/asomiyapratidin/media/media_files/2025/07/27/dhing-27-2025-07-27-12-49-42.jpg)
ডিজিটেল সংবাদ, বটদ্ৰৱাঃ বটদ্ৰৱা অঞ্চলত পুনৰ বৃহৎ উচ্ছেদ অভিযানৰ বাবে সাজু হৈছে নগাঁও জিলা প্ৰশাসন। এইবাৰ বটদ্ৰৱা থানৰ সমীপবৰ্তী ধিং ৰাজহ চক্ৰৰ অন্তৰ্গত ৬ টাকৈ স্থানত চলিব উচ্চেদ অভিযান।
এই অভিযান সন্দৰ্ভত (শনিবাৰে) ধিং ৰাজহ চক্ৰ কাৰ্যালয়ৰ পৰা জাননী জাৰি কৰা হৈছে। বটদ্ৰৱা মৌজাৰ ৰৌমাৰী বিল কিচামতৰ ৭৮ নং শ্ৰেণী নাই পানীতল চৰকাৰী দাগ, বালিসত্ৰ কিচামতৰ তিনি নং চৰকাৰী গ্ৰেজিং ৰিজাৰ্ভ, আহোম গাঁও কিচামতৰ ২৮৮ নং চৰকাৰী গ্ৰেজিং ৰিজাৰ্ভ, ৰজাবাৰী গ্ৰান্ট কিচামতৰ ২ নং গ্ৰেজিং ৰিজাৰ্ভ, লহকৰ ঘাট কিচামতৰ ২৯৭ নং চৰকাৰী গ্ৰেজিং ৰিজাৰ্ভ, বটাবাৰী কিচামতৰ ৪৪ নং চৰকাৰী গ্ৰেজিং ৰিজাৰ্ভকে আদি কৰি এই ৬ টা স্থানত শিঘ্ৰে চলিব উচ্ছেদ অভিযান।
আনহাতে এই উচ্ছেদৰ জাননীৰ পাছতে বটদ্ৰৱা অঞ্চলৰ ৰাইজে এই উচ্ছেদ কাৰ্যসূচীক আদৰণি জনাইছে। উল্লেখ্য যে, নগাঁও জিলাৰ পশ্চিমাঞ্চলৰ এই বেদখলকৃত অঞ্চলসমূহত বিভিন্ন অপৰাধজনিত ঘটনা সংঘটিত হৈছিল বিগত দিনত।
গুৰুজনাৰ জন্মস্থানৰ চৌপাশৰ সামাজিক সাংস্কৃতিক পৰিবেশৰ প্ৰতি ভাবুকি সৃষ্টি হৈছিল। উল্লেখ্য যে, ২০২২ বৰ্ষৰ ১৯ ডিচেম্বৰত নগাঁও জিলা প্ৰশাসনে বটদ্ৰৱাত চলাইছিল বৃহৎ উচ্ছেদ অভিযান।
উক্ত উচ্ছেদ অভিযানত বটদ্ৰৱাৰ জামাই বস্তি, ভোমোৰাগুৰি, ধনীয়াভেটি পথাৰ, শান্তিজান বজাৰ, বাটমাৰী আদি স্থানত মুঠ ৯৮৫ বিঘা চৰকাৰী ভূমি বেদখল মুক্ত কৰিছিল।