প্ৰধানমন্ত্ৰী মোডীৰ উপহাৰে কেনেদৰে জীৱন ৰক্ষা কৰিলে ১৫ লাখ লোকৰ...

ডিজিটেল ডেস্কঃ  বসুদেৱ কুটুম্বকমৰ নীতিত বিশ্বাস কৰে ভাৰতে , অৰ্থাৎ সমগ্ৰ বিশ্ব এক পৰিয়াল। এই নীতি অনুসৰণ কৰিয়েই ভাৰতে ২০১৬ চনত চুবুৰীয়া দেশ শ্ৰীলংকালৈ সহায়ৰ হাত আগবঢ়াইছিল। ৯ বছৰ পূৰ্বে ভাৰতে কৰা সেই সহায় কেনেদৰে দেশখনৰ বাবে আশীৰ্বাদ হিচাপে প্ৰমাণিত হৈছে সেই বিষয়ে জনাইছে শ্ৰীলংকাই।

২০১৬ চনত প্ৰধানমন্ত্ৰী নৰেন্দ্ৰ মোডীয়ে শ্ৰীলংকা ভ্ৰমণ কৰিছিল। এই ভ্ৰমণৰ সময়ছোৱাতে শ্ৰীলংকাক ৮৮খন এম্বুলেন্স উপহাৰ দিছিল প্ৰধানমন্ত্ৰী মোডীয়ে। এই এম্বুলেন্সসমূহে দেশখনৰ লাখ লাখ লোকৰ জীৱন ৰক্ষা কৰাত সহায় কৰিছে।

চৰকাৰী সূত্ৰই জনোৱা মতে, শ্ৰীলংকাই ৰাষ্ট্ৰীয় জৰুৰীকালীন এম্বুলেন্স সেৱা আৰম্ভ কৰিবলৈ ভাৰতে উপহাৰ দিয়া এম্বুলেন্স ব্যৱহাৰ কৰিছিল আৰু সময়ৰ লগে লগে এই অভিযানৰ বাবে দেশখনে এম্বুলেন্সৰ সংখ্যা বৃদ্ধি কৰিছে।

শেহতীয়াকৈ প্ৰধানমন্ত্ৰী নৰেন্দ্ৰ মোডীয়ে তিনিদিনীয়া ভ্ৰমণৰ বাবে শ্ৰীলংকা ভ্ৰমণ কৰিছিল। সেই সময়তে শ্ৰীলংকাৰ স্বাস্থ্য আৰু সংবাদ মাধ্যমৰ মন্ত্ৰী নলিন্দা জয়তিছাই শনিবাৰে প্ৰধানমন্ত্ৰী মোডীক কয়, "আজি এম্বুলেন্সৰ সংখ্যা ৩২২ লৈ বৃদ্ধি পাইছে। দেশজুৰি বিনামূলীয়া জৰুৰীকালীন পৰিবহণ সেৱা প্ৰদানৰ বাবে ইয়াক দিনে নিশাই ব্যৱহাৰ কৰা হৈছে। 

লগতে কয় যে,২২.৪ লাখ ৰোগীৰ ভিতৰত এম্বুলেন্সে উপস্থিত থকা জৰুৰীকালীন ৰোগীৰ ৬৫% ‘ক্ৰিটিকেল গোল্ডেন আৱাৰ’ শ্ৰেণীত পৰে, অৰ্থাৎ এই এম্বুলেন্স সেৱা নাথাকিলে ৰোগীয়ে প্ৰাণ হেৰুৱালেহেঁতেন। কিন্তু আপোনালোকৰ উদাৰতাৰ বাবেই এতিয়ালৈকে প্ৰায় ১৫ লাখ লোকৰ জীৱন ৰক্ষা হৈছে।