পুৰণিকলীয়া পৰম্পৰা  ধৰি ৰখা প্ৰয়াসঃ মথুৰাপুৰত বয়োজ্যেষ্ঠ একত্ৰিত হৈ অনুষ্ঠিত কৰিলে কড়ি খেল

ডিজিটেল সংবাদ, মথুৰাপুৰ : আধুনিকতাৰ ধামখুমীয়াত ক্ৰমাৎ হেৰাই যাব ধৰা পৰম্পৰাক ধৰি ৰখা প্ৰয়াস কৰিছে চৰাইদেউ জিলা বৃহত্তৰ মথুৰাপুৰ অঞ্চলৰ ৰাইজে ৷ উল্লেখ্য যে, বিজ্ঞান প্ৰযুক্তিৰ দ্ৰুত আগ্ৰাসনে সকলোকে চেপি ধৰাৰ হেতু অসমীয়া সমাজত যুগ যুগ ধৰি প্ৰচলিত হৈ অহা বহু ৰীতি-নীতি তথা পৰম্পৰাগত খেল-ধেমালি আমাৰ সমাজৰ পৰা হেৰাই যোৱা উপক্ৰম হৈছে ৷

তথাপি কিছু পুৰণি পৰম্পৰাগত খেল-ধেমালি ঠায়ে ঠায়ে সংকটৰ মাজেৰে হ'লেও জীয়াই ৰখা পৰিলক্ষিত হৈছে ৷ তেনে কিছু পুৰণি পৰম্পৰাগত খেল আজিও ঠাই বিশেষে বিদ্যমান ৷

অসমীয়া সমাজৰ তেনে এক পুৰণি তথা থলুৱা খেল হ'ল কড়ি খেল ৷ সম্প্ৰতি বিলুপ্ত হ'ব ধৰা এই খেলবিধ ৰঙালী বিহুৰ প্ৰাক্ মুহূৰ্তত অথবা চ'ত মাহৰ পৰা আৰম্ভ কৰি বিহুৰ উৰুকাৰ নিশালৈকে এই খেলবিধ খেলাৰ প্ৰচলন হৈ আহিছে উজনি অসমৰ বিভিন্ন ঠাইত ৷

পুৰণি পৰম্পৰা ৰক্ষা কৰি মথুৰাপুৰৰ গ্ৰামাঞ্চলসমূহত চ'ত মাহৰ মাজভাগৰ পৰা বিহুৰ উৰুকালৈকে প্ৰতি দিনাই সন্ধিয়া গাঁৱৰ ডেকা-বুঢ়া, কিশোৰ- যুৱক সকলে একত্ৰিত হৈ কড়ি খেল অনুষ্ঠিত কৰি আহিছে ৷ সময়ৰ সোঁত হেৰাই যাবলৈ ধৰা পৰম্পৰাগত এই কড়ি খেলে নতুন প্ৰজন্মক চিনাকি কৰি দিয়া প্ৰয়াস কৰি মথুৰাপুৰ ভকত গাঁও বয়োজ্যেষ্ঠ লোকে সকলে এই খেল অনুষ্ঠিত কৰি আহিছে ৷