৰ ৰাজহৰ অভিলেখ গঢ়িছিল। 

উল্লেখ কৰা প্ৰয়োজন যে, এপলে ৪ বছৰত ১,৭৫,০০০ নতুন প্ৰত্যক্ষ চাকৰিৰ সৃষ্টি কৰিছে, য’ত ৭২ শতাংশতকৈ অধিক মহিলাই নিযুক্তি লাভ কৰিছে।

বৈষ্ণৱে লগতে কয়, ‘এপ্ৰিলৰ পৰা অক্টোবৰ মাহলৈকে কোম্পানীটোৱে প্ৰতিমাহে প্ৰায় ৮৪৫০ কোটি টকা (প্ৰায় ১ বিলিয়ন ডলাৰ) মূল্যৰ আইফোন ৰপ্তানি কৰিছিল। ফলস্বৰূপে জুলাই-ছেপ্টেম্বৰৰ সময়ছোৱাত এপলে ভাৰতত এতিয়ালৈকে সৰ্বাধিক ৰাজহ ৰেকৰ্ড কৰে।