/asomiyapratidin/media/media_files/2025/07/29/web-ap-akhil-3-2025-07-29-08-57-47.jpg)
ডিজিটেল সংবাদ, কাজিৰঙাঃ "উচ্ছেদ এক অমানৱীয় বস্তু ৷ বিদেশীৰ বাহিৰে আন কাকো উচ্ছেদ কৰা উচিত নহয়। উচ্ছেদ কৰাৰ আগতে প্ৰথমে মাটি দিব লাগে, তাৰ পাছতহে উচ্ছেদ চলাব লাগে ৷" উচ্ছেদ সম্বন্ধে এই মন্তব্য বিধায়ক অখিল গগৈৰ ৷
শিৱসাগৰৰ বিধায়ক গৰাকীয়ে লগতে উল্লেখ কৰে যে, "উজনি অসমৰ ওখ মাটিবোৰ ব্ৰিটিছৰ দিনত চাহ বাগিছা নিৰ্মাণৰ বাবে দি দিয়াৰ পাছত অসমৰ ৰাইজৰ কি উপকাৰ হল ?এতিয়া পুনৰ ব্ৰিটিছৰ দৰেই বিজেপি চৰকাৰে অসমৰ মাটি আদানী-আম্বানী,ৰামদেৱ টাটাৰ দৰে কোম্পানীবোৰক দি দিবলৈ লৈছে ৷ খিলঞ্জীয়াক উচ্ছেদ কৰিবলৈ উলাওতে প্ৰতিবাদ হোৱাত মুছলমানৰ বিৰুদ্ধে উচ্ছেদ আৰম্ভ কৰি দিলে মুখ্যমন্ত্ৰীয়ে ৷ কেৱল ভোট পাবৰ বাবে হিন্দু-মুছলমানৰ সাম্প্ৰদায়িক চিন্তাক বিয়পাই দিবৰ বাবে মুছলমানৰ ঘৰ ভাঙি হিন্দুৰ ভোট লোৱা ৰাজনীতি হৈছে অসমত । উচ্ছেদ হৈ পৰিছে ৰাজনৈতিক দলৰ ভোট লোৱাৰ হাথিয়াৰ । এই ৰাজনীতি কৌশলী আৰু নিকৃষ্ট ৰাজনীতি" বুলিও মন্তব্য কৰে অখিল গগৈয়ে।
আনহাতে, "যিসমূহ সংগঠনে বিদেশী কোম্পানীক মাটি দিবৰ বাবে চলোৱা উচ্ছেদক সমৰ্থন জনাইছে তেওঁলোকক ভৱিষ্যতে কেতিয়াও ইতিহাসে ক্ষমা নকৰিব৷ ভয়াবহ এক নতুন অৰ্থনৈতিক নীতি জাপি দিয়া হৈছে ৷ প্ৰকৃত বিদেশীক চিনাক্ত কৰি বিদেশলৈ পঠিয়াই দিলে ৰাইজৰ দলে সমৰ্থন আগবঢ়াব" বুলিও উল্লেখ কৰে বিধায়ক অখিল গগৈয়ে৷